Яви́р Зако́но 8 - Библия - Пэ Балтитко Романи чиб (Романэс) 2019

Ри́пир Рас-Дэвлэ́с, Тырэ́ Дэвлэ́с

¹ Сарэ́ припхэныбэна́, савэ́ мэ ракира́ва ададывэ́с тумэ́нгэ, причхувэ́н зор тэ кэрэ́н, соб (кай) тумэ́ тэ явэ́н джидэ́ тэ ячэн тумэн буты́р, и тэ джа́н и тэ закэдэн пхув, пал сави́ совлахаса дыя́ лав Рай Дэвэ́л тумарэ́ дадэ́нгэ.

² И ри́пир саро́ дром, савэ́са тут лыджия́ Рай Дэвэ́л, Дэвэ́л тыро́, пир чхучи́ (пусто) пхув, ґа́да, акана́ исын штардэша́ бэрш, соб (кай) тэ штылякирэл тут, соб (кай) тэ спробинэл тут и тэ уджинэл, со исын пэ тыро́ ило́, ци явэ́са ту тэ ракхэ́с Лэ́скирэ припхэныбэна́, ци над.

³ Ёв штылякирдя тут, спробиндя пхарэ́с (мориндя) тут бокхаса и чалякирдя тут маннаса, сави́ ту на джиндян, и на джиндлэ́ тырэ́ дада́, соб (кай) тэ сыкавэ́л ту́кэ, со на екхэ марэ́са дживэ́ла ману́ш, нэ кажнонэ́ лавэ́са, саво́ джа́ла Дэвлэ́скирэ уштэндыр, дживэ́ла ману́ш.

⁴ Урибэ́н тыро́ на кустяпэ пэ ту́тэ, и ґэро́й тыри́ на шулыя, ґа́да, сыр штардэша́ бэрш.

⁵ И джин дро тыро́ ило́, со Рай Дэвэ́л, Дэвэ́л тыро́, сыклякирэ́ла тут, сыр ману́ш сыклякирэ́ла пэ́скирэ чхавэ́с.

⁶ И палдава́ ракх припхэныбэна́ Ра́скирэ-Дэвлэ́скирэ, Дэвлэ́скирэ тырэскирэ, псир Лэ́скирэ дромэ́нца и дар Лэ́стыр.

⁷ Пал-дова́ со Рай Дэвэ́л, Дэвэ́л тыро́, лыджа́ла тут пэ лачхи́ пхув, пэ пхув, пир сави́ тхадэна сыгна рэкицы, и фолахара (фонтаны) и ґанынгорья (источники), савэ́ выджа́на лошчынэндыр и бэргэндыр,

⁸ пэ пхув, парно́ гив (пшэница), гив, винаграды́тка (дракхитка) лозы, инжыро и гранатытка кашторэ пэ пхув, маслинытка вэша́ и авги́н (мэда),

⁹ пэ пхув, пэ сави́ на ту явэ́са тэ хас тыро́ маро́ би меракиро и ни дро со на явэ́ла ту́тэ наухтылыбэн (явэ́ла до́си), пэ пхув, пэ сави́ исын бара́ састырэстыр, и бэргэндыр, савэ́ндыр явэ́са тэ чингирэс харко́ма (медь).

¹⁰ И ке́ли явэ́са ту тэ хас и тэ чалёс, тэды бахтякир Рас-Дэвлэ́с, Дэвлэ́с тырэ́с пал лачхи́ пхув, сави́ Ёв дыя́ ту́кэ.

¹¹ Ракхпэ, соб (кай) ту тэ на бистрэс Рас-Дэвлэ́с, Дэвлэ́с тырэ́с, нэ ракх Лэ́скирэ припхэныбэна́, и Лэ́скирэ зако́ны, и Лэ́скирэ упхэныбэна́, пал савэ́ ададывэ́с Мэ ракира́ва ту́кэ.

¹² Ке́ли ту явэ́са тэ хас и тэ чалёс, и чхувэ́са лачхэ́ кхэра́ и ту явэ́са тэ дживэ́с дрэ лэ́ндэ,

¹³ и ке́ли ту́тэ явэ́ла бут барэ́ и тыкнэ́ кхэри́тка мурдала́ (ското), и явэ́ла бут руп и сувнака́й, и саро́ ту́тэ явэ́ла бут,

¹⁴ тэды дыкх, соб (кай) тэ на запхутёл тыро́ ило́, и, соб (кай) ту тэ на бистрэс Рас-Дэвлэ́с, Дэвлэ́с тырэ́с, Саво́ вылыджия́ тут Египто́скирэ пхувья́тыр, писхарибнаскирэ кхэрэ́стыр;

¹⁵ Саво́ лыджия́ тут пир чхучи́ пхув бари и дараны, кай сыс сапа, василиски, скорпионы и шукэ́ штэ́ты, пэ савэ́ нанэ пани́; Саво́ кэрдя́ ваш ту́кэ панескиро тхадыпэн гранитытконэ скалатыр,

¹⁶ Саво́ чалякирдя тут пэ чхучи́ пхув маннаса, сави́ на джиндлэ́ тырэ́ дада́, соб (кай) Ёв тэ штылякирэл тут и тэ спробинэл тут, соб (кай) дурэды́р тэ кэрэ́л ту́кэ лачхипэ́н,

¹⁷ и соб (кай) ту тэ на пхэнэ́с дрэ тыро́ ило́: ‘Мири́ зор и мирэ́-вастэскири зор кэрдэ́ ма́нгэ дава́ барвалыпэ́н’,

¹⁸ нэ, соб (кай) ту тэ рипирэс Рас-Дэвлэ́с, Дэвлэ́с тырэ́с, пал-дова́ со Ёв дэ́ла ту́кэ зор тэ рикирэс барвалыпэ́н, соб (кай) тэ кэрэ́с, сыр акана́, Пэ́скиро пхэндло́ лав, савэ́са Ёв совлахаса дыя́ тырэ́ дадэ́нгэ.

¹⁹ Ко́ли ту бистрэса Рас-Дэвлэ́с, Дэвлэ́с тырэ́с, и джа́са пал явирэ дэвлорэндэ, и ту явэ́са тэ дынаринэс лэ́нгэ и тэ мангэспэ лэ́нгэ, тэды Мэ ракира́ва тумэ́нгэ ададывэ́с, со тумэ́ хасёна;

²⁰ сыр мануша́, савэ́н Рай Дэвэ́л хасякирэ́ла тумарэ́ мо́стыр, адя́кэ хасёна и тумэ́ пал дова́, со тумэ́ на кандынэ́ Ра́скирэ-Дэвлэ́скирэ, тумарэ́ Дэвлэ́скири зан.