Čysly 6 - Biblija - Pe Baltitko Romani čib (Romanes) 2019

Zakóno pal Nazoriejende

¹ I phendiá Raj Devél Mojzáske dasavé lavá:

² “Rákir Izrailjoskire čhavénge i phen lénge: kóli murš ci džuvlý zakaméla te del sovláh “nazorieistvo”, sob (kaj) te otdél pes dre nazoriei Ráske-Devléske,

³ tedy jov isyn bangó te otphenelpe moliátyr (vinostyr) i zoralé pibnastyr, i naštý léske te p'jel ni uksuso (šutlo), moliátyr (vinostyr) ni uksuso zoralé pibnastyr, i ničí so kerdó vinagradostyr naštý te p'jel, i naštý te xal ni kerade, našut'kirde vinagradýtka múri;

⁴ dre saré dyvesá péskire ‘nazorieistvoskire’ naštý léske te xal ničí, so kerdó vinagradostyr, ziarkendyr ke cýpa.

⁵ Dre saré ‘nazorieistvoskire’ sovlahade dyvesá jov (léske) naštý te občhinel pe péskiro šeró balá; paka prodžána dyvesá, pe savé jov otdyjá pes Ráske-Devléske dre nazoriejende, jov javéla svénto: jov isyn bangó te barjakirel balá pe péskiro šeró.

⁶ Dre saré dyvesá, pe savé jov otdyjá pes Ráske-Devléske dre nazoriei, naštý léske te poddžál ke muló trúpo:

⁷ kasynybnasa ke péskiro dad i péskiri daj, i ke péskiro pšal, i ke péskiri phen, naštý léske te magirelpe, kiéli jone meréna, pal-dová so léskiro otdyibén Ráske-Devléske isyn pe léskiro šeró;

⁸ dre saré péskire ‘nazorieistvoskire’ dyvesá jov isyn svénto Ráske-Devléske.

⁹ Kóli meréla vari-kon pašýl léste syg, nadžiny, i jov dolesa magirela šeró péskire nazorieistvosa: tedy jov isyn bangó te občhinel balá péskire šerestyr dre léskiro žužakiribnaskiro dyvés, pe eftáto (bitrinéngiro déšto) dyvés jov isyn bangó te občhinel balá pe šeró,

¹⁰ i pe ohtóto (bidujéngiro déšto) dyvés jov isyn bangó te janel dujén gorlicen, ci dujén ternen golumben, ke rašái, ke zagiibén dre šátra skedyibnáskiri.

¹¹ O rašáj iekha čirikliendyr janéla dro svénto dyibén (žértva) pal grého, a javirja dro célo shačkiribén, i vyžužakiréla les truposkire magiribnastyr, i svenciakirela léskiro šeró dro dová dyvés;

¹² i bangó isyn jov nevéstyr (nevés) te lel te otdél Ráske-Devléske dyvesá péskire nazorieistvoskire i te janel jekhe-beršytkone bakrores dro svénto dyibén pal bang; anglatuné dyvesá xasiné, pal dová so nazorieistvo léskiro magirdó.

¹³ I ĥáda, isyn Zakóno pal nazorieistvo, kiéli prodžána dyvesá léskire nazorieistvóskire: trej les te janén ke skedyibnaskire-šatrakiro zagiibén,

¹⁴ i jov janéla dre svénto dyibén Ráske-Devléske jekhés jekhe-beršytkone bakrés bidošakires dre svénto dyibén pal grého, i jekhe bakrés bidošakires dre svénto dyibén mírno,

¹⁵ i khudo (korzina) opriesnokenca pšieničnone jaržestyr, maró, savó sys spekno jeliejosa, i priesna mariklia, savé sys pomakne jeliejosa, i pašýl lénde marunó janybén i vyčhuiben;

¹⁶ i janéla davá rašáj angíl Raste-Devléste, i janéla léskiro svénto dyibén pal grého i léskiro célo shačkiribén;

¹⁷ bakrés janéla dre mírno svénto dyibén Ráske-Devléske dro khudo pherdó apriesnokenca, adiáke keréla rašáj léskiro marunó janybén i léskiro iyčhuiben;

¹⁸ i občhinela nazoriejo pašýl dre zagiibén skedyibnáskiri šátra péskire – ‘nazorieistvoskiro’ šeró, i léla péskire ‘nazorieistvoskire’ šereskire balá, i čhuvéla pe jag, saví isyn tel mírno svénto dyibén;

¹⁹ i léla o rašáj kerado bakreskiro psikó i jekh posno paramo khudestyr i jekh posno marikly, i čhuvéla pe vastá nazoriejoske, paló dová, syr občhinela jov šeró péskire ‘nazorieistvostyr.’

²⁰ i ĥazdéla adavá rašái, trinskiri angíl Raste-Devléste: davá isyn svénto. Ake, isyn svénto dyibén vaš rašáske, adiáke-pac', syr kolyneskiro trinskiriben i adiáke-pac' psikeskiro ĥazdyiben vaš žužakiriben pir patiaibén, savésa jov žužakirelape. Paló davá saró nazoriejo saštý te p'jel mol (vino).

²¹ Ake, isyn Zakóno pal nazoriejoste, savó dyjá sovláh, i léskiro svénto dyibén (žértva) Ráske-Devléske pal péskiro nazorieistvo, apríč léste, so déla vólia léske léskiro barvalypén; pir péskiri sovláh, saví jov déla, adiáke i bangó jov isyn te kerél.”

Rašángiro Bahtiakiribén

²² I phendiá Raj Devél Mojzáske, rakirí:

²³ “Rákir Aaronóske i léskire čhavénge: adiáke bahtiakiren Izrailjoskire čhavén, rakirí lénge:

²⁴ “Mek te bahtiakirél tut Raj Devél i te rakhél tut!

²⁵ Mek te podykhel pe túte Raj Devél Péskire ziaindle mósa i te otmekél túke!

²⁶ Mek te riskirél Raj Devél Péskiro muj pe túte i déla túke ramánjo (miro)!”

²⁷ Adiáke mek te prikharen Miro lav pe Izrailjoskire čhavénde, i Me bahtiakirava len.”