Čysly 3 - Biblija - Pe Baltitko Romani čib (Romanes) 2019

Aaronóskire Čhavé

¹ Ĥáda, isyn Mojzáskiro i Aaronoskiro ródo, kiéli rakirdiá Raj Devél Mojzáske pe bérga Sinajo,

² i, ake, isyn Aaronóskire-čhavéngire lavá: anglatunó (pérvo) Nadavo, Aviudo, Jelizáro i Ifamaro;

³ ake, isyn Aaronóskire-čhavéngire lavá, rašángire, savén pomakhne, savén jov (Aaróno) vysvencyndia, sob (kaj) jone te kerén butý syr rašaja;

⁴ ne Nadavo i Aviudo myné angíl Raste-Devléste, kiéli jone jandlé javire-manušéngiri jag angíl Raste-Devléste pe Sinajoskiri čhučí phuv, čhavén lénde na sys; i jačnépe rašanca Jelizáro i Ifamaro pašýl péskire dadéste Aaronoste.

Lievíty Keréna Butý dre Šátra

⁵ I phendiá Raj Devél Mojzáske dasavé lavá:

⁶ “Jan Lievijoskiro ródyco (čang), i čhuv les rašása angíl Aaronoste, sob (kaj) jone te dynarinén (te služynen) léske;

⁷ i mek jone te javén pe stréga pal léste, i pe stréga pal saró skedyibén pašýl šátra skedyibnáskiri, sob (kaj) jone te lydžán butý pašýl šátra;

⁸ i mek jone te rakhén saré pribory skedyibnaskire šatratyr, i javéna pe stréga pal Izrailjoskire čhavénde, sob (kaj) te lydžán butý pašýl šátra.

⁹ Otdé Lievitén Aaronóske i léskire čhavénge sarésa: mek te javén jone otdyné léske Izrailjoskire čhavéndyr;

¹⁰ Aaronós i léskire čhavén čhuv te kerén butý, sob (kaj) jone te dykhén péskiri rašaskiri butý; a kóli poddžála javír manúš, odová manúš javéla otdynó meribnáske.”

¹¹ I phendiá Raj Devél Mojzáske, rakirí:

¹² “Ĥáda, Me lyjom Lievitén Izrailjoskire čhavéndyr zamiést (pe štéto) saré anglatunende (pervonende), savó vydžála ločoviátyr (lonostyr) maškír Izrailjoskire čhavénde, Lievíty isyn bangé te javén Miré;

¹³ pal-dová so saré anglatuné čhavoré – Miré; dro dová dyvés, kiéli Me xasiakirdjom sarén anglatunen bijatoren pe Jegiptóskiri phuv, Me vysvenciakirdjom Péske sarén anglatunen Izrailjoskire manušéstyr ke kherítka murdalá (skoto); jone isyn bangé te javén Miré. Me som Raj Devél.”

¹⁴ I phendiá Raj Devél Mojzáske pe Sinajoskiri čhučí phuv dasavé lavá:

Piriginybén Lievitengiro

¹⁵ “Pirigin Lievijoskire čhavén pir léngire čékarja (siemieistvy), pir léngire ródy; gin sarén muršén jekhe čhonestyr i phuredýr.”

¹⁶ I pirigindia len Mójza pir Ráskire-Devléskiro lav, syr sys priphendlo.

¹⁷ I ĥáda, isyn Lievijoskire čhavé pir léngire lavá: Girsono, Kaafo i Mierari.

¹⁸ I, ake, isyn Girsonoskire-čhavéngire lavá pir léngire ródy: Livnjo i Šymiejo.

¹⁹ I Kaafoskire čhavé pir léngire ródy: Amramo i Icgaro, Xievróno i Uziilo.

²⁰ I Mierariskire čhavé pir léngire ródy: Mahli i Muša. Ĥáda, isyn Lievijoskiro ródo pir léngire čékarja.

²¹ Girsonostyr džála ródo Livniskiro i ródo Šymejaskiro: davá isyn Girsonoskiro ródo.

²² Pirigindle sys saré muršá, jekhe čhonestyr i phuredýr, len sys eftá tysjoncy pandžšelá.

²³ Girsonoskire ródy bangé sys te terdjon stanósa (taborosa) pale šátra pe zapado;

²⁴ barydyró pe Girsonoskire-čhavéngiro, léngire-dadengiri streč (pokolienijo) sys Jeliasafo, Lajeloskiro čhavó.

²⁵ Girsonoskire čhavénge dopatialape skedyibnáskiri šátra te rakhén, i lákiro učhakiriben (pologo), i skedyibnáskiri šýrma pe zagiben, dre šátra,

²⁶ i pe gréda (dvóro) i dvoroskire-zagiibnaskiri šýrma, saví isyn trusciál (krugom) skínija i altárjo, i lákire šele, sarénca léngire priborenca.

²⁷ Kaafostyr sys ródo Amramoskiro i ródo Icgaraskiro, Xievronoskiro ródo, i Uziiloskiro ródo: dalé isyn Kaafoskire ródy.

²⁸ Pir ginybén saré muršén jekhe čhonestyr i phuredýr, sys ohtó tysjoncy šovšelá, savé rakhne svénto štéto.

²⁹ Kaafoskire-čhavéngire ródy sys bangé te čhuvén péskiro stáno pe paš-dyvesýtko (južno) šatrakiri rig;

³⁰ o barydyró Kaafoskire rodóstyr sys o Jelcafano, Uziiloskiro čhavó;

³¹ Lénge sys dynó te rakhén kovčego, skamínd, momolýtko (svietíl'niko), altárjo, svénta khoré (sasúdy), savénca sys trej lénge te dynarinén (te služynen), i šýrma saré lákire priborenca.

³² Šeraló barydyró pe Lieviténgire barydyrende sys o Jelizáro, Aaronóskire-rašaskiro čhavó; tel léskiro rakhiben sys odolé, savénge sys dopatiandlo te rakhén svénto štéto.

³³ Mieraristyr sys Mahliskiro ródo i Mušiskiro ródo: davá sys Mierariskiro ródo;

³⁴ pirigindle sarén muršén, jekhe čhonestyr i phuredýr – šov tysjoncy dujšelá;

³⁵ o barydyró Mierariskire-dadéngiro rodóstyr sys o Curiilo, Avihailoskiro čhavó; jone sys bangé te čhuvén péskiro stáno pe paš-ratítko (sievierno) rig šatratyr;

³⁶ Mierariskire čhavénge dopatianas te rakhén šatrakire bel'ki (brusy) i lákire balandiniá (šosty), i lákire stýlby, i lákire tel ĥerá predki i saré lákire pribory saré léngire keribnasa,

³⁷ i stýlby pe gréda (dvóro) saré rigéndyr i léngire predki (osnovy), i léngire kilore i léngire šele.

³⁸ Anglatuné rigátyr dre šátra, ke vastóko angíl skedyibnáskiri šátra, saví sys risii, kaj ĥazdélape kham, sys bangé te čhuvén stáno (taboro (lod)) Mójza i Aaróno i léskire čhavé, savénge sys dopatiandyno te rakhén svénto štéto pal Izrailjoskire čhavénde; a kóli vari-kon poddžála javire manušéndyr (savó na Aaronostyr), javéla otdynó meribnáske.

³⁹ Sarén gindlen Lievitén, savén pirigindle Mójza i Aaróno pir priphenybén Rástyr-Devléstyr, pir léngire ródy, sarén muršén, jekhe čhonestyr i phuredýr, sys biš te duj tysjoncy.

Lievíty Dyné Devléske

⁴⁰ I phendiá Raj Devél Mojzáske: “Pirigin sarén anglatunen čhavorén Izrailjoskire čhavéndyr jekhe čhonestyr i phuredýr, i pirigin len pir lavá;

⁴¹ i le Lievitén vaš Mánge, – Me som Raj Devél, – i zamiést (pe štéto) sarénde anglatunende Izrailjoskire čhavéndyr, a Lieviténgire kheritkoné murdalén zamiést (pe štéto) saró pervoné-bijanypnytko murdalengiro kheritkoné Izrailjoskire čhavéndyr.”

⁴² I pirigindia Mójza, syr priphendiá léske Raj Devél, sarén Izrailjoskire čhavéngire anglatuné čhavorén;

⁴³ i sys saré anglatuné čhavorén, pir lavengiro ginybén, jekhe čhonestyr i phuredýr biš te duj tysjoncy dujšelá eftadešá trin.

⁴⁴ I phendiá Raj Devél Mojzáske dasavé lavá:

⁴⁵ “Le Lievitén zamiést sarén anglatunen čhavorén Izrailjoskire čhavéndyr, i Lieviténgire kheritkoné murdalén (skoto) zamiést léngire kheritkoné murdalénde; mek Lievíty te javén Miré. Me som Raj Devél.

⁴⁶ A dro vykinybén pal dujšelá eftadešá trinende, savé jačnépe butýr Lieviténgire ginybnastyr, Izrailjoskire anglatuné čhavorendyr,

⁴⁷ to le pe pandž šékieli pal manušéste, pir svénto šékieljo le, biš giery dro šékieljo,

⁴⁸ i otdé davá rup Aaronóske i léskire čhavénge, dro vykinybén pal lišnjone (savé jačnépe) manušénde.”

⁴⁹ I lyjá Mójza vykinybnaskiro rup pal lišnjone manušénde, savén zaparude Lievíty,

⁵⁰ Izrailjoskire anglatuné čhavorendyr jov lyjá rup tysjonco (bar) trin šelá šovdešá pandž šékieli, pir svénto šékieljo,

⁵¹ i otdyjá o Mójza vykinybnaskiro rup Aaronóske i léskire čhavénge pir Ráskire-Devléskiro lav, syr priphendiá Raj Devél Mojzáske.