Заха́рия 5 - Библия - Пэ Балтитко Романи чиб (Романэс) 2019

Дыкхибэ́н пал Вурняибнытко Сви́тко

¹ И нэвэ́стыр (нэвэ́с) газдыём мэ якха́ мирэ́ и дыкцём: акэ, вурняла сви́тко (скрэнцлы папира).

² И пхэндя́ ёв ма́нгэ: “Со дыкхэ́са ту?” Мэ отпхэнавас: “Мэ дыкха́ва сви́тко, саво́ вурняла; длэнгипэ́н лэ́скиро исын биш куня́ (логци), буґлыпэ́н лэ́скиро исын дэш куня́.”

³ Ёв пхэндя́ ма́нгэ: “Дава́ исын прокошыбэ́н (арман), саво́ ячэ́ла пэ риг сарэ́ пхувья́кири; пал-дова́ кажно (сва́ко), кон чорэла, явэ́ла хасякирдо, сыр исын чхиндло́ пэ екх риг, и кажно, кон дэ́ла хоханы совэ́л, хасякирдо явэ́ла, сыр исын чхиндло́ пэ яви́р риг.”

⁴ ‘Мэ залыджиём лэс’, – ракирэ́ла янголэ́нгирэ-болыбна́скиро, Рай Дэвэ́л, – и дава́ явэ́ла дро чорэскиро кхэр и дро кхэр одолэскиро, кон дэ́ла хоханы совэ́л Мирэ́ лавэ́са и ячэ́ла дро кхэр лэ́скиро и хасякирла лэс, и кашта́ лэ́скирэ, и бара́ лэ́скирэ.

Дыкхибэ́н пал Джувля́тэ дрэ Эфа

⁵ И выгия́ Янго́ло, саво́ ракирдя́ ма́нца, и пхэндя́ ма́нгэ: “Ѓаздэ ишчо (инкэ́) якха́ тырэ́ и дыкх, со да выджа́ла?”

⁶ Ке́ли жэ мэ пхэндём: “Со дава́ исын? Ёв отпхэнэ́лас: “Дава́ выджа́ла эфа (кхудо), и пхэндя́: “Дава́ исын патри́н (о́бразо) лэ́нгиро пир сари́ пхув.”

⁷ И акэ, котэ́р молови (свинцо) ґаздыя́пэ, и одо́й исыс бэшты екх джувлы́ машки́р эфа.

⁸ И пхэндя́ ёв: “Адая джувлы́ – кокоро́ бипатывалыпэн”, и чхурдыя́ ла дрэ эфа машкира́л, нэ пэ отверстиё (пэ кула) ла́кири чхурдыя́ котэ́р моловано́ (свинцово).

⁹ И газдыём мэ якха́ мирэ́, и задыкхцём: акэ, явнэ́ дуй джувля́, балва́л пхурдэлас дрэ лэ́нгирэ пхака́ (крылы), и пхака́ лэ́ндэ – сыр пхака́ боц(т)яноскирэ; и ґаздынэ́ ёнэ эфа и лыджинэ́ ла машки́р пхув и болыбэ́н.

¹⁰ И пхэндём мэ Янголоскэ, саво́ ракирдя́ ма́нца: “Кай лыджа́на ёнэ дая́ эфа?”

¹¹ Тэ́ньци пхэндя́ ёв ма́нгэ: “Соб (кай) тэ кэрэ́н ваш ла́кэ кхэр пэ пхув Сэнаар, и, ке́ли саро́ явэ́ла кэрдо́, тэды ёй чхувэ́лапэ одо́й пэ пэ́скиро фунда́менто.”