Čysly 11 - Biblija - Pe Baltitko Romani čib (Romanes) 2019

Manušá Žalinenape pal Xabén

¹ Manušá lyné dro saró šunybén te žalinenpe Ráske-Devléske; i Raj Devél šundiá, i roshačija Léskiri xolý, i zahačíia pe lénde Raskiri-Devléskiri jag, i lyjá Jov te xasiakirél stanoskiro jagóro (krajo).

² I lyné te den gódla manušá Mojzáske; i pomangdiape Mójza Ráske-Devléske, i štylyja jag.

³ I dyné lav dalé štetoske: Taviera, pal-dová so odój zahačíia pe lénde Ráskire-Devléskiri jag.

⁴ Manušá, savé javné javire rigátyr, maškír lénde lyné te lathén láska pe ĥará (pe dlúges); lénca i Izrailjoskire čhavé sys bešté i rondlé, i rakirdé: “Kon čaliakirela pherdés amen masesa?

⁵ Ame ripirasa mačhé, savé ame xajam dro Jegípto ivjá (darmes) i gurki (bobirki), i dyni, i purum, i purum-poriejo i syr' (česnoko);

⁶ a akaná di amaró našavela zor, ničí nane, jekh manna dre amaré jakhá.”

⁷ Manna sys dasaví-pac' syr koriandrytko siemjo, vidosa syr bdolaho;

⁸ manušá psirdé i skedenas la, i mielindle dre žernovy beledin ci kurde (tolkindle) dre stupa, i kerade dre kakávi (kotlo), i kerdé látyr mariklia; pir smako joj sys dasaví-pac', syr marikly jeliejosa.

⁹ I kiéli pahlyn (rosa) zdžála pe stáno ratý, tedy zdžála pe léste i manna.

¹⁰ O Mójza šundiá, so manušá rovenas dre péskire čékarja (siemieistvy), kažno (sváko) pašýl péskire šatrakire vudará; i zoralés zahačíia Ráskire-Devléskiri xolý, i smentno sys vaš Mojzáske.

¹¹ I phendiá Mójza Ráske-Devléske: “Vaš so Tu menčynesa Tyré pisharís? I sóske me na lathjom tangipén angíl Tyré jakhá, so Tu čhudián pe mánde saró adalé-manušéngiro pharipén?

¹² Naúšto me lydžavas saré adalé manušén dro miro per, i naúšto me bijandjom len, so Tu rakirésa mánge: ‘Lýdža len pe tyré vastá, syr nian'ka lydžála bijatós (tyknemases)’, pe phuv, saví Tu sovlahasa phendián te des léngire dadénge?

¹³ katýr mánge te lav mas, sob (kaj) te dav saré adalé manušénge? Pal-dová so jone rovena angíl mánde i rakiréna: ‘De aménge te xas mas.’

¹⁴ Me jekhdžinó naštý (na moginav) te lydžav sarén adalé manušén; pal-dová so jone sys pharé vaš mánge,

¹⁵ kiéli Tu adiáke kerésa mánca, tedy fedýr muliakir man, kóli me lathjom tangipén (žalima) angíl Tyré jakhá, sob (kaj) mánge te na dykháv miro xasibén.”

Eftadešá Phurydyrá

¹⁶ I phendiá Raj Devél Mojzáske: “Skéde Mánge eftadešá muršén Izrailjoskire phurydyrendyr, savén tu džinésa, so (kaj) jone isyn phurydyrá i léskire dykhibnaskire, i le len ke skedyibnáskiri šátra, sob (kaj) jone te jačen odój túsa.

¹⁷ Me zdžava, i Me javáva te rakiráv odój túsa, i Me láva Duhóstyr, savó isyn pe túte, i čhuváva Les pe lénde, sob (kaj) jone te lydžán túsa manušéngiro pharipén, a sob (kaj) tu na jekhdžinó te lydžas.

¹⁸ Manušénge phen: ‘Vyžužakirenpe ke atasiatuno dyvés, i javéna te xan mas; adiáke syr tumé rondlé angíl Ráskire-Devléskiro šunybén i rakirdé, kon čaliakirela pherdés amen masesa?’ Mištés aménge sys dro Jegípto, – tedy i déla tuménge Raj Devél mas, i tumé javéna te xan:

¹⁹ na jekh dyvés tumé javéna te xan, na duj dyvesá, na pandž dyvesá, i na deš dyvesá i na biš dyvesá,

²⁰ ne saró čhon, paka jov léla te džal tumaré nakhestyr i jačéla vaš tuménge džungaló (brydko), pal-dová so tumé bidykhne Ras-Devlés, Savó sys maškír tuménde, i rondlé angíl Léste, rakirí: “Vaš so treindiá sys aménge te vydžas Jegiptóstyr?”

²¹ I phendiá Mójza Ráske-Devléske: “Šovšelá tysjoncy sarén adalé manušén, maškír savénde i me som; a Tu rakirésa: “Me dáva lénge mas, i javéna te xan saró čhon!”

²² Ci te začhines sarén bakrén i guruvén, sob (kaj) lénge te uhtylel (te javél dósi)? Ci saré morjoskire (derjavéskire) mačhé skedénape, sob (kaj) te čaliakiren len?”

²³ I phendiá Raj Devél Mojzáske: “Naúšto Ráskire-Devléskiro vast jaciá krotko (tyknó)? Akaná tu dykhésa, ci kerélape lav Miro ke Tu, ci nad?”

²⁴ Mójza vygijá i phendiá manušénge Ráskire-Devléskire lavá, i skedyjá eftadeše muršén phurydyre manušéndyr, i čhudiá len pašýl šátra.

²⁵ I zgija Raj Devél dro óbloko, i rakirdiá lésa, i lyjá Duhóstyr (Fanostyr), Savó sys pe léste i dyjá Les eftadaše phurydyrenge. I kiéli mekciá pe lénde Dúho (Fáno), to ne jone lyné te angilphenen (te proročynen), ne korigedýr (pozže) na pirijačne.

²⁶ Duj muršá jačnépe dro stáno, jekheskiro lav sys Jeldado, a javireskiro lav sys Modado; ne pe lénde sys Dúho (Fáno), i, so jone angilphenenas dro stáno [jone sys začhindlé (zapisyndle) ne jone na giné dre šátra šatratyr jone angilphenenas dro stáno-ju.o.]

²⁷ I priprastandyja ternó manúš i rosphendiá Mojzáske, i phendiá: “Jeldado i Modado angilphenena.”

²⁸ Dro otphenybén pe davá Isúso (Johošuá), Navinoskiro čhavó, Mojzáskiro ternó pomogibnaskiro, jekh savés jov vykedyjá, phendiá: “Rajo miro, Mójza! Priphen lénge te na kerén.”

²⁹ Ne Mójza phendiá léske: “Ci na zevlynesa tu pal mánde? Ne, kóli b saré maškír Ráskire-Devléskire manušénde te javén proróki, to Raj Devél bičhavelas Péskiro Dúho (Fáno) pe lénde!”

³⁰ I risijá Mójza dro stáno, jov i Izrailjoskire phurydyrá (godephuré).

Raj Devél Bičhavéla Pieriepjolen

³¹ I ĥazdyjápe balvál Rástyr-Devléstyr, i jandiá morjostyr (derjavestyr) pieriepjolen, i rosčhurdyja len pašýl stáno (taboro (lod)), pe jekhe-dyveseskiro drom pir jekh rig i pe jekhe-dyveseskiro drom pir javír rig pašýl stáno, pe duj kuniá (lokti) vučedýr phuvjátyr.

³² I terdiné manušá, i saró dová dyvés, i sarí rat, i saró javír dyvés skedyné pieriepjolen; i kon nábut skedyjá, odová skedyjá deš xomiery; i rosčhude len vaš péske pašýl stáno.

³³ Mas sys dre léngire dandá i na sys shano, syr Ráskire-Devléskiri xolý roshačija pe manušénde, to dyjá kára Raj Devél manušénge drieván baré fransenca.

³⁴ I dyné lav dolé štetoske: Kibrot-Gataava, pal-dová so odój garadé manušén, savé sys bokhalé ke xabén.

³⁵ Kibrot-Gataavatyr giné manušá dro Asirofo i terdiné ke Asirofo.