Čysly 4 - Biblija - Pe Baltitko Romani čib (Romanes) 2019

Butý vaš Kaafoskire Čhavénge

¹ I phendiá Raj Devél Mojzáske i Aaronóske adiáke dasavé lavá:

² “Pirigin Kaafovoskire čhavén Lievijoskire čhavéndyr pir léngire ródy, pir léngire čékarja (siemieistvy),

³ trijánda beršéndyr i phuredýr ke pandždešá berš, sarén, kon sys dre zor te kerél butý, sob (kaj) te bičhaves te kerén butý dre skedyibnáskiri šátra.

⁴ 'Gada, saví isyn Kaafoskire-čhavengiri butý dre skedyibnáskiri šátra: te lydžán Svénto-sventonengiro (sama svénta priedmiety).

⁵ Kiéli stanoske (taboroske) trej javéla te džal dro drom, Aaróno i léskire čhavé zadžána, i zlena pologo, savó učhakiréla, i začhakirena lésa kovčego dosykaibnása (otkrovienijasa);

⁶ i čhuvéna pe léste učhakiriben sinjone-cviatoskire barsukengire cypatyr, i uprál léste čhurdena učhakiriben saró golubovoné vylnátyr (šersiatyr), i čhuvéna andré léskire balandiniá (šosty);

⁷ i mareskiro skamínd učhakirena thaniasa (matierjalosa) ĥolubovone vylnátyr, i čhuvéna pe léste čaré, baré čaré, tahtaja i kučika, sob (kaj) te počhuven, i, léskiro maró vaš kažno dyvés trej, sob (kaj) te javél pe léste;

⁸ i čhuvéna pe lénde than (matierjalo) loly, i začhakirena la učhakiribnasa sine-cviatoskire cypatyr, i učhuvena léskire balandiniá;

⁹ i léna than golubovoné vylnátyr, i začhakirena momolýtko (svietíl'niko) i léskire lampady, i léskire ščypcy (cymty), i léskire lotki, i saré khoré (sasúdy) vaš dzet (jeliejo), savénca jone keréna butý pašýl léste,

¹⁰ i začhakirena les i saré léskire sudinki učhakiribnasa sinjone cypendyr, i čhuvéna pe nosilki;

¹¹ i pe suvnakunó altárjo čhuvéna than ĥolubovone vylnátyr, i učhakirena la sinjone-barsukengire cypendyr učhakiribnasa, i čhuvéna léskire balandiniá.

¹² I léna saré butiarné priedmiety, savé trej vaš butý pe svénto štéto, i čhuvéna dre than ĥolubovone vylnátyr, i začhakirena len učhakiribnasa sinjone-barsukengire cypendyr, i čhuvéna pe nosilki.

¹³ I vyžužakirena altárjo praskatyr (pieplostyr), i učhakirena les purpurnone thaniasa;

¹⁴ i čhuvéna pe léste saré léskire khoré (sasúdy), savé trej vaš butý pašýl léste, – lopatkicy vaš vangar, bustiá (vilki), lopatki, i tahtaja, saré khoré (sasúdy) altarjostyr, i učhakirena les učhakiribnasa sinjone cypendyr, i čhuvéna andré léskire balandiniá.

¹⁵ I kiéli skedelape dre drom stáno (taboro (lod)), Aaróno i léskire čhavé učhakirena saré svénta štéty i saré sventoné-štetoskire priedmiety, tedy Kaafoskire čhavé javéna, sob (kaj) te lydžán; ne naštý jone te čilaven svénto štéto, sob (kaj) te na merén. Dalé-skedyibnaskire skinijakire pašá isyn bangé te lydžán Kaafoskire čhavé.

¹⁶ Jelizaroske, Aaronóskire-rašaskire čhavéske, dopatialape jeliejo (dzet) olivatyr vaš momolýtko (svietíl'niko) i fimiámo (gudlé smóly) te thuvliakiren, i kažnoné-dyvesengiro marunó janybén i makhibnaskiro jeliejo, te dykhél pal sarí šátra i saró, so isyn dre láte, svénto štéto i lákire priedmiety.”

¹⁷ I phendiá Raj Devél Mojzáske i Aaronóske dasavé lavá:

¹⁸ “Na domeken, sob (kaj) te xasjon Kaafoskiro kherítko ródo (pliemjo) Lievitendyr,

¹⁹ ne, ĥáda, so trej lénge te kerén, sob (kaj) jone te javén džidé i te na merén, kiéli javéna ke Svénto-sventonengiro: Aaróno i léskire čhavé mek jone te javén i te čhuvén len kažnones dre butý léskiri i pašýl dro léngiro lydžaiben;

²⁰ ne kokoré jone naštý te javén, te dykhén svénto štéto, kiéli učhakirena les, sob (kaj) te na merén.”

Butiá te Kerén Čhavénge Girsonoskirenge

²¹ I phendiá Raj Devél Mojzáske dasavé lavá:

²² “Pirigin i Girsonoskire čhavén pir čékarja/siemieistvy [léngire-dadengíre sem'i (irjá)-ju.o.], pir léngire ródy,

²³ trijande beršéndyr i phuredýr ke pandždešá berš, pirigin len sarén, kon sys dre zor te kerél butý, sob (kaj) te dynarinén pašýl skedyibnáskiri šátra.

²⁴ 'Gada, isyn Girsonoskire-čekarjakire butiá, pašýl léngire dynaribén i te lydžán pharipén:

²⁵ jone isyn bangé te lydžán šatrakiro učhakiriben i skedyibnáskiri šátra, i učhakiriben lákiro, i učhakiriben sine-cypitko, savó upralestyr, i skedyibnaskire-šatrakiri šýrma pašýl zagiibén,

²⁶ i gredakire (dvoroskire) šyrmy, i ubladytko šýrma pe gréda, saví isyn pašýl šátra i altárjo, i léngire šele, i saré priedmiety, savé trej te dynarinén i saró, so kerélape pašýl lénde: jone isyn bangé te kerén butý.

²⁷ Pir Aaronoskiro i léskire-čhavéngiro uphenybén isyn bangé te kerenpe saré Girsonoskire-čhavéngire butiá pašýl kažno pharipnaskiro lydžaiben i kažno léngiri butý, i dopatian lengireske rakhibnaske saró, so jone lydžána.

²⁸ Ĥáda, isyn čhavéngiro otphenybén Girsonoskire rodóstyr dre skedyibnáskiri šátra, i, ĥáda, so dopatialape léngire rakhibnaske tel Ifamaroskiro dykhibén, Aaronóskire, rašaskire čhavés.

²⁹ Mierariskire čhavén pirigin pir léngire ródy, pir léngire čékarja (siemieistvy),

³⁰ trijandane beršéndyr i phuredýr ke pandždešá berš, pirigin sarén, kon sys dre zor te kerél butý, sob (kaj) te dynarinén pašýl skedyibnáskiri šátra.

³¹ Ĥáda, so jone isyn bangé te lydžán, pir dynaribén pašýl skedyibnáskiri šátra: lákire bruski i lákire balandiniá, i lákire stýlby i lákire tel ĥerá predki,

³² i stýlby pe gréda saré rigéndyr, i léngire osnovy, i léngire kile (konki), i léngire šele, i saré strumiénty pašýl lénde, i saré léngire sudinki; i pir léngiro lav piriginen strumiénty, savé jone isyn bangé te lydžán.

³³ Ĥáda, isyn butiá Mierarinengire-čhavéngire rodóstyr, pir léngiro dynaribén pašýl skedyibnáskiri šátra, tel Ifamaroskiro dykhibén, Aaronóskire-rašaskire čhavéste.”

Mójza i Aaróno Piriginena Lievitén

³⁴ I pirigindle Mójza i Aaróno i barydyrá Kaafavoskire čhavén pir léngire ródy i pir léngire čékarja,

³⁵ trijande beršéndyr i phuredýr ke pandždešá berš, sarén, kon sys dre zor te kerél butý, te dynarinél dre skedyibnáskiri šátra;

³⁶ i sys pirigindlo, pir léngire ródy, duj tysjoncy eftašelá pandždešá.

³⁷ Ake, sys saré, savén pirigindle Kaafovoskire rodendyr, kon sys dre zor te dynarinél pašýl skedyibnáskiri šátra, savén pirigindia Mójza i Aaróno pir Ráskire-Devléskiro priphenybén, savó dyjá Jov pir Mojzaste.

³⁸ I pirigindle Girsonoskire čhavén pir léngire ródy i pir léngire čékarja (siemieistvy),

³⁹ trijandane beršéndyr i phuredýr ke pandždešá berš, sarén, kon sys dre zor te kerél butý, dre skedyibnáskiri šátra;

⁴⁰ i pirigindlo sys pir léngire ródy, pir léngire čékarja (siemieistvy), sys duj tysjoncy šovšelá trijánda;

⁴¹ ake, isyn piriginybén Girsonoskire-čhavéngire rodóstyr, sarén, kon sys dre zor te kerél butý pašýl skedyibnáskiri šátra, savén pirigindia Mójza i Aaróno, pir Ráskire-Devléskiro priphenybén.

⁴² I pirigindle sys Mierarinoskire-čhavéngire ródy pir léngire ródy, pir léngire čékarja (siemieistvy),

⁴³ trijande beršéndyr i phuredýr ke pandždešá berš, sarén, kon sys dre zor te kerél butý, dre skedyibnáskiri šátra;

⁴⁴ i sys pirigindlo pir léngire ródy, trin tysjoncy dujšelá:

⁴⁵ ake, isyn piriginybén Mierariskire-čhavéngire rodóstyr, savén pirigindia Mójza i Aaróno pir Ráskire-Devléskiro priphenybén, savó sys dynó pir Mojzaste.

⁴⁶ I pirigindle sarén Lievitén, savén pirigindia Mójza i Aaróno i Izrailjoskire barydyrá pir léngire ródy i pir léngire čékarja,

⁴⁷ Trijande beršéndyr i phuredýr ke pandždešá berš, sarén, kon sys dre zor te kerél butý i te lydžál skedyibnáskiri skínija;

⁴⁸ i sys pirigindlo len ohtó (bidujéngiro déšto) tysjoncy pandžšelá eftadešá;

⁴⁹ kažnonéske léstyr pir Devléskiro priphenybén pir Mojzaste sys dyný péskiri butý i lydžaiben, i pirigindle, syr priphendiá Raj Devél Mojzáske.