Čysly 1 - Biblija - Pe Baltitko Romani čib (Romanes) 2019

Pérvo Piriginybén pir Izrailie

¹ I phendiá Raj Devél Mojzáske pe Sinajoskiri čhučí phuv, dre skedyibnáskiri skínija, pe pérvo dyvés javire-čhonéskiro, dro javír berš pir léngiro vygiiben Jegiptóskire phuvjátyr, rakirí:

² “Piriginen saró khetanyben (obščyna) Izrailjoskire čhavéndyr pir léngire ródy léngire čékarja (siemieistvy) [pir léngire-dadengíre kherá-ju.o.], pir lavá, kicý isyn saré muršén pir šeré.

³ Bišé beršéndyr i phuredýr, sarén, kon sys dre zor dro Izrailjo vaš maribén, pir léngire otriády piriginen len – tu i Aaróno.

⁴ Tuménca trej, sob (kaj) te javél jekh manúš te javén kažnoné rodycóstyr pir jekhe manušéste, savó dro péskire-dadéskiro ródo isyn šeraló.

⁵ I, ake, isyn muršengire lavá, savé javéna tuménca: Ruvimostyr Jelicuro, Šedeuraskiro čhavó;

⁶ Simieonostyr (Siemjonostyr) Šielumiilo, Curišadajoskiro čhavó;

⁷ Judastyr Naasóno, Aminadavóskiro čhavó;

⁸ Isaharostyr Nafanailo, Cuaroskiro čhavó;

⁹ Zavulonostyr Jeliano, Xielonoskiro čhavó;

¹⁰ Iosifóskire (Jozáskire) čhavéndyr: Jefriemostyr Jelišamo, Amiudoskiro čhavó; Manasijastyr Gamaliilo, Piedacuroskiro čhavó;

¹¹ Vieniaminostyr Avidano, Gidieonijakiro čhavó;

¹² Danostyr Ahieziero, Amišadajeskiro čhavó;

¹³ Asirostyr Pagiilo, Ohranoskiro čhavó;

¹⁴ Gadostyr Jeliasafo, Rieguilaskiro čhavó;

¹⁵ Niefalimostyr Ahiro, Jenanoskiro čhavó.”

¹⁶ Davá isyn vykedyné muršá khetanybnastyr, barydyrá péskire-dadengíre rodycendyr (čangendyr), Izrailjoskire-tysjoncengire šeralé.

¹⁷ I lyjá Mójza i Aaróno adalen muršén, savén khardé pir lav.

¹⁸ I skedyné jone saró skedyibén pe pérvo dyvés javire-čhonéskiro. I piriphendle jone péskiro bijanypnaskiro ródo, pir léngire ródy, pir léngire čékarja (siemieistvy), pir lavengiro ginybén, bišé beršéndyr i phuredýr pir šeré,

¹⁹ syr rakirdiá Raj Devél Mojzáske. I kerdiá jov lénge piriginybén pe Sinajoskiri čhučí phuv.

²⁰ I sys Ruvimóskire čhavén, savó sys Izrailjoskiro anglatunó (pérvo), pir léngire ródy, pir léngire kherítka ródy, pir léngire-dadéskire čékarja (siemieistvy), pir lavengiro ginybén, pir šeré, sarén muršén, bišé beršéndyr i phuredýr, sarén, konéste sys zor te džal pe maribén,

²¹ pirigindlo sys dre Ruvimoskiro ródyco (čang) štardešá šov tysjoncy pandžšelá.

²² Simieonoskire čhavén pir léngire ródy, pir léngire ródycy, pir léngire čékarja (siemieistvy), pir lavengiro ginybén, pir šeré, sarén muršén, bišé beršéndyr i phuredýr, sarén, kon sys dre zor te džal pe maribén,

²³ pirigindlo sys dre Simieonoskiri ródyco pandždešá jeniá tysjoncy trinšelá.

²⁴ Gadóskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

²⁵ pirigindlo sys dre Gadoskiro ródyco (čang) štardešá pandž tysjoncy šovšelá pandždešá.

²⁶ Judáskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, saré, kon sys dre zor te džal pe maribén,

²⁷ pirigindlo sys dre Judáskiro ródyco eftadešá štar tysjoncy šovšelá.

²⁸ Isaharoskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

²⁹ pirigindlo sys dre Isaharoskiro ródyco pandždešá štar tysjoncy štaršelá.

³⁰ Zavulonoskire čhavén pir léngire ródy, kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

³¹ pirigindlo sys dre Zavulonoskiro ródyco (čang) pandždešá eftá (bitrinensiro deš) tysjoncy štaršelá.

³² Iosifóskire (Jozáskire) čhavén, Jefriemóskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

³³ pirigindlo sys dre Jefriemoskiro ródyco štardešá tysjoncy pandžšelá.

³⁴ Manasijáskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

³⁵ pirigindlo sys dre Manasijáskiro ródyco (čang) trijánda duj tysjoncy dujšelá.

³⁶ Vieniaminóskire čhavén pir léngire ródy, pir léngire kherítka ródy (pliémi), pir léngiri čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

³⁷ pirigindlo sys dre Vieniaminoskiro ródyco trijánda pandž tysjoncy štaršelá.

³⁸ Danóskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

³⁹ pirigindlo sys dre Danoskiro ródyco šovdešá duj tysjoncy eftašelá.

⁴⁰ Asiroskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

⁴¹ pirigindlo sys dre Asiroskiro ródyco štardešá jekh tysjonco pandžšelá.

⁴² Niefalimoskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

⁴³ pirigindlo sys dre Niefalimoskiro ródyco (čang) pandžeša trin tysjoncy štaršelá.

⁴⁴ Ake, isyn manušá, savé zaginé dre piriginybén, savén pirigindle Mójza i Aaróno i Izrailjoskire barydyrá – dešudúj manušá, pe jekhe manušéste kheritkoné rodóstyr (pliemjostyr).

⁴⁵ I sys sarén, savé zaginé dro piriginybén, Izrailjoskire čhavén, pir léngire čékarja (sem'i (irjá)), bišé beršéndyr i phuredýr, saré, kon sys dre zor te džal pe maribén dro Izrailjo,

⁴⁶ i sys sarén, savé zaginé dro piriginybén šovšelá trin tysjoncy pandžšelá pandždešá.

⁴⁷ A Lievíty pir léngire-dadengíre stréčy (pokolienii) na sys pirigindle maškír lénde.”

⁴⁸ I phendiá Raj Devél Mojzáske dasavé lavá:

⁴⁹ “Jekh Lievijoskire ródycy na zalydža dro piriginybén, i na gin len khetané Izrailjoskire čhavénca;

⁵⁰ ne dopatia Lieviténge šátra dosykaibnása i saró, so trej vaš láke, so isyn pašýl láte; mek jone te lydžán šátra dosykaibnása i saró, so trej vaš láke, i te dynarinén (te služynen) pašýl láte, i pašýl šátra mek te čhuvén péskiro stáno;

⁵¹ i kiéli javéla trej te pirilydžas šátra, mek Lievíty te ĥazdén la; i kiéli javéla trej te čhuvén šátra, mek Lievíty te čhuvén la; a kóli poddžála vari-kon javire manušéndyr, javéla otdynó pe meribén.

⁵² Izrailjoskire čhavé isyn bangé kažno te terdjol dro péskiro stáno i kažno pašýl péskiro sciago (znamia), pir péskire otriády;

⁵³ a Lievíty sys bangé te čhuvén stáno pašýl šátra dosykaibnása, sob (kaj) te na javél xolý pe Izrailjoskire-čhavéngiro khetanyben, i javéna te terdjon Lievíty pe stréga pašýl šátra dosykaibnása.”

⁵⁴ I kerdé Izrailjoskire čhavé, syr priphendiá Raj Devél Mojzáske, adiáke jone i kerdé.