Заха́рия 3 - Библия - Пэ Балтитко Романи чиб (Романэс) 2019

Дыкхибэ́н пал Барэ́ Рашастэ

¹ И сыкадя́ ёв ма́нгэ Исусо́с (Ёхошуа́с/Ешуа́с), барэ́ раша́с, саво́ исыс тэрдо́ анги́л Янголостэ Ра́скирэ-Дэвлэскирэстэ, и налачхэ́с (сатанас), саво́ сыс тэрдо́ пэ лэ́скиро чачо́ (право) васт, соб (кай) тэ кэрэ́л саро́ проти Лэ́стэ.

² И пхэндя́ Дэвэ́л налачхэскэ: “Рай Дэвэ́л, мэк тэ на домэкэл тут, на́лачхо, Саво́ выкэдыя́ Ерусалимо! Ёв раша́й исын гломня (голомня), вылыны́ яга́тыр?”

³ Ису́со жэ сыс уридо́ дрэ мэлякирдэ и́ди и сыс тэрдо́ анги́л Янголостэ,

⁴ Саво́ отпхэнэ́лас и пхэндя́ одолэ́нгэ, кон сыс тэрдо́ анги́л лэ́стэ, адя́кэ: “Злэн Лэ́стыр мэлякирдэ и́ди”; нэ Лэ́скэ кокорэскэ пхэндя́: “Дыкх! Мэ злыём ту́тыр чорипэ́н Тыро́, и урьякирав тут дрэ и́ди свэнки́тка.

⁵ И Мэ пхэндём: “Чхувэ́н по шэро́ лэ́скиро жужо́ кидаро.” И ёнэ чхудэ́ жужо́ кидаро по шэро́ лэ́скиро и урьякирдэ лэс дрэ и́ди. Янго́ло жэ Дэвлэ́скиро сыс тэрдо́.

Рандзь (Вэтка), Сави́ Отбарьёла

⁶ И лыя́ тэ бунтуинэл Янго́ло Ра́скирэ-Дэвлэ́скиро и пхэндя́ Исусо́скэ:

⁷ “Адя́кэ ракирэ́ла янголэ́нгирэ-болыбна́скиро Рай Дэвэ́л: ‘Ко́ли лэ́са тэ псирэ́с пир Мирэ́ дрома́ и ко́ли ту явэ́са пэ стрэ́га Мири́, тэды ту лэ́са тэ сэндинэс Кхэр Миро, и тэ дыкхэ́с палэ Мирэ́ грэды (дворы). Мэ да́ва во́ля ту́кэ тэ псирэ́с машки́р одолэ́ндэ, савэ́ исын тэрдэ́ ада́й.

⁸ Вышу́н, Ису́се, баро́ раша́й, ту и кхардэ́ пша́ла тырэ́, савэ́ бэшэна анги́л ту́тэ, мурша́, савэ́ исын славутна: акэ, Мэ лыджа́ва дынари́с Мирэс, отбарьякирибэн.

⁹ Пал-дова́ со акэ, дова́ бар, саво́ Мэ чхува́ва анги́л Исусо́стэ; пэ дава́ екх бар исын эфта́ (битринэ́нгиро дэш) якха́; акэ, Мэ вычхинава пэ лэ́стэ лэ́скирэ чхиныбна, – ракирэ́ла янголэ́нгирэ-болыбна́скирэ, Рай Дэвэ́л, и Мэ кхосава криг адалэ́ – пхувья́киро грэ́хо дро екх дывэ́с.

¹⁰ Дро дова́ дывэ́с, – ракирэ́ла янголэ́нгирэ-болыбна́скирэ Рай Дэвэ́л, – лэ́на екх явирэ́с тэ кхарэ́н тэл винаградо (дракх) и тэл инжыро.