Яви́р Зако́но 6 - Библия - Пэ Балтитко Романи чиб (Романэс) 2019

Най Барэды́р Припхэныбэ́н

¹ Акана́ исын припхэныбэна́, упхэныбэна́ и зако́ны, савэ́ ракирдя́ Рай Дэвэ́л, Дэвэ́л тумаро́, тэ сыклякирэс тумэн, соб (кай) тумэ́ тэ кэрэ́н адя́кэ пэ доя́ пхув, пэ сави́ тумэ́ джа́на, соб (кай) тэ явэ́н тумэ́ хулая́ пэ ла́тэ;

² соб (кай) ту тэ дарэс тырэ́ Ра́стыр-Дэвлэ́стыр, и сарэ́ Лэ́скирэ упхэныбнэндыр и Лэ́скирэ припхэныбнэндыр, савэ́ ракира́ва ту́кэ, соб (кай) ту тэ ракхэ́с, и тырэ́ чхавэ́, и тырэ́ чхавэ́нгирэ-чхавэ́ дрэ сарэ́ тырэ́ джиибна́скирэ дывэса́, соб (кай) тэ явэ́н ґарэдыр (длугэдыр) тырэ́ дывэса́.

³ И палдава́ шун, Израилё, и причху́в зор тэ кэрэ́с дава́, соб (кай) ту́кэ тэ явэ́л мишто́, и соб (кай) тумэ́ тэ явэ́н древа́н (збит) бут, сыр Рай Дэвэ́л, тырэ́-дадэ́нгиро Дэвэ́л ракирдя́ ту́кэ, со Ёв дэ́ла ту́кэ пхув, тхадэ́ла тхуд и авги́н (мэда).

⁴ Шун, Израилё: Рай Дэвэ́л, тумаро́ Рай Дэвэ́л исын Екх;

⁵ и сыка́в паты́в тырэ́ Ра́скэ-Дэвлэ́скэ, сарэ́ тырэ́ илэ́са, и сарэ́ тырэса деса, и сарэ́ зорьенца тырэнца.

⁶ И мэк тэ явэ́н далэ́ лава́, савэ́ Мэ пхэна́ва ту́кэ ададывэ́с, дро тыро́ ило́;

⁷ и пирипхэн лэн тырэ́ чхавэ́нгэ и ра́кир пал лэ́ндэ, бэшындой дрэ тыро́ кхэр и гии дромэ́са, и пасии, и уштыи;

⁸ и припхандэ лэн сыр шпэ́ра (знако) пэ тыро́ васт, и мэк тэ явэ́н ёнэ сыр пхандлуны (повязка) пэ тырэ́ якха́,

⁹ и чхин лэн пэ тырэ́-кхэрэ́скирэ касяки и пэ тырэ́ вудара́ (по́рты).

Приракхибэн тэ Кандэс

¹⁰ Ке́ли залыджала тут Рай Дэвэ́л, тыро́ Дэвэ́л, пэ доя́ пхув, сави́ Ёв совлахадя́ тэ дэл тырэ́ дадэ́нгэ, Авраамо́скэ, Исаако́скэ и Яково́скэ, тэ дэл ту́кэ барэ́ и лачхэ́ форьенца, савэ́ ту на кэрдя́н,

¹¹ и кхэрэнца, со сыс чхудэ́ пхэрдэ́с кажнонэ́ миштыпнаса, савэ́ ту на чхудя́н, и ґанынгэнца, вычхингирдэ барэстыр, савэ́ ту на вычингирдян, винаградникэнца и маслинэнца, савэ́ ту на чхудя́н дрэ пхув, и, савэ́ ту явэ́са тэ хас и тэ чалёс;

¹² тэды ракхпэ, соб (кай) ту тэ на бистрэс Рас-Дэвлэ́с, Саво́ вылыджия́ тут Египто́скирэ пхувья́тыр, писхарибнаскирэ кхэрэ́стыр.

¹³ Дар Ра́стыр-Дэвлэ́стыр, тырэ́ Дэвлэ́стыр, и Лэ́скэ Екхэ́скэ дынарин, и Лэ́скирэ лавэ́са совлаха́.

¹⁴ На мангэ́нпэ явирэ дэвлорэ́нгэ, дэвлорэ́нгэ одолэ́-манушэ́нгирэ, савэ́ явэ́на пашы́л тумэ́ндэ;

¹⁵ пал-дова́ со Рай Дэвэ́л, тыро́ Дэвэ́л, Саво́ исын машки́р ту́тэ, исын Дэвэ́л зэвлыныпнаскиро; соб (кай) тэ на захачол Ра́скирэ-Дэвлэ́скири, тырэ́ Дэвлэ́скири холы́ пэ ту́тэ, и тэ на традэл криг Ёв тут пхувья́кирэ мо́стыр.

¹⁶ На пропатякирэн Рас-Дэвлэ́с, тумарэ́ Дэвлэ́с, сыр тумэ́ Лэс пропатякирдэ дрэ Маса́.

¹⁷ Ракхэ́н зоралэ́с тумарэ́ Ра́скирэ-Дэвлэ́скирэ припхэныбэна́, и Лэ́скирэ упхэныбэна́ и зако́ны, пир савэ́ Ёв припхэндя́ тэ кэрэ́с ту́кэ;

¹⁸ кэр чачипэ́н и лачхипэ́н анги́л Ра́скирэ-Дэвлэ́скирэ якха́, соб (кай) шука́р тэ явэ́л ту́кэ, и соб (кай) ту тэ заджас и тэ хулаинэс лачхэ́ пхувья́са, сави́ Рай Дэвэ́л совлахадя́ тэ дэл тырэ́ дадэ́нгэ,

¹⁹ и, соб (кай) Ёв тэ традэл криг сарэ́н тырэ́н вэргэ́н тырэ́ мо́стыр, сыр ракирдя́ Рай Дэвэ́л.

²⁰ Ко́ли пхучэла ту́тыр тыро́ чхаво́ дро яви́р часо, ракири́: ‘Со значынэна далэ́ досыкаибэна, зако́ны, и упхэныбэна́, савэ́ ракирдя́ тумэ́нгэ Рай Дэвэ́л, Дэвэ́л тумаро́.’

²¹ то ту тэды пхэн тырэ́ чхавэ́скэ: “Писха́рья амэ са́мас фараоностэ дро Еги́пто, нэ Рай Дэвэ́л вылыджия́ амэн Египто́стыр зоралэ́ вастэ́са;

²² и сыкадя́ Рай Дэвэ́л знаме́нии (ґертыка́), и ди́вы барэ́ и даракунэ пэ Еги́пто, пэ фараоностэ и пэ саро́ лэ́скиро кхэр, анги́л амарэ́ якха́;

²³ а амэн Ёв вылыджия́ одотхы́р, соб (кай) тэ янэл амэн и тэ дэл амэ́нгэ пхув, сави́ Ёв совлахадя́ амарэ́ дадэ́нгэ тэ дэл амэ́нгэ.

²⁴ И припхэндя́ амэ́нгэ Рай Дэвэ́л тэ кэра́с саро́ пир сарэ́ далэ́ упхэныбэна́, соб (кай) амэ тэ дарас Ра́стыр-Дэвлэ́стыр, Дэвлэ́стыр амарэстыр, соб (кай) шука́р тэ явэ́л амэ́нгэ дрэ сарэ́ дывэса́, соб (кай) тэ зракхэ́л амаро́ джиибэ́н, сыр и акана́;

²⁵ и дро саро́ явэ́ла амаро́ чачипэ́н, ко́ли амэ ява́са тэ причхувас зор тэ кэра́с пир сарэ́ далэ́ припхэныбэна́ анги́л Растэ-Дэвлэ́стэ, Дэвлэ́стэ амарэстэ, сыр Ёв ракирдя́ амэ́нгэ.”