Заха́рия 4 - Библия - Пэ Балтитко Романи чиб (Романэс) 2019

Дыкхибэ́н пал Момолытко (Светильнико) и пал Маслины

¹ И рисия́ дова́ Янго́ло, саво́ ракирдя́ ма́нца, и джангадя ман, сыр джангавэна манушэ́с соибнастыр лэскирэстыр.

² И пхэндя́ ёв ма́нгэ: “Со ту дыкхэ́са?” И отпхэнавас мэ: дыкха́ва момолы́тко (свети́льнико) саро́ сувнака́стыр и тахтаёро (чашэчка) ваш маслинитко дзэт упра́л лэ́стэ, и эфта́ момолэнгирэ (лампады) пэ лэ́стэ, и пэ эфта́ трубкицы кэ момолэнгирэ, савэ́ исын упра́л лэ́стэ;

³ И дуй маслинки пэ лэ́стэ, екх пэ чачи́ риг тахтаёрэстыр, яви́р пэ зэ́рво (ле́во) риг лэ́скири.

⁴ И отпхэнавас мэ и пхэндём Янголоскэ, саво́ ракирдя́ ма́нца: “Со дава́ исын, Раё миро?”

⁵ Тэ́ньци Янго́ло, саво́ ракирдя́ ма́нца, отпхэнэ́лас и пхэндя́ ма́нгэ: “Ци ту на джинэ́са, со дава́ исын?” И пхэндём мэ: “На джино́м, Раё миро.”

⁶ Тэды отпхэнэ́лас ёв и пхэндя́ ма́нгэ: “Адя́кэ: дава́ исын лав Ра́скирэ-Дэвлэ́скиро кэ Зоровавелё, саво́ ракирэ́ла: ‘На муршыпнаса и на зорья́са, нэ Духо́са Мирэса’”, – ракирэ́ла янголэ́нгирэ-болыбна́скиро, Рай Дэвэ́л.

⁷ “Кон сан ту, бари бэ́рга анги́л Зоровавелёстэ! Ту сан плоско пхув (лошчы́на), и вылыджала ёв вэнглытко бар, и сарэ́ задэна го́дла: ‘Бахталыпэ́н, бахталыпэ́н пэ лэ́стэ!”

⁸ И сыс кэ мэ лав Ра́скирэ-Дэвлэ́скиро, пхэны:

⁹ “Зоровавелёскирэ васта́ кэрдэ́ фунда́менто далэ́ Кхэрэ́скэ (Кхангирьякэ); лэ́скирэ васта́ и кончинэна лэс, тэды ту доджинэсапэ, со янголэ́нгирэ-болыбна́скиро, Рай Дэвэ́л, бичхадя́ Ман кэ тумэ́.

¹⁰ Пал-дова́ со, кон могинэ́ла тэ думинэл; со дывэ́с дава́ исын на древа́н важно, ке́ли дасавэ́ радыма́са дыкхэ́на пэ уровнё дрэ васта́ Зоровавелёскирэ, одолэ́ эфта́ (битринэ́нгиро дэш), дава́ исын якха́ Ра́скирэ-Дэвлэ́скирэ, савэ́ обухтылэна дыкхибнаса сари́ пхув?’”

¹¹ Тэды отпхэнавас мэ и пхэндём лэ́скэ: “Со сыкавэ́на долэ́ дуй маслинки пэ чачи́ риг шандалоскири и пэ зэ́рво риг лэ́скири?”

¹² Яви́р мо́ло лыём мэ тэ ракира́в и пхэндём лэ́скэ: “Со сыкавэ́на дуй маслинитка рандя́ (вэ́тки), савэ́ пирда́л дуй сувнакунэ́ трубкицы чхувэ́на пэ́стыр сувнака́й?”.

¹³ И пхэндя́ ёв ма́нгэ: “Ци ту на джинэ́са, со дава́ исын? Мэ отпхэнавас: “Мэ на джино́м, Раё миро.”

¹⁴ И пхэндя́ ёв: “Дава́ исын дуйджинэ́ мануша́, савэ́н макхнэ маслинитконэ дзэтэса, и савэ́ исын отпхэныбнаскирэ анги́л сарэ́-пхувья́кирэ Растэ-Дэвлэ́стэ.”