Юдэ́нгэ 2 - Библия - Пэ Балтитко Романи чиб (Романэс) 2019

Баро́ Зракхибэ́н

¹ Палдава́ амэ́нгэ трэй тэ рикираспэ древа́н ракхунэс кэ дова́, со ракирэ́на, соб (кай) тэ на джан криг чачунэ́ дромэ́стыр.

² Пал-дова́ со, ко́ли лав, саво́ Янго́лы пхэндлэ́, исын сполниндло (кэрдо́ кэ ко́нцо (кэ яго́ро)), и мануша́ дорэсэ́на ка́ра пал дова́, со ёнэ кэрдэ́ проти Зако́но и пал дова́, со ёнэ на кандынэ́,

³ нэ сыр тэды амэ менинаса ка́ра, ко́ли амэ на приласа илэ́са дасаво баро́ зракхибэ́н, саво́ англэды́р пхэндя́ Дэвэ́л, и допхэндлэ амэ́нгэ одолэ́, кон кокоро́ шундя́ Лэ́стыр;

⁴ со Дэвэ́л и допхэндя Пэ́скирэ знамение́нца (ґертыкэ́нца), и дивэ́нца и кажнонэ́ зорье́нца, и Свэнтонэ́ Духо́скирэ таланэнца, саво́ Ёв дэ́лас манушэ́нгэ пир Пэ́скири во́ля.

⁵ Пал-дова́ со Дэвэ́л на чхудя́ Янголэнгэ тэлэ́ тэл ґэра́ свэ́то, саво́ явэ́ла, пал саво́ амэ ракираса:

⁶ нэ вари-кон допхэнэлас вари-катэ: “Кон адава́ ману́ш исын, со Ту рипирэса лэс? Ци со да дасаво манушэ́скиро чхаво́ исын, со Ту дыкхэ́са пал лэ́стэ?

⁷ Ту лэс на́бут тыкнякирдян анги́л Янголэндэ, ту прославиндян и кутякирдян лэс, Ту чхудя́н хула́са лэс пэ дова́, со Тырэ́ васта́ кэрдэ́,

⁸ Ту чхудя́н саро́ тэлэ́ тэл лэ́скирэ ґэра́. Ке́ли Ту чхудя́н саро́ тэлэ́ тэл Лэ́скирэ ґэра́ тэ хулаинэ́л, тэды ничы́ на яця́пэ, соб (кай) тэ на явэ́л лэ́скиро. Нэ амэ ишчо (инкэ́) на дыкхаса, соб (кай) саро́ тэ явэ́л лэ́скиро”,

⁹ нэ амэ дыкхаса Исусо́с, Савэс Дэвэ́л на́бут тыкнякирдя анги́л Янголэндэ, и Саво́ исын прославиндло и кутякирдо, пал-дова́ со Ёв пиридживдя мэ́ньки и мэрибэ́н; Ёв пиридживдя мэрибэ́н пал сарэ́ манушэ́ндэ пир Дэвлэ́скиро бахталыпэ́н.

¹⁰ Пал-дова́ со, чачэс, трэиндя́, соб (кай) Дэвэ́л, Саво́ создыя́ саро́ и дурэды́р ракхэ́ла, тэ сполнинэл саро́ пир Лэ́стэ пир Лэ́скирэ мэ́ньки, Саво́ исын Лыджаибнаскиро, соб (кай) тэ янэл сарэ́н тэ зракхэнпэ.

¹¹ Пал-дова́ со Одова́, Кон отмэкэ́ла манушэ́нгирэ грэ́хи, и одолэ́, савэ́нгэ Ёв отмэкця́ грэ́хи, сарэ́ исын Дадэ́скирэ чхавэ́, палдава́ Исусо́скэ нанэ ладжаво тэ кхарэл лэн пшалэ́нца;

¹² и Ёв ракирэ́ла: “Мэ ява́ва тэ пхэна́в зан пал Тыро́ лав Мирэ́ пшалэ́нгэ, и Мэ ява́ва тэ бага́в шарды́тко гилы́ Ту́кэ машки́р сарэ́ндэ дрэ Кхангири́.”

¹³ И ишчо (инкэ́): “Мэ ява́ва тэ патяв зоралэ́с дрэ Лэ́стэ. И ишчо (инкэ́): “Ѓа́да, Мирэ́ чхавэ́ исын, савэ́н Дэвэ́л дыя́ Ма́нгэ.”

¹⁴ Пал-дова́, со сыр сарэ́-манушэ́нгирэ чхавэ́ндэ исын рат и лоч (плоть), адя́кэ-паць и Ёв прилыя́ саро́, сыр ману́ш, ке́ли бия́ндыя, соб (кай) пир Пэ́скиро мэрибэ́н Ёв могиндя́ тэ хасякирэ́л налачхэскири зор пэ мэрибэ́н;

¹⁵ и тэ дэл во́ля сарэ́нгэ кодолэ́нгэ, савэ́ дара́ндынэ мэрибна́стыр и сыс писха́рья анги́л мэрибэ́н саро́ пэ́скиро джиибэ́н.

¹⁶ Пал-дова́ со исын бицяло́, со Ёв помогинэла на Янголэнгэ, а Авраамо́скирэ родо́скэ.

¹⁷ Ваш дава́ Христосо́скэ трэиндя́ тэ явэ́л адасаво́-паць, сыр Лэ́скирэ пша́ла, соб (кай) ёв тэ явэ́л лачхэ́-илэ́скиро и чачуно́ Англатуно́ Раша́й тэ дынаринэ́л анги́л Дэвлэ́стэ, соб (кай) Ёв тэ отмэкэ́л манушэ́нгирэ грэ́хи;

¹⁸ пал-дова́ со, сыр Ёв кокоро́ мэнчиндяпэ и на́лачхо пропатякирэлас Лэс, то Ёв какана́ могинэ́ла тэ помогинэл одолэ́нгэ, конэ́с пропатякирэна.