Юдэ́нгэ 4 - Библия - Пэ Балтитко Романи чиб (Романэс) 2019

Лав пал Штэ́то тэ Откхинён

¹ Палдава́, пака пхэндло́ лав амэ́нгэ тэ заджа́н пэ доя́ пхув тэ откхинён Лэ́са, на хасия́, тэды ява́са тэ ракхаспэ, соб (кай) тэ на явэ́л адя́кэ, со вари-кон явдя́ древа́н кори́г (по́знэс).

² Бахталы́ зан (звесь) сыс пхэндлы амэ́нгэ, адя́кэ-паць сыр и лэ́нгэ, нэ лэ́нгэ доя́ зан, сави́ ёнэ шундлэ́, на яндя́ ни саво́ лачхипэ́н, пал-дова́ со ёнэ на прилынэ́ дава́ пхэныбэ́н патяибна́са.

³ Нэ амэ, савэ́ патя́са, заджаса пэ доя́ пхув тэ откхинёвас Лэ́са, адя́кэ, сыр Дэвэ́л пхэндя́: “Мэ совлахадём дрэ Мири́ холы́: “Ёнэ ние́кхвар на заджа́на тэ откхинён Ма́нца’”, на дыкхи́ пэ дова́, со Лэ́скирэ бутя́ сыс сарэ́ кэрдэ́ анги́л дова́, сыр Ёв создыя́ свэ́то.

⁴ Палдава́ Дэвэ́л пхэндя́ вари-катэ дро Свэ́нто Чхиныбэ́н пал эфта́то (битринэ́нгиро дэ́што) дывэ́с адя́кэ: “И откхиныя Дэвэ́л пэ эфта́то дывэ́с сарэ́ Пэ́скирэ бутендыр”:

⁵ и нэвэ́стыр исын пхэндло́: “Ёнэ ние́кхвар на заджа́на тэ откхинён Ма́нца.”

⁶ Нэ Дэвлэ́скиро лав, саво́ Ёв дыя́, ячэ́лапэ, и вари-савэ́ мануша́ заджа́на тэ откхинён Лэ́са; а кодолэ́, савэ́нгэ сыс пхэндло́ лав пал Христосо́стэ, на заджа́на, пал-дова́ со ёнэ на кандынэ́, со пхэндя́ Дэвэ́л,

⁷ и Ёв выкэдэ́ла нэво́ дывэ́с, саво́ Ёв кхардя́ “ададывэ́с.” Пало́ (после) дова́, сыр прогия́ (накхця) бут бэрш, Дэвэ́л пхэндя́ Давидо́скирэ уштэ́нца адя́кэ, сыр Ёв ракирдя́ ґарэдыр: “Ададывэ́с, ке́ли тумэ́ шунэ́на Лэ́скири зан (глос), на пхарьякирэн пэ́скирэ илэ.”

⁸ Палдава́, ко́ли Ису́со-Навино дэ́лас Дэвлэ́скирэ манушэ́нгэ тэ откхинён Дэвлэ́са, тэды Дэвэ́л на ракирэ́лас коригэды́р (позжэды́р) пал яви́р дывэ́с.

⁹ Палдава́ са́вато (субо́та) ячэ́лапэ ваш Дэвлэ́скирэ манушэ́нгэ тэ откхинён.

¹⁰ Ко́ли вари-кон заджа́ла тэ откхинёл Лэ́са, ёв адя́кэ-паць откхинёла пэ́скирэ бутя́тыр, сыр Дэвэ́л откхиныя Пэ́скирэ бутя́тыр.

¹¹ И палдава́ ява́са амэ тэ причхувас зор тэ кэра́с буты́р, соб (кай) амэ́нгэ тэ заджас тэ откхинёвас Лэ́са, соб (кай) пир дова́-паць приме́ро (сыкаибэ́н) амэ тэ на пэрас, сыр одолэ́ мануша́, савэ́ на кандынэ́.

¹² Дэвлэ́скиро лав исын джидо́ и пхэрдо́ зорья́са, вострэдыр (чолалэды́р) любонэ куртала́тыр, сави́ чхинэла пэ дуй рига́, Дэвлэ́скиро лав заджа́ла хор машки́р ило́ и ду́хо (фа́но), машки́р кокалы́ и трушу́л, кай исын думо, и сэндинэла манушэ́нгирэ рэ́нды и мысли пэ ило́.

¹³ Нисо́ дро свэ́то, со Дэвэ́л создыя́, нанэ ґарадо Дэвлэ́стыр; нэ саро́ исын нанго и бицяло́ анги́л Лэ́скирэ якха́, анги́л Конэ́стэ амэ ява́са тэ отпхэнас пал саро́.

Ису́со исын Най Барэды́р Раша́й

¹⁴ Пал-дова́ со амэ́ндэ исын са́мо барэды́р Англатуно́ Раша́й Ису́со, Дэвлэ́скиро Чхаво́, Саво́ прогия́ болыбэ́н кэ Дэвэ́л, амэ ява́са тэ рикираспэ зоралэ́с пал амаро́ патяибэ́н.

¹⁵ Амэ́ндэ исын на адасаво́ англатуно́ раша́й, саво́ на могинэ́ла тэ помогинэл (тэ подэл васт) амэ́нгэ дро амаро́ бизорьякирибэн, нэ Адасаво́ Англатуно́ Раша́й, Саво́ сыс пропатякирдо дро саро́, нэ сыр и амэ, нэ Саво́ на кэрдя́ грэ́хо.

¹⁶ Палдава́ амэ ява́са тэ джас пашылэды́р муршыпнаса кэ Дэвлэ́скиро троно, Кон дэ́ла бахталыпэ́н, соб (кай) тэ дорэсас тангипэ́н и бахталыпэ́н тэ помогинас (тэ подас васт) екх екхэ́скэ.