Юдэ́нгэ 8 - Библия - Пэ Балтитко Романи чиб (Романэс) 2019

Ису́со исын Амаро́ Англатуно́ Раша́й

¹ Гла́вныма исын дро дова́, пал со амэ ракираса, исын дасави́: амэ́ндэ исын адасаво́ Англатуно́ Раша́й, Саво́ исын бэшто́ пэ болыбэ́н пир чачо́ васт Дэвлэ́скирэ най вычэдырэ́скирэ троностыр;

² Ёв исын Раша́й пэ Свэ́нто Штэ́то, сави́ исын чачуны́ ша́тра тэ мангэ́нпэ Дэвлэ́скэ, сави́ счхудя кхэтанэ́ Дэвэ́л, а на мануша́.

³ Кажно раша́й исын чхудо ваш дова́, соб (кай) тэ янэл свэ́нто дыибэ́н и да́ро, пал-дова́ со трэиндя́, соб (кай) и кадалэ́ Рашастэ тэ явэ́л вари-со тэ янэл.

⁴ Ко́ли Христо́со тэ ячэласпэ тэ дживэ́л пэ пхув, Ёв на явэ́лас Раша́са, пал-дова́ со исын ада́й кадасавэ́ рашая́, савэ́ ишчо (инкэ́) янэ́на свэ́нта дыибэна́ пир Мойза́скиро Зако́но;

⁵ савэ́ кэрэ́на Дэвлэ́скири буты́ пир патри́н (о́бразо) и сы́рбы пир зэр (тенё), савэ́ исын чачунэ́с дро Болыбна́скиро Раё. Ке́ли Мо́йза лыя́ тэ кончынэл буты́ пэ ша́тра, то Дэвэ́л пхэндя́ лэ́скэ: “Дыкх, кэр саро́, соб (кай) тэ явэ́л дасаво-паць, сыр сыс сыкадо ту́кэ пэ бэ́рга.”

⁶ Нэ какана́ Христо́со дорэсця́ фэдэды́р буты́ сыр Англатуно́ Раша́й, сави́ исын пэ бут фэдэды́р кадалэ́-раша́нгирэ бутя́тыр, адя́кэ-паць, сыр фэды́р исын и Завето, саво́ Ёв пиридыя Дэвлэ́стыр манушэ́нгэ, сыр Машкиратуно, пал-дова́ со дро Завето исын фэды́р дынэ́ дава́.

⁷ Ко́ли тэ явэ́л пэ́рво завето бидошакиро, тэды на трэиндя́ тэ родэ́н штэ́то ваш яви́р.

⁸ Нэ Дэвэ́л бангякирэла Пэ́скирэ манушэ́н, ке́ли Ёв ракирэ́ла пир пророкостэ: “Ѓа́да, явэ́на дывэса́”, – ракирэ́ла Дэвэ́л, – “ке́ли Мэ кэра́ва Нэво́ Завето Израилёскирэ и Юда́скирэ манушэ́нца;

⁹ нэ нанэ дасаво завето, саво́ Мэ кэрдём лэ́нгирэ дадэ́нца дро дова́ часо, ке́ли Мэ лыём пал васт лэн, соб (кай) тэ вылыджав Египто́скирэ пхувья́тыр. Ёнэ на ячнэ́пэ зоралэ́ дро патяибэ́н и Мэ на прилыём илэ́са лэн.

¹⁰ Адава́ исын Завето, саво́ Мэ кэра́ва пэ далэ́ дывэса́ Израилёскирэ манушэ́нца, – ракирэ́ла Дэвэ́л. ‘Мэ пиридава Мирэ́ Зако́ны дрэ лэ́нгири годы́ и Мэ чхина́ва лэн пэ лэ́нгирэ илэ, и Мэ ява́ва лэ́нгиро Дэвэ́л, а ёнэ явэ́на Мирэ́ мануша́.

¹¹ И нико́н на явэ́ла буты́р тэ сыклякирэ́л явирэ́с и пшал на явэ́ла тэ сыклякирэ́л пшалэ́с и тэ ракирэ́л лэ́скэ: “Уджин Дэвлэ́с”, пал-дова́ со сарэ́ мануша́ тыкнэндыр кэ барэ́, явэ́на тэ джинэ́н Ман.

¹² Пал-дова́ со Мэ примангава лэ́нгэ дова́, со ёнэ сыс проти Зако́но, палдава́ Мэ ние́кхвар на пририпирава буты́р лэ́нгэ.”

¹³ Дэвэ́л ракирэ́лас дова́ пал Нэво́ Завето, пир дава́ Ёв приґалыя со пэ́рво завето исын пхурано́. А дова́, со исын пхурано́ и нанэ кэ джиибэ́н, сы́гэс отпарувэлапэ.