Юдэ́нгэ 13 - Библия - Пэ Балтитко Романи чиб (Романэс) 2019

Сыр тэ Явэс Лачхо́ Дэвлэ́скэ

¹ Сыкавэ́н паты́в дурэды́р екх екхэ́скэ, сыр пша́ла.

² Прилэ́н илэ́са манушэ́н, савэ́ явэ́на кэ тумэ́, пир дава́ тумэ́ кхардэ́ дро кхэр Янголэн, мэк ёнэ на джиндлэ́ лэн.

³ Рипирэн манушэ́н, савэ́ ханэ мэньки, сы́рбы и тумэ́ кхэтанэ́ лэ́нца са́нас дро штарибэ́н; манушэ́н, савэ́ страдындлэ, сы́рбы и тумэ́ кокорэ́ страдынэнас масэнца.

⁴ Мэк тэ явэ́л романдуно́ (супру́жэско) джиибэ́н дрэ паты́в пир саро́, и чачипэ́н машки́р лэ́ндэ тэ на явэ́л магирдо́; Дэвэ́л явэ́ла тэ сэндякирэ́л биладжакунэ́ манушэ́н и манушэ́н, савэ́ дживэ́на джувле́нца сыр рома́ би совлакиро.

⁵ На явэ́н ґа́лка (жадна) кэ ловэ́, парикирэ́н Дэвлэ́скэ пал саро́, пал-дова́ со Ёв пхэндя́: “Мэ на ячкирава и на мэкава тут.”

⁶ Палдава́ амэ зоралэ́с ракираса: “Дэвэ́л помогинэла ма́нгэ, и ма́нгэ нанэ со́стыр тэ дарав, со могинэ́ла тэ кэрэ́л ма́нгэ ману́ш?”

⁷ Рипирэн пэ́скирэ сыклякирибнарьен (наставникэн), савэ́ лыджинэ́ тумэн и сыклякирдэ́ тумэн Дэвлэ́скирэ лавэ́скэ, дыкхэ́н пэ лэ́нгиро джиибэ́н кэ ко́нцо (кэ яго́ро); явэ́н дасавэ́-паць дро патяибэ́н, сыр ёнэ исын.

⁸ Ису́со Христо́со исын Адасаво́-паць атася́, ададывэ́с и пэ сарэ́ ве́ки.

⁹ И на дэнпэ, соб (кай) яви́р наджиндлэ сыклякирибэна тэ змарэн дромэ́стыр тумэн, пал-дова́ со фэды́р сарэ́стыр, соб (кай) тэ подрикирэ́л тумаро́ ило́ Дэвлэ́скиро бахталыпэ́н, а на хабэна, савэ́ на яндлэ́ нисаво́ шукарипэ́н одолэ́нгэ, савэ́ залэнапэ далэ́са.

¹⁰ Амэ́ндэ исын алта́рё, савэ́стыр на могинэ́на тэ хан одолэ́ мануша́, савэ́ кэрэ́на буты́ ваш Дэвлэ́скэ дрэ ша́тра;

¹¹ пал-дова́ со рискирибна́скирэ-мурдалэнгирэ тру́пы, савэнгиро рат Англатуно́ Юдэ́нгиро Раша́й янэ́ла дро Свэ́нто Штэ́то сыр свэ́нто дыибэ́н пал грэ́хо, хачкирэна пал дава́ ста́но (лод),

¹² палдава́ и Ису́со, соб (кай) тэ свэнцынэл манушэ́н грэхэ́ндыр Пэ́скирэ ратэ́са, мэнчындяпэ пэ мэрибэ́н пал фо́ро:

¹³ и палдава́ выджаса кэ Ёв пал фо́ро, соб (кай) и амэ́нгэ тэ лыджас пэ пэ́стэ дасаво холямо́ сабэн манушэ́ндыр, сыр Ёв:

¹⁴ пал-дова́ со амэ́ндэ пэ дая́ пхув нанэ стало фо́ро, и амэ родаса фо́ро, саво́ явэ́ла ве́чно дро Болыбна́скиро Раё.

¹⁵ Палдава́ ява́са саро́ часо пир Исусо́стэ тэ славинас Дэвлэ́с лавэ́нгирэ-свэнтонэ́ дыибнаса, – дава́ исын амарэ́ лава́, ке́ли амэ приджинаса, со Ёв исын амаро́ Рай Дэвэ́л.

¹⁶ На бистрэн тэ кэрэ́н лачхипэ́н явирэ манушэ́нгэ и тэ делинэнпэ (тэ улавэнпэ) (тэ дэн котэ́р (куско) илэ́стыр) явирэ манушэ́нца, пал-дова́ со дасавэ́ лачхэ́ рэ́нды, сы́рбы свэ́нто дыибэ́н исын лачхо́ Дэвлэ́скэ.

¹⁷ Кандэ́н пэ́скирэ сыклякирибнарьен, савэ́ лыджа́на тумэн, кэрэ́н саро́, со ёнэ пхэнэ́на тумэ́нгэ; пал-дова́ со ёнэ саро́ часо пэкэнапэ (заботисона) пал тумаро́ ду́хо (фа́но), ёнэ исын сы́рбы мануша́, савэ́ явэ́на тэ отпхэнэн анги́л Лэ́стэ, соб (кай) ёнэ тэ кэрэ́н радыма́са дава́, а на тэ дэн ґондя́ (на тэ ўздыхинэн), тэды на явэ́ла фэдэды́р тумэ́нгэ.

¹⁸ Мангэ́нпэ пал амэ́ндэ: амэ зоралэ́с патя́са, со амэ саро́ кэра́са жужэ́ патыва́са и дживаса пир чачипэ́н.

¹⁹ Мэ древа́н манга́ва тумэн тэ мангэ́нпэ, соб (кай) мэ могиндём сыгэды́р тэ рисёвав кэ тумэ́.

Мангипэ́н пэ Ко́нцо (Яго́ро)

²⁰ Дэвэ́л, Саво́ дэ́ла рама́нё (миро), Саво́ отджидякирдя́ мулэ́ндыр амарэ́ Рас-Дэвлэ́с, Исусо́с Христосо́с, Барэ́ Чхупнарис пир рат вечнонэ Заветостыр,

²¹ мэк тэ дэл Ёв зор тумэ́нгэ тэ кэрэ́н буты́ лачхэ́с, соб (кай) тэ кэрэ́н саро́ тумэ́ пир Лэ́скири во́ля. Мэк Ёв пир Исусо́стэ Христосо́стэ тэ кэрэ́л дова́ дрэ амэ́ндэ, со исын лачхо́ Лэ́скэ, Савэ́скэ тэ явэ́л сла́ва пэ сарэ́ ве́ки’. Ами́нь.

Бахтякирибэ́н пэ Ко́нцо (пэ Яго́ро)

²² Мэ древа́н манга́ва тумэн, пшала́лэ, тэ прилэ́н миро лав сыр подрикирибэ́н, мэ на́бут и чхиндём тумэ́нгэ.

²³ Джинэ́н, со амарэ́ пшалэ́с Хима́с вымэкнэ штарибнастыр; ко́ли ёв явэ́ла сыг адари́к, мэ ява́ва кхэтанэ́ лэ́са кэ тумэ́.

²⁴ Пиридэ́н “паклоно” тумарэ́ сыклякирибнарьенгэ, савэ́ лыджа́на тумэн, и сарэ́ свэнтонэ́ манушэ́нгэ. Пиридэна “паклоно” тумэ́нгэ мануша́ Италиятыр.

²⁵ Мэк тэ явэ́л бахталыпэ́н сарэ́нца тумэ́нца. Ами́нь.