Юдэ́нгэ 3 - Библия - Пэ Балтитко Романи чиб (Романэс) 2019

Ису́со исын Барэды́р Мойза́стыр

¹ Палдава́, пшала́лэ свэ́нта, савэ́н Дэвэ́л адя́кэ-паць прикхардя, дыкхэ́н пэ Исусо́стэ, Савэс Дэвэ́л бичхадя́ тэ явэ́л англатунэ́ Раша́са пир амаро́ патяибэ́н,

² Саво́ исын патяибны́тко Одолэ́скэ, Кон чхудя́ Лэс пэ дая́ буты́, сыр и Мо́йза адя́кэ-паць пир саро́ Дэвлэ́скиро Кхэр.

³ Пал-дова́ со Лэ́стэ сыс барэды́р сла́ва, сыр Мойзастэ, адя́кэ-паць сыр манушэ́стэ, саво́ чхудя́ кхэр, кутякирэна (дэ́на паты́в) буты́р, сыр кокоро́ кхэр.

⁴ Пал-дова́ со кажно кхэр вари-саво́ ману́ш чхувэ́ла, а Кодова́, Кон чхудя́ саро́, исын Дэвэ́л.

⁵ И Мо́йза сыс чачуно́ дына́ри пир саро́ Дэвлэ́скиро Кхэр ваш допхэныбэ́н пал дова́, со трэй тэ явэ́л анги́л;

⁶ а Христо́со сыр Дэвлэ́скиро Чхаво́, сыс Хула́й пир Лэ́скиро кхэр; амэ сам кокорэ́ мануша́ Лэ́скирэ кхэрэ́скирэ, ко́ли зорало́ патяибэ́н и наде́я, савья́са амэ шарасапэ, явэ́ла амэ́ндэ кэ ко́нцо (кэ яго́ро).

Откхиныбэ́н ваш Дэвлэ́скирэ Манушэ́ндэ

⁷ Палдава́ Свэ́нто Ду́хо (Фа́но) ракирэ́ла: “Ко́ли ададывэ́с тумэ́ шунэ́на Лэ́скири зан,

⁸ на отрискирэн пэ́скиро ило́, сыр да тумэ́ ґаздынэ́пэ пэ Дэвлэ́стэ, ке́ли тумэ́ са́нас пэ чхучи́ пхув;

⁹ кай тумарэ́ дада́ пропатякирэнас Ман, мэк ёнэ и дыкхнэ́, со Мэ кэрдём штардэша́ бэрш.

¹⁰ Палдава́ Мэ и холясыём пэ адалэ́ манушэ́ндэ и пхэндём: ‘Саро́ часо ёнэ хохавэна пэс дро пэ́скиро ило́, и ёнэ на джинэ́на Миро дром’;

¹¹ палдава́ Мэ совлахадём дрэ холы́: ‘Ёнэ ние́кхвар на заджа́на дро Миро штэ́то тэ откхинён Ма́нца’.

¹² Пшала́лэ, дыкхэ́н, соб (кай) тэ на явэ́л пхутькирдо ило́ ни дрэ конэ́стэ тумэ́ндыр, саво́ на кандэ́ла Дэвлэ́с, соб (кай) тумэ́ тэ на отджан джидэ́ Дэвлэ́стыр.

¹³ А подрикирэн екх екхэ́с со дывэ́с кэ/жы́ко дова́ часо, пака сашты́ тэ ракирэ́с “ададывэ́с”, соб (кай) грэ́хо тэ на хохавэ́л тумэн и тэ на отрискирэл тумаро́ ило́.

¹⁴ Пал-дова́ со амэ ячасапэ кхэтанэ́ Христосо́са, ко́ли зракхаса дова́ зорало́ патяибэ́н кэ ко́нцо (кэ яго́ро), со амэ́ндэ сыс англэды́р.

¹⁵ Палдава́ исын пхэндло́: “Ко́ли тумэ́ ададывэ́с шунэ́на Лэ́скири зан, на отрискирэн пэ́скиро ило́, сыр тумарэ́ дада́ дава́ кэрдэ́, ке́ли ґаздынэ́пэ пэ Дэвлэ́стэ”;

¹⁶ кон сыс одолэ́ мануша́, со, ке́ли шундлэ́, ґаздынэ́пэ пэ Дэвлэ́стэ? Нау́што на сарэ́ лэ́ндыр выгинэ́ Египто́стыр Мойзаса?

¹⁷ и пэ конэ́стэ Дэвэ́л сыс холямо́ штардэша́ бэрш? Ци на пэ одолэ́ндэ, савэ́ кэрдэ́ грэ́хи, и конэскирэ кокалы́ ячнэ́пэ тэ пасён пэ чхучи́ пхув?

¹⁸ И конэ́скэ Ёв совлахадя́, со ёнэ на заджа́на пэ штэ́то тэ откхинён Лэ́са, нау́што на одолэ́нгэ, кон на кандыя́ Лэс?

¹⁹ И амэ дыкхаса, со ёнэ на могиндлэ́ тэ заджа́н пэ Лэ́скиро штэ́то тэ откхинён, пал-дова́ со ёнэ на патяндынэ́.