Юдэ́нгэ 9 - Библия - Пэ Балтитко Романи чиб (Романэс) 2019

Сыр тэ Мангэ́нпэ Дэвлэ́скэ пэ Пхув и дро Болыбна́скиро Раё

¹ Дро пэ́рво завето сыс пхэндло́, сыр трэиндя́ тэ мангэ́лпэ Дэвлэ́скэ, и пал свэ́нто штэ́то, саво́ кэрэ́лас ману́ш пэ дая́ пхув.

² Сыс чхуды́ Свэ́нто Ша́тра: дрэ пэ́рво паш сыс момолы́тко (свети́льнико) и сками́нд свэнцононэ́ марэ́са, дава́ штэ́то кхардяпэ Свэ́нто Штэ́то.

³ Пал яви́р шы́рма сыс яви́р паш дрэ Свэ́нто Ша́тра, дава́ штэ́то кхардяпэ Най Свэнтэдыр Штэ́то.

⁴ Одо́й сыс сувнакуно́ алта́рё, кай хачкирэнас лачхэ́-кхандыпна́скири смо́ла, и Ковчэго́скиро Мохто́/Мохтэ́н (Яшчыко) завето́са, саво́ сыс обчхудо сувнака́са сарэ́ ригэ́ндыр. Дро дава́ Свэ́нто Мохто́ сыс сувнакуно́ чаро́ маннаса, Ароноскиро дэсто́, саво́ вылениндя. И сыс одо́й адя́кэ-паць барунэ́ таблицы, кай сыс вычингирдэ заветоскирэ припхэныбэна́.

⁵ А упра́л пэ Ковчэго́скиро Мохто́ сыс тэрдэ́ слава́кирэ херувимы. Ёнэ зачхакирэнас пэ́скирэ пхакэнца штэ́то, кай грэ́хи отмэкэнаспэ; нэ какана́ нанэ дова́ часо тэ ракирас буты́р пал дава́.

⁶ Дава́ адя́кэ саро́ сыс счхудо: рашая́ кажно мо́ло заджанас дрэ пэ́рво Свэ́нто Ша́тра тэ мангэ́нпэ Дэвлэ́скэ, сыр трэиндя́ буты́ пир Зако́но,

⁷ а дрэ яви́р Свэ́нто Ша́тра, сави́ сыс андра́л, заджалас екх Англатуно́ Раша́й, е́кхвар дро бэрш, ратэ́са и свэнтонэ́ дыибнаса пал манушэ́нгирэ грэ́хи, савэ́ ёнэ кэрдэ́ пир пэ́скиро наджиныбэн.

⁸ Свэ́нто Ду́хо (Фа́но) сыкавэ́ла далэ́са, со пака исын пэ́рво Свэ́нто Ша́тра, дром нанэ отчхакирдо дро Най Свэнтэдыр Штэ́то;

⁹ кадая́ пэ́рво Свэ́нто Ша́тра исын сы́рбы приме́ро (сыкаибэ́н), со кэрэ́лапэ дро амаро́ часо, дро саво́ янэ́на да́ры, и свэ́нта дыибэна́, савэ́ на могинэ́на тэ кэрэ́н бидошакирэса кодолэ́с, кон мангэлапэ Дэвлэ́скэ, сыр трэй пир Зако́но,

¹⁰ пал-дова́ со ёнэ отлыджанаспэ кэ упхэныбэна́, со сашты́ тэ хас, и со тэ пьес, сыр со тэ морэс (тэ халавэс), кэ амари́ лоч (плоть), лэ́ндэ исын зор кэ/ жы́ко дава́ часо, пака Дэвэ́л кэрэ́ла нэво́ ладо (порядко).

¹¹ Нэ Христо́со явдя́, сыр Англатуно́ Раша́й ваш лачхипэ́н, саво́ явэ́ла анги́л барыдыршонэ и фэдыдыршонэ шатраса, сави́ кэрдэ́ на манушэ́нгирэ васта́, и сави́ нанэ далэ́ свэтоскири, со исын кэрдо́,

¹² и на бузнэ́нгирэ (козлэнгирэ) и целянтэ́нгирэ ратэ́са, а Пэ́скирэ ратэ́са Ёв загия́ е́кхвар дро Най Свэнтэдыр Штэ́то, и дорэсця́ ве́чно выкиныбэ́н пал амарэ́ грэ́хи.

¹³ Пал-дова́ со, ко́ли бузнэ́нгиро ци целянтэ́нгиро рат и тэрнэ́-рэца́кири (тёлкакири) пра́ска (пепло), со кропинэлапэ пэ манушэ́ндэ, савэ́ исын нажужо тэ клонинэнпэ патыва́са Дэвлэ́скэ, кэрэ́ла жужа́са (чыстонаса) лэ́нгири лоч,

¹⁴ то ци пэ бут бутэды́р выжужакирэ́ла амэн Христосо́скиро рат, Саво́ пир ве́чно Ду́хо (Фа́но) яндя́ Пэс бидоша́кирэс, соб (кай) тэ выжужакирэл амари́ паты́в мулэ́ рэндэ́ндыр тэ дынарина́с джидэ́ Дэвлэ́скэ?

¹⁵ И палдава́ Христо́со яндя́ Нэво́ Завето, соб (кай) одолэ́ мануша́, савэ́н Дэвэ́л кхардя кэ Пэ прикхардя, могиндлэ́ тэ дорэсэн ве́чно штэ́то дро Болыбна́скиро Раё, пал со Ёв и дыя́ лав. Лэ́скиро мэрибэ́н исын сы́рбы выкиныбэ́н пал грэ́хи, савэ́ кэрдэ́ мануша́, ке́ли пхурано́ завето рикирдя зор.

¹⁶ Ко́ли исын завето, саво́ ману́ш ячкирэ́ла явирэ́нгэ пало́ (после) пэ́скиро мэрибэ́н, трэй тэ допхэнэн, со кодова́ ману́ш мыя́.

¹⁷ Пал-дова́ со завето фэ́ни явэ́ла тэ рикирэ́л зор пало́ (после) мэрибэ́н, и дава́ завето нисо́ нанэ мол, пака исын джидо́ ману́ш, саво́ счхудя лэс.

¹⁸ Адя́кэ-паць и пэ́рво завето на прилыя́ зор би ратэ́скиро.

¹⁹ И палдава́, ке́ли Мо́йза пхэндя́ сарэ́ припхэныбэна́ Законо́стыр сарэ́ манушэ́нгэ, ёв лыя́ целянтэнгирэ и бузнэнгиро (козлэнгиро) рат пане́са, лолэ́ балэнца и исопоскирэ ранденца, и кропиндя лэ́нца сыр кокори лылвари́-сви́тко, адя́кэ-паць и сарэ́ манушэ́н.

²⁰ И пхэндя́: “Дава́ исын рат завето́скиро, кэ саво́ Дэвэ́л припхэндя́ тумэ́нгэ тэ рикирэнпэ.”

²¹ И адя́кэ-паць ёв кропиндя ратэ́са и ша́тра и сарэ́ кхорэ́ (сосуды), со трэй тэ лэн, ке́ли мангэ́напэ Дэвлэ́скэ.

²² И на́бут со на саро́ жужакирэлапэ грэхостыр ратэ́са, и би ратэскиро прочхуибэн на отмэкэлапэ грэ́хо.

Христосо́скиро Свэ́нто Дыибэ́н Отмэкэ́ла Грэ́хи

²³ Трэиндя́, соб (кай) дова́, со сыс создыно́ пэ пхув пир болыбна́скири патри́н (о́бразо), адя́кэ тэ жужакирэлпэ, а дова́, со исын Болыбна́скиро чачунэ́с, трэбинэла фэды́р свэ́нта дыибэна́, сыр кодолэ́.

²⁴ Пал-дова́ со Христо́со загия́ на дрэ Свэ́нто Штэ́то, саво́ кэрдэ́ манушэ́нгирэ васта́, и саво́ исын патри́н (копия) долэ́ Штэтоскиро, со исын дро Болыбна́скиро Раё. Ёв загия́ дро Болыбна́скиро Раё, соб (кай) тэ тэрдёл пал амэ́ндэ анги́л Дэвлэ́стэ:

²⁵ на ваш дова́, соб (кай) тэ янэл Пэс бут мо́лы, сыр Юдэ́нгиро англатуно́ раша́й заджа́ла дро Най Свэнтэдыр Штэ́то на пэ́скирэ ратэ́са;

²⁶ тэды Христосо́скэ трэиндя́ тэ мэнчынэлпэ кажно мо́ло, сыр свэ́то сыс создыно́. Нэ какана́, е́кхвар пэ векоскиро ко́нцо (яго́ро), Ёв сыкадя́ Пэс и отдыя́ Пэс сыр свэ́нто дыибэ́н, соб (кай) тэ отпарувэл грэ́хи.

²⁷ И сыр ужакирэ́ла манушэ́с е́кхвар тэ мэрэ́л, а пало́ дава́ сэ́ндо;

²⁸ адя́кэ-паць и Христо́со сыс е́кхвар яндло сыр свэ́нто дыибэ́н пал бутэ́-манушэ́нгирэ грэ́хи. Нэ Ёв явэ́ла яви́р мо́ло кэ одолэ́, савэ́ древа́н ужакирэ́на Лэс тэ зракхэ́л лэн, нэ на ваш дова́, соб (кай) тэ отмэкэ́л грэ́хи.