Заха́рия 7 - Библия - Пэ Балтитко Романи чиб (Романэс) 2019

Тэ Кандэ́н Дэвлэ́с Фэды́р, сыр тэ Постинэн

¹ Дро шта́рто бэрш крали́скиро Дариёскиро сыс лав Ра́скирэ-Дэвлэ́скиро кэ Заха́рия, пэ шта́рто дывэ́с еня́то (биекхэ́скиро дэ́што) чхон, Хаслево.

² Сыр Вефиль бичхадя́ Сарецерос и Регем-Мелехос и малэн пир дром (спутникэн) лэскирэн тэ мангэ́нпэ Ра́скэ-Дэвлэ́скэ анги́л муй Лэ́скиро,

³ и тэ пхучэ́н рашандыр, савэ́ сыс дрэ Кхангири́, Ра́скирэ-Дэвлэ́скири, янголэ́нгирэ-болыбнаскири и пророкэндыр, ракири́: “Ци трэй ма́нгэ тэ ровав дро па́нджто чхон и тэ рикирав посто, со мэ кэравас ужэ бут бэрш?”

⁴ И сыс кэ мэ ла́ва янголэ́нгирэ-болыбна́скиро Ра́скирэ-Дэвлэ́скиро:

⁵ “Пхэн сарэ́нгэ пхувья́кирэ манушэ́нгэ и рашангэ адя́кэ: ‘Ке́ли тумэ́ рикирэнас посто и ровэнас дро па́нджто и эфта́то чхон, и дава́ ужэ эфтадэша́ бэрш, – ци ваш Ма́нгэ тумэ́ рикирдэ посто? Ци ваш Ма́нгэ?

⁶ И ке́ли тумэ́ ха́на, и ке́ли тумэ́ пьена, ци на ваш пэ́скэ тумэ́ ха́на, ци на ваш пэ́скэ тумэ́ пьена?

⁷ Ци на ‘дасавэ́ кокорэ́ лава́ пхэнэлас Рай Дэвэ́л англэды́р пирда́л ґаратунэ́ пророкэ́ндэ, сыр дро Ерусалимо сыс ишчо (инкэ́) бут мануша́ и покойныма, и дрэ пашылатунэ фо́рья, дрэ паш-дывэсы́тко (южно) риг и пэ Тэлатуны Пхув дживэ́нас бут мануша́?’”

⁸ И сыс лав Ра́скирэ-Дэвлэ́скиро кэ Заха́рия:

⁹ “Адя́кэ ракирэ́лас Рай Дэвэ́л янголэ́нгирэ-болыбна́скиро: ‘Кэрэ́н сэ́ндо чачипнытко и сыкавэ́н ла́ска и (жалима) кажно ваш пэ́скирэ пшалэ́скэ;

¹⁰ Пивле́н (удовэн), пиротэ́н (сиротэн), чужонэс и чорорэс тэ на притасавэн и тэ на рикирэ́н холы́ екх пэ явирэ́стэ дро ило́ тумаро́.”

¹¹ Нэ ёнэ на камлэ́ тэ кандэ́н, отрисинэ Ма́ндыр, и кана́ пэ́скирэ оттырдынэ, соб (кай) тэ на шунэ́н.

¹² И ило́ пэ́скиро закэрдэ барэса, соб (кай) тэ на шунэ́н Зако́но и лава́, савэ́ бичхавэлас янголэ́нгирэ-болыбна́скиро Рай Дэвэ́л, Духо́са Пэскирэса пирда́л ґаратунэ́ пророкэ́ндэ; ваш дова́ и дорэсця́ лэн бари холы́ янголэ́нгирэ-болыбна́скирэ Ра́стыр-Дэвлэ́стыр.

¹³ И сыс: сыр Ёв обрисёлас, а ёнэ на шунэнас, адя́кэ и ёнэ обрисёнас, а Мэ на шунавас,” – ракирэ́ла янголэ́нгирэ-болыбна́скиро Рай-Дэвэ́л.

¹⁴ И Мэ росчхурдыём лэн рискирибна́скирэ балваляса пир сарэ́ манушэ́ндэ, савэ́н ёнэ на джиндлэ́. И дая́ пхув чхучия би лэ́нгиро, со нико́н на псирдя́ пирда́л ла́тэ ни англэ, ни палэ, и ёнэ кэрдэ́ далэ́ бахталэ́ рига́тыр чхучи́ пхув.”