Čysly 21 - Biblija - Pe Baltitko Romani čib (Romanes) 2019

E Judy Pirizorjakirde Aradas

¹ Kiéli Xanaanoskiro králi o Arada, savó dživdiá ke paš-dyvesýtko rig (jugo), šundiá, so Izrailjo džála dromésa Afarimostyr, to terdijá pe maribén Izrail'tianenca i vari-kicý léndyr lyjá dro pliéno.

² I dyjá Izrailjo sovél Ráske-Devléske, i phendiá: “Kóli otdesa adalé manušén dre miré vastá, to rozmarava ke ruíny léngire fórja.”

³ I Raj Devél šundiá Izrailjoskiri zan i otdyjá Xananiejen dre léskire vastá, i jov rozmardiá ke ruíny léngire fórja, i dyjá lav dolé štetoske: Xorma.

Harkuno Sap

⁴ Bergátyr Or giné jone Lolé-morjoskire (derjavéskire) dromésa, sob (kaj) te obdžan Edomoskiri phuv,

⁵ i rakirdé manušá proti Raste-Devléste i próti Mojzaste: “Sóske tumé vylydžiné amen Jegiptóstyr, sob (kaj) te meras aménge pe čhučí phuv, pal-dová so adáj nane ni maró, ni paní, i amaré dieske jaciá džungaló (zbrydindia) davá nálačho xabén.”

⁶ I bičhadiá Raj Devél pe manušénde mižeh sapen, savé dukhavenas manušén, i myné but manušá Izrailjoskire čhavéndyr.

⁷ I javné manušá ke Mójza i phendlé: “Kerdiám ame grého, so rakirdiam proti Raste-Devléste i pe túte; pomangpe Ráske-Devléske, sob (kaj), Jov te otlydžal améndyr sapen.” I mangdiápe Mójza pal manušénde.

⁸ I phendiá Raj Devél Mojzáske: “Ker péske sapes i čhuv les pe vučó kilo, i manúš, savés dandyrelas sap, dykhí pe léste, jačélape džidó.”

⁹ I kerdiá Mójza xarkuné sapes i čhudiá les pe vučó kilo, i sys adiáke: i kiéli sap dandyrelas manušés, jov, dykhí, pe xarkuné sapeste, jačélape džidó.

¹⁰ I giné Izrailjoskire čhavé, i terdiné ke Vamofo [Ovoto-ju.o.];

¹¹ I giné Vamofostyr, i terdiné dro Iiie-Avarimo, pe čhučí phuv, so isyn proti Moávo, ke rig, kaj uštéla kham (vastóko).

¹² Odothýr giné jone, i terdiné pe dólo Zariedo.

¹³ Gii odothýr, terdiné jone pe doiá Arnonoskiri paš pe čhučí phuv, pir saví thadéla ruslo pale miéža Amoriejoskiri, pal-dová so Arnono isyn pe miéža Moavoskiri, maškír Moávo i Amoriejo.

¹⁴ Paldavá i phendló dre lylvarí pal brani (maribena) Ráskire-Devléskire.

¹⁵ “Odothýr giné ke Vagiebo pe Sufa i Arnonoskire sygna rekicy, i sklony, pir savé rekicy vythadena, savé bandjona ke Šiebiet-Aro i thadena ke Moavoskiro jagóro (krajo).”

¹⁶ Odothýr giné jone ke Bieer, davá isyn ĥanýng, pal saví Raj Devél phendiá Mojzáske: “Skéde manušén, i Me dáva lénge paní.”

¹⁷ Tedy Izrailjo zabagandia daja gilý: “Pherdiakirpe, ĥanýng, bagán léske;

¹⁸ ĥanýng, saví vyĥanade thagárja, vyĥanade manušéngire šeralé pir uphenybén žezloskiro péskire destenca.” Čhučé phuvjátyr giné jone dre Matana.

¹⁹ Matanatyr dro Nagaliilo, Nagaliilostyr dro Vamofo,

²⁰ Vamofostyr dro Gajo, savó sys pe Moavoskiri loščýna, pe Fasgakire-bergákiro vučipén, savó sys riskirdo mósa ke čhučí phuv.

Izrailjo Pirizorjakirdia Sigonos

²¹ I bičhadiá Izrailjo manušén ke Sigono, Amoriejengiro králi, sob (kaj) te phenén:

²² “De vólia mánge te prodžav tyrí phuv, ame na javása te zadžas pe féldy i vinagradniki, ame na javása te pjas paní tyré ĥanyngendyr, a džása kralískire dromésa, paka prodžasa tyró them.”

²³ Ne Sigono na mekciá Izrailjo te džal pir léskiro them; i skedyjá Sigono sarén péskire manušén, i vygijá pe Izrailjo pe čhučí phuv, i dogijá ke Jaaco, i mardiápe Izrailjosa.

²⁴ I domardiá les Izrailjo kurtalása, i lyjá péske léskiri phuv Arnonostyr ke Javoko (Iavoko), ke Amonitianengiro them, pal-dová so zor sys pe Amonitianengire-themeskiri miéža.

²⁵ I lyjá Izrailjo saré dalé fórja, i dživdiá Izrailjo dre saré Amonitianengire fórja, ke Jesievóno i dre saré gavá, savé sys tel léskiri zor;

²⁶ pal-dová so Jesievóno sys Sigonoskiro fóro, Amoriejéngire-kralískiro, i jov mardiápe, pervoné Moavitoskire kralísa, savó sys angíl léste, i lyjá léskire vastéstyr sarí léskiri phuv ke Arnono.

²⁷ Paldavá rakiréna manušá, savé bagana: “Džán dro Jesievóno, mek te kerén i te zorjakiren fóro Sigono”;

²⁸ pal-dová so jag vygijá Jesievonostyr, bari jag Sigonoskire foróstyr, i xaja Ar-Moávo i thagar'jen, savé rikirde Arnonoskire vučipená.

²⁹ Bida túke, Moávo! Xasiné tumé, Xamososkire manušá! Našne léskire čhavé, i léskire čhajén lyjá Amoriejengiro králi Sigono dro pliéno;

³⁰ ame domardiam len maribnytkoné bustienca (strielenca); xasijá Jesievóno ke Divono, ame čhučakirdiam (spustošyndiam) len ke Nofa, saví isyn nádur Miedievatyr.

³¹ I dživdiá Izrailjo pe Amoriejengiri phuv.

³² I bičhadiá Mójza te vydykhen Iaziero (Jaziero), i lyné gavá, savé sys tel léngiri zor, i jone tradyne krig Amoriejen, savé sys dre lénde.

Izrailjo Domardiá Ogos

³³ I risiné, i giné ke Vasáno. I vygijá pe lénde Ogo, Vasanoskiro králi, kokoró i saré léskire manušá, pe maribén ke Jedreja.

³⁴ I phendiá Raj Devél Mojzáske: “Na dar léstyr, pal-davá so Me otdáva les i saré léskire manušén i sarí léskiri phuv dre tyré vastá, i tu kerésa lésa, syr tu kerdián Sigonosa, Amoriejéngire kralísa, savó dživdiá ke Jesievóno.”

³⁵ I domardé jone les i léskire čhavén i saré léskire manušén, adiáke so nijékh na jaciápe, i zalyne léskiri phuv.