Яви́р Зако́но 4 - Библия - Пэ Балтитко Романи чиб (Романэс) 2019

Мо́йза Припхэнэла тэ Кэрэ́л пир Упхэныбэ́н

¹ И акана́, Израилё, шун упхэныбэна́ и зако́ны, савэ́ мэ сыклякирава тумэн тэ кэрэ́н, соб (кай) тумэ́ тэ явэ́н джидэ́, и тэ джа́н и тэ дорэсэн доя́ пхув, сави́ Рай Дэвэ́л, тумарэ́ дадэ́нгиро Дэвэ́л, дэ́ла тумэ́нгэ;

² тэ на причхувэ́н кэ дова́, со мэ ракирдём тумэ́нгэ, и тэ на отлэн долэ́стыр; ракхэ́н Ра́скирэ-Дэвлэ́скирэ, тумарэ́ Дэвлэ́скирэ припхэныбэна́, савэ́ мэ да́ва тумэ́нгэ.

³ Якха́ тумарэ́ дыкхнэ́ саро́, со кэрдя́ Рай Дэвэ́л Ваал-Фегороса: кажнонэ́ манушэ́с, саво́ кэрдя́ сыр Ваал-Фегоро, традыя́ криг Рай Дэвэ́л, Дэвэ́л тыро́, тырэ́ манушэ́ндыр;

⁴ а тумэ́, савэ́ рикирдэпэ зоралэ́с кэ Рай Дэвэ́л, Дэвэ́л тумаро́, сан джидэ́ сарэ́ акана́.

⁵ Дыкхэ́н, мэ сыклякирдём тумэн упхэныбнэнгэ и законэнгэ, сыр ракирдя́ ма́нгэ Рай Дэвэ́л, Дэвэ́л миро, соб (кай) тумэ́ адя́кэ тэ кэрэ́н пэ доя́ пхув, дрэ сави́ тумэ́ заджа́на, соб (кай) тэ хулаинэн ла́са;

⁶ и, соб (кай) тумэ́ тэ ракхэ́н и тэ кэрэ́н пир лэ́ндэ: пал-дова́ со дрэ дава́ исын годыпэ́н тумаро́ и годы́ тумари́ анги́л якха́ манушэ́нгирэ, савэ́ шунэ́на пал сарэ́ далэ́ упхэныбэна́, и пхэнэ́на: ‘Екх адалэ́ барэ́ мануша́ исын мануша́ годэ́ и барэ́-годякирэ.’

⁷ Пал-дова́ со, ци исын савэ́ барэ́ мануша́, кэ савэ́ дэвэла́ лэ́скирэ тэ явэ́н бы адя́кэ пашы́л, сыр пашы́л кэ амэ Рай Дэвэ́л, амаро́ Дэвэ́л, ке́ли амэ кхараса Лэс?

⁸ И ци исын, савэ́ барэ́ мануша́, савэ́ндэ тэ явэ́н бы дасавэ́ чачунэ́ упхэныбэна́ и зако́ны, сыр саро́ дава́ Зако́но исын, пал саво́ мэ чхурдава лав ададывэ́с?

⁹ Фэ́ни (то́ка), ракхпэ, и гарав ракхунэс тыро́ ди, соб (кай) ту́кэ тэ на бистрэс долэ́ рэ́нды, савэ́ дыкхнэ́ тырэ́ якха́, соб (кай) ёнэ тэ на выджа́н тырэ́ илэ́стыр дрэ сарэ́ тырэ́ джиибна́скирэ дывэса́; и роспхэн пал лэ́ндэ тырэ́ чхавэ́нгэ и тырэ́-чхавэ́нгирэ чхавэ́нгэ,

¹⁰ пал дова́ дывэ́с, ке́ли ту са́нас тэрдо́ анги́л Растэ-Дэвлэ́стэ, тырэстэ Дэвлэ́стэ, пашы́л Хориво, и ке́ли пхэндя́ Рай Дэвэ́л ма́нгэ: ‘Скэ́дэ кэ Мэ манушэ́н, и Мэ пхэна́ва лэ́нгэ Мирэ́ лава́, савэ́ндыр ёнэ высыклёна тэ дарэ́н Ма́ндыр дрэ сарэ́ пэ́скирэ джиибна́скирэ дывэса́ пэ пхув и высыклякирэна пэ́скирэ чхавэ́н.’

¹¹ Тумэ́ подгинэ́ и тэрдинэ́ тэл бэ́рга, а бэ́рга хачия яга́са кэ болыбэ́н, и сыс цямло (тёмно), о́блоко и калыпэ́н.

¹² И ракирдя́ Рай Дэвэ́л кэ тумэ́ машкира́л яг; Лэ́скирэ-лавэнгири зан (глос) тумэ́ шундлэ́, нэ муй на дыкхнэ́, а екх зан;

¹³ и дыя́ тэ джинэ́л Ёв тумэ́нгэ завето Пэ́скиро, саво́ пхэндя́ тумэ́нгэ тэ кэрэ́с саро́, пир дэш лава́ (дэштунэ) и чхиндя́ лэс пэ дуй барунэ́ скрижа́ли (таблицы);

¹⁴ и пхэндя́ ма́нгэ Рай Дэвэ́л дрэ долэ́ дывэса́ тэ сыклякирав тумэн упхэныбнэнгэ и законэнгэ, соб (кай) тумэ́ тэ кэрэ́н пир лэ́ндэ пэ доя́ пхув, дрэ сави́ тумэ́ заджа́на, соб (кай) тэ хулаинэн ла́са.

Тэ Ракхэ́нпэ Идолэндыр

¹⁵ Ракхэ́н и рикирэ́н зоралэ́с тумарэ́ дия́, со тумэ́ на дыкхнэ́ ни саво́ москиро о́бразо (стаць) дро дова́ дывэ́с, ке́ли ракирдя́ кэ тумэ́ Рай Дэвэ́л пэ Хориво ягатыр,

¹⁶ соб (кай) тумэ́ тэ на пэрэ́н дро блэ́ндо и тэ на вычхинэн пэ́скэ муя́, ци форма вари-сави́ москири, муршэ́с ци джувля́,

¹⁷ ци копия вари-савэ́ кхэритконэ́-мурдалэскири, саво́ исын пэ пхув, ци вари-савья́ чирикля́ пхакэнца (крылэнца), сави́ вурняла тэл болыбэ́н,

¹⁸ ци копия вари-савэ́с гадос, саво́ ползынэла пир пхув, копия вари-савэ́ мачхэскири, саво́ исын дро пани́ тэлэды́р пхувья́тыр;

¹⁹ и соб (кай) ту, дыкхи́ пэ болыбэ́н, и ке́ли дыкхця́н кхам, чхон и чэргэня́ и саро́, со исын пэ болыбэ́н, соб (кай) дава́ тэ на злыджал тут, и тэ на мангэспэ лэ́нгэ, и тэ на дынаринэс лэ́нгэ, адя́кэ сыр Рай Дэвэ́л, Дэвэ́л тыро́, дыя́ лэн сарэ́ манушэ́нгэ тэл саро́ болыбэ́н сыр мэкно́ миштыпэ́н (наследство).

²⁰ А тумэн лыя́ Рай Дэвэ́л и вылыджия́ тумэн саструнэ́ бовэстыр, Египто́стыр, соб (кай) тумэ́ тэ явэ́н Лэ́скирэ мануша́ Лэ́скирэ мэкнэ́ миштыпна́стыр, сыр дава́ акана́ бицяло́.

²¹ И Рай Дэвэ́л холя́сыя пэ ма́ндэ пал тумэ́ндэ, и совлахадя́, со мэ на пириджава пал Иорда́но и на заджава пэ доя́ лачхи́ пхув, сави́ Рай Дэвэ́л, Дэвэ́л тыро́, дэ́ла ту́кэ дрэ миштыпна́скири ме́ра;

²² мэ мэра́ва пэ дая́ пхув, на пиригии пал Иорда́но, а тумэ́ пириджана, и явэ́на тумэ́ хулая́ пэ доя́ лачхи́ пхув.

²³ Ракхэ́нпэ, соб (кай) тэ на бистрэн тумэ́нгэ дыно́ завето (лав) Ра́скирэ-Дэвлэ́скиро, саво́ Ёв чхудя́ тумэ́нца, и соб (кай) тэ на кэрэ́н пэ́скэ вари-саво́ муй дрэ вари-сави́ форма, сыр припхэндя́ ту́кэ Рай Дэвэ́л, Дэвэ́л тыро́;

²⁴ пал-дова́ со Рай Дэвэ́л, Дэвэ́л тыро́, исын яг, сави́ ха́ла, исын Дэвэ́л зэвлыныпнаскиро.

²⁵ Ко́ли бияндёна ту́тэ чхавэ́ и тырэ́ чхавэ́ндэ чхавэ́, и ґара́ (длу́гэс) дживи пэ пхув, а тумэ́ джа́на дро блэ́ндо, и кэрэ́на копии, савэ́ сыкавэ́на и́долы, и кэрэ́на дая́ холы́ анги́л Ра́скирэ-Дэвлэ́скирэ, тумарэ́ Дэвлэ́скирэ якха́, и росхолякирэна Лэс,

²⁶ то тэды мэ допхэнава тумэ́нгэ ададывэ́с болыбнаса и пхувья́са, со тумэ́ сыг хасякирэна пхув, ваш пэ́скэ, пир сави́ тумэ́ пириджана пал Иорда́но; тумэ́ на явэ́на бут дывэса́ пэ ла́тэ, нэ хасёна;

²⁷ и росчхурдэла тумэн Рай Дэвэ́л пир сарэ́ манушэ́ндэ тэ дживэ́н, и ячэ́напэ пэ на́бут машкира́л манушэ́ндэ, кэ савэ́ залыджала тумэн Рай Дэвэ́л.

²⁸ И тумэ́ явэ́на одо́й тэ дынаринэ́н дэвлорэ́нгэ, савэ́ кэрдэ́ манушэ́нгирэ васта́ каштэ́стыр и барэстыр, савэ́ на дыкхэ́на и на шунэ́на, и на ха́на, и на сунгавэна.

²⁹ Нэ ке́ли ту явэ́са тэ родэс одо́й Рас-Дэвлэ́с, тырэ́ Дэвлэ́с, тэды латхэса Лэс, ко́ли явэ́са тэ родэс Лэс сарэ́ тырэ́ илэ́са и сарэ́ тырэ́ деса.

³⁰ Ке́ли ту явэ́са дрэ би́да, и ке́ли саро́ дава́ латхэ́ла тут дрэ сарэ́ дывэса́, со ишчо (инкэ́) явэ́на, тэды ту рисёса илэ́са кэ Рай Дэвэ́л, Дэвэ́л тыро́, и шунэса Лэ́скири зан (глос).

³¹ Пал-дова́ со Рай Дэвэ́л, тыро́ Дэвэ́л, исын Рай Дэвэ́л тангипнаскиро; Ёв на ячкирэ́ла тут и на хасякирэ́ла тут, и на забистрэла завето тырэ́ дадэ́нца, саво́ Ёв совлахаса дыя́ лэ́нгэ.

³² Пал-дова́ со пхуч англатунэндыр, савэ́ сыс англэды́р ту́тыр, долэ́ дывэсэ́стыр, дрэ саво́ Дэвэ́л создыя́ манушэ́с пэ пхув, и екхэ болыбна́скирэ ягоро́стыр (концостыр) кэ яви́р яго́ро болыбна́скиро: ци сыс вари-со дасаво, сыр дава́ баро́ рэ́ндо, ци шундло, ци со подджалас пэ дава́ (далэскэ)?

³³ Ци шундлэ́ вари-савэ́ мануша́ Дэвлэ́скири зан, сави́ ракирдя́ ягатыр, и ячнэ́пэ джидэ́, сыр шундя́н ту?

³⁴ Ци скэдэласпэ вари-саво́ Дэвэ́л тэ джал, тэ лэл пэ́скэ манушэ́н машки́р явирэ манушэ́ндэ тхагарьенца, знамение́нца (ґертыкэ́нца) и дивэнца, и марибна́са, и зоралэ́ вастэ́са, и вучэ́ вастэ́са, и барэ́ страхаса, сыр кэрдя́ ваш тумэ́нгэ Рай Дэвэ́л, тумаро́ Дэвэ́л, дро Еги́пто анги́л тырэ́ якха́?

³⁵ Ту́кэ сыс дыно́ тэ дыкхэ́с дава́, соб (кай) ту тэ джинэ́с, со екх Рай Дэвэ́л исын Дэвэ́л, и нанэ буты́р апри́ч (кроме) Лэ́стэ;

³⁶ болыбна́стыр Ёв дыя́ ту́кэ тэ шунэ́с Пэ́скири зан, соб (кай) тэ сыклякирэс тут, и пэ пхув сыкадя́ ту́кэ Пэ́скири бари яг, и ту шундя́н Лэ́скирэ лава́ машки́р яг;

³⁷ и адя́кэ сыр Лэ́скэ ячнэ́ дро́га тырэ́ дада́, и Ёв выкэдыя́ тумэн, лэ́нгиро ро́до пало́ (после) лэ́ндэ, тэды и вылыджия́ Ёв тут Кокоро́ барэ́ Пэ́скирэ зорья́са Египто́стыр,

³⁸ соб (кай) тэ традэс криг тырэ́ мо́стыр манушэ́н, савэ́ сыс барэды́р и зоралэды́р ту́тыр, и тэ залыджас тут, и тэ дэс лэ́нгири пхув дрэ миштыпна́скири ме́ра, сыр дава́ акана́ бицяло́.

³⁹ И ту акана́ джин и чхув пэ тыро́ ило́, со Рай Дэвэ́л исын Дэвэ́л упра́л пэ болыбэ́н и пэ пхув тэла́л, и нанэ буты́р апри́ч Лэ́стэ;

⁴⁰ и ракх Лэ́скирэ упхэныбэна́ и Лэ́скирэ припхэныбэна́, савэ́ мэ ракира́ва акана́ ту́кэ, соб (кай) шука́р тэ явэ́л ту́кэ и тырэ́ чхавэ́нгэ пало́ (после) ту́тэ, и, соб (кай) ту бут часо (цы́ро) тэ явэс пэ доя́ пхув, сави́ Рай Дэвэ́л, тыро́ Дэвэ́л, дэ́ла ту́кэ пэ саро́ джиибэ́н.”

⁴¹ Тэды Мо́йза отчхудя трин фо́рья пир дая́ Иорданоскири риг пэ васто́ко кхамэстыр,

⁴² соб (кай) тэ нашэ́л одори́к замарибнари (умарибнари), саво́ мулякирэ́ла пэ́скирэ пашатунэс, наками, саво́ на сыс вэ́рго (врого) лэ́скэ ни тася́, ни пэ три́то дывэ́с, и соб (кай) тэ нашэ́л дрэ екх далэ́ форье́ндыр, тэ ячэ́лпэ джидо́:

⁴³ Бецэро пэ чхучи́ пхув, пэ лошчы́на (равнина) дро Рувимоскиро ро́дыцо, и Рамо́фо дро Галаа́до дро Гадоскиро ро́дыцо, и Голано дро Васа́но дрэ Манасия́скиро ро́дыцо.

⁴⁴ Ѓа́да, исын Зако́но, саво́ чхудя́ анги́л (пропониндя) Мо́йза Израилёскирэ чхавэ́нгэ.

⁴⁵ Ѓа́да, исын припхэныбэна́, упхэныбэна́ и зако́ны, савэ́ дыя́ Мо́йза Израилёскирэ чхавэ́нгэ, сыр ёнэ выгинэ́ Египто́стыр,

⁴⁶ пал Иорда́но пэ лошчы́на проти Беф-Фегоро [Бэт Пеор-ю.о.], пэ Сигоноскири пхув, Аморее́нгирэ-крали́скири, саво́ дживдя́ кэ Есево́но, савэ́с замардя́ (умардя) Мо́йза Израилёскирэ чхавэ́нца, пир лэ́нгиро выгиибэн Египто́стыр.

⁴⁷ И залынэ ёнэ лэ́скири пхув и Васаноскирэ-крали́скирэ, Огоскири пхув, дуе Аморее́нгирэ кральенгирэ, савэ́ пал Иорда́но кэ васто́ко кхамэскиро,

⁴⁸ лыи Ароеростыр, саво́ исын пашто́ пэ брэ́го Арноноскиро, сыгнонэ рэкицатыр (лэнорьятыр), кэ бэ́рга Сио́но, ёй исын Ермоно,

⁴⁹ и лынэ́ сари́ лошчы́на пир дая́ Иорданоскири риг кэ васто́ко, кэ мо́рё (дэрья́в), исын лошчыны пашы́л Фасгакиро склоно.”