Юдэ́нгэ 11 - Библия - Пэ Балтитко Романи чиб (Романэс) 2019

Патяибэ́н

¹ Патяибэ́н – дава́ исын зорало́ (твардо) джиныбэ́н дро дова́, пэ со амэ́ндэ исын наде́я, со одова́ кэрэ́лапэ пхэрдэ́с, и зорало́ патяибэ́н дро дова́, со исын вари-савэ́ чачипэна́ пэ свэ́то, мэк амэ на дыкхаса лэн,

² пир дава́ патяибэ́н Дэвэ́л приджиндя допхэныбэ́н амарэ́ годэ́-пхурэ́нгиро.

³ Екхэ́ патяибна́са амэ ґалёваса, со саро́ свэ́то исын создыно́ Дэвлэ́скирэ лавэ́са, и со саро́, со амэ дыкхаса, сыс кэрдо́ долэ́стыр, со нанэ бицяло́.

⁴ Патяибна́са Авелё яндя́ Дэвлэ́скэ фэдэды́р свэ́нто дыибэ́н, сыр Каино; пир патяибэ́н ёв дорэсця́ допхэныбэ́н Дэвлэ́стыр, со ёв исын чачуно́ ману́ш, ке́ли Дэвэ́л ракирдя́ пал лэ́скиро свэ́нто дыибэ́н и пир Пэ́скиро патяибэ́н, сыр и англэды́р, Авелё ракирэ́ла амэ́нгэ, мэк ёв ужэ мыя́.

⁵ Патяибна́са Енохо сыс лыно́ пэ болыбэ́н, и ёв на дыкхця́ мэрибэ́н, и лэс нико́н на могиндя́ тэ латхэл, пал-дова́ со Дэвэ́л лыя́ лэс. Нэ анги́л, сыр Дэвэ́л лыя́ лэс, ёв дорэсця́ допхэныбэ́н, со ёв кэрдя́ кучэс Дэвлэ́скэ.

⁶ Нэ нашты́ тэ кэрэ́с кучэс Дэвлэ́скэ би патяибнаскиро, пал-дова́ со трэй, соб (кай) ману́ш, саво́ явдя́ кэ Дэвэ́л тэ патял, со Ёв и ваш одолэ́нгэ, кон родэ́ла Лэс, Дэвэ́л отдэ́ла лачхипна́са.

⁷ Патяибна́са Ноё дорэсця́ подракхибэн пал дова́, со на сыс джиндло́ ни конэ́скэ; ёв свэнтонэ́ дара́са кэрдя́ ковчэго и зракхця́ пэ́скири сэ́м΄я (ири́). Патяибна́са ёв сэндиндя свэ́то, и Дэвэ́л приґалыя лэс чачипнаскирэ чхавэ́са пал лэ́скиро патяибэ́н.

⁸ Патяибна́са Авраа́мо, саво́ сыс кхардо тэ кандэл и сыс бичхадо́ тэ джал пэ дова́ штэ́то, пал саво́ сыс лэ́скэ дыно́ лав тэ дорэсэл паш; ёв гия́ и на джиндя́, карик ёв джа́лас.

⁹ Патяибна́са ёв лыя́ тэ лодэл сыр явирэ – ригакиро ману́ш пир пхув, пал сави́ Дэвэ́л дыя́ лав лэ́скэ; и ёв дживдя́ шатрэ́нца Исаакоса и Яковоса, савэ́нгэ адя́кэ-паць сыс дыно́ лав тэ дорэсэн паш кхэтанэ́;

¹⁰ ёв ужакирдя фо́ро, саво́ сыс банго́ (мусиндя) тэ явэ́л пэ зорало́ фунда́менто, савэскиро Дэвэ́л Кокоро́ явэ́ла архитекторо и явэ́ла тэ кэрэ́л лэс.

¹¹ Патяибна́са Саара, савьятэ на сыс чхаворэ́, сави́ адя́кэ-паць дорэсця́ састыпэн, соб (кай) тэ явэ́н чхаворэ́ ла́тэ, бияндя́ тэл пхурипэн, пал дова́ со ёй допатяндыя Одолэ́скэ, Кон дыя́ лав.

¹² Палдава́ екхэ́ кадалэ́ Авраамостыр, саво́ сыс пхуро́ кэ мэрибэ́н тэ явэ́л дадэ́са, бия́ндынэ ада́кицы бут мануша́, ада́кицы ци бут исын чэргэня́ пэ болыбэ́н и сыр нашты́ тэ гинэс саро пра́хо пэ морёскиро (дэрьявэ́скиро) брэ́го.

¹³ Сарэ́ кадалэ́ мануша́ мынэ́ патяибна́са, ёнэ на дорэснэ́ дова́, пал со Дэвэ́л дыя́ лав лэ́нгэ, ёнэ дыкхнэ́ саро́ дава́ дура́л и пхэндлэ́ “рама́нё” (миро) долэ́скэ и приджиндлэпэ, со ёнэ сыс чу́жа мануша́ и лодэна пир доя́ пхув.

¹⁴ Пал-дова́, со одолэ́ мануша́, савэ́ ракирэ́на адя́кэ, сыкавэ́на, со ёнэ родэ́на пэ́скиро тхэм (отечэство).

¹⁵ И ко́ли ёнэ пририпирэнас пэ́скэ пал дова́ тхэм, савэ́стыр ёнэ выгинэ́, лэ́ндэ явэ́лас часо одори́к тэ рисён;

¹⁶ нэ ёнэ какана́ зоралэ́с мангэна фэдэды́р тхэм, саво́ исын дро Болыбна́скиро Раё, палдава́ Дэвлэ́скэ нанэ ладжаво, ке́ли ёнэ кхарэ́на Лэс пэ́скирэ Дэвлэ́са; пал-дова́ со Ёв приготовиндя фо́ро ваш лэ́нгэ.

¹⁷ Патяибна́са Авраа́мо яндя́ Исаакос дро свэ́нто дыибэ́н, ке́ли Дэвэ́л пропатякирэлас лэс; Дэвэ́л дыя́ лав и ёв скэдыяпэ тэ янэл дро свэ́нто дыибэ́н пэ́скирэ екхорэ чхавэ́с;

¹⁸ пал савэ́стэ сыс пхэндло́: “Исаакостыр явэ́ла тэ джал дурэдыр тыро́ ро́до”;

¹⁹ ёв думиндя пэ́скэ, со Дэвлэ́стэ исын зор и мулэ́ндыр тэ отджидякирэл лэ́скирэ чхавэ́с, и сы́рбы Авраа́мо дорэсця́ лэс палэ.

²⁰ Патяибна́са Исаа́ко бахтякирдя́ Яково́с и Исавос.

²¹ Патяибна́са Яково анги́л, сыр тэ мэрэ́л, бахтякирдя́ Ёза́скирэ (Иосифо́скирэ) чхавэ́н, тэрдия́ пэ чанга́ и помангдяпэ Дэвлэ́скэ, ке́ли рикирдяпэ пал пэ́скиро дэсто́.

²² Патяибна́са, со явэ́ла анги́л, Ёза анги́л пэ́скиро мэрибэ́н пририпирэлас Израилёскирэ чхавэ́нгэ пал выгиибэн Египто́стыр и припхэндя́, со тэ кэрэ́н лэ́скирэ кокалэнца.

²³ Патяибна́са Мойза́скирэ дада́ гаравэнас лэс трин чхона́ пало́ лэ́скиро бияныпэ́н, пал-дова́ со ёнэ дыкхнэ́, со ёв сыс шука́р, и ёнэ на дара́ндынэ крали́скиро припхэныбнастыр.

²⁴ Патяибна́са Мо́йза, ке́ли яця́ баро́, отпхэндяпэ тэ кхарэлпэ Фараоно́скирэ-чхакирэ чхавэ́са;

²⁵ и выкэдыя́ фэдэды́р тэ пирилыджал мэ́ньки (муки) Дэвлэ́скирэ манушэ́нца, сыр лэ́стэ тэ явэ́л бахт пэ набаро́ часо грэхоса,

²⁶ и холямо́ сабэн пал/пэ Месия́стэ (Христосо́стэ), саво пыя пэ Лэстэ коригэды́р (позжэды́р), ёв гиндя ваш пэ́скэ дрогэдыр сарэ́ Египто́скирэ кучипна́стыр, пал-дова́ со ёв дыкхця́ надея́са, со лэс ужакирэ́ла отдыибэ́н Дэвлэ́стыр.

²⁷ Патяибна́са ёв гия́ Египто́стыр и на дарандыя крали́скирэ холя́тыр; ёв вырикирэлас дурэды́р саро́, пал-дова́ со ёв дыкхця́ анги́л пэ́стэ Одолэ́с, Кон на сыс бицяло́.

²⁸ Патяибна́са ёв свэнкиндя Патради́ и обмакхця ратэ́са вударэнгирэ касяки, соб (кай) Мэрибнытко янго́ло, саво́ мулякирэлас пэрвонэ́ биятэ́н, тэ на чилавэл лэн.

²⁹ Патяибна́са ёнэ пиригинэ́ Лоло́ мо́рё (дэрья́в), сыр пир шуки́ пхув; и ке́ли Египто́скирэ мануша́ спробиндлэ адя́кэ-паць тэ пириджан мо́рё (дэрья́в), ёнэ тасадынэ.

³⁰ Патяибна́са пынэ́ Ерихоноскирэ ва́нты пало́ (после) дова́, сыр мануша́ обджанас трусця́л фо́ро пал эфта́ дывэса́.

³¹ Патяибна́са Раав (Рахаб), биладжакуны джувлы́, на мыя́ кхэтанэ́ одолэ́ манушэ́нца, савэ́ на кандынэ́ Дэвлэ́с, пал-дова́ со ёй прилыя́ Израилёскирэ поддыкхибнаскирэн (чораханэн), сыр пэ́скирэ малэн.

³² И со мэ могина́ва буты́р тэ пхэна́в? На ухтылэ́ла (на́доси) ма́нгэ часо, ко́ли мэ ява́ва тэ ракира́в пал Гедеоностэ, Варакостэ, Салосоностэ, Ефаёстэ и Давидо́стэ и Самуилостэ и пал явирэ пророкэ́ндэ:

³³ савэ́ пэ́скирэ патяибна́са пиризорьякирэнас яви́р кралипэна́, кэрэ́нас пир чачипэ́н, дорэсэнас дова́, пал со Дэвэ́л дыя́ лав лэ́нгэ, пхандэнас муя́ шчэрэ́нгэ (левэнгэ),

³⁴ мурдякирэнас барэ́-зорьякири яг, зракхэнаспэ курталакирэ войстрима́тыр (чолыпнастыр); лэ́нгиро бизорьякирибэн кэрдя́ лэн зоралэнца, ёнэ мардэ́пэ зоралэ́с пэ мэрибэ́н и вытрадэнас чужонэ́ халадэ́н, савэ́ явэ́нас марибна́са пэ лэ́ндэ явирэ ригэ́ндыр.

³⁵ Джувля́ лэнас палэ пэ́скирэ мулэн, савэ́ сыс отджидякирдэ; яви́р мануша́, савэ́ на закамлэ, соб (кай) лэн тэ отмэкэн кэ во́ля, сыс замэнчиндлэ пэ мэрибэ́н, соб (кай) тэ дорэсэн фэдэды́р отджидякирибэна,

³⁶ пэ явирэ манушэ́ндэ сыс холямо́ сабэн, лэн мардэ́ чхупня́са, лэн пхандэнас дрэ састыра́ и чхувэ́нас дро штарибэ́н.

³⁷ Лэн домарэнас барэ́нца, пропатякирэнас пэ мэ́ньки тэ пирилыджан, лэн пилинэнас (ризилинэ́нас) пэ дуй паша́; ёнэ мэрэнас куртала́тыр, псирэнас дрэ бакранэ́ и бузны́тка (козы́тка) цы́пи, ёнэ дживдэ́ дро наухтылыбэн, дрэ мэ́ньки; страдындлэ манушэ́ндыр,

³⁸ адасавэ́ мануша́, савэ́н саро́ свэ́то на сыс мол, дживдэ́ пэ чхучэ́ прахи, дрэ бэ́рги, пир ґебара́ (пешчэры), пир лошчыны пэ пхув.

³⁹ И сарэ́нгэ лэ́нгэ исын лачхо́ допхэныбэ́н пал лэ́нгиро патяибэ́н, нэ ние́кх лэ́ндыр на дорэсця́ дова́, пал со Дэвэ́л дыя́ лав лэ́нгэ.

⁴⁰ Пал-дова́ со Дэвэ́л придуминдя анги́л тэ кэрэ́л ваш амэ́нгэ вари-со фэдэды́р, соб (кай) ёнэ кхэтанэ́ амэ́нца тэ ячэн бидошакирэнца.