Яви́р Зако́но 34 - Библия - Пэ Балтитко Романи чиб (Романэс) 2019

Мо́йза Мэрэ́ла пэ Бэрго Нево

¹ И гия́ упрэ́ Мо́йза Моавитоскирэ лошчынэндыр пэ бэ́рга Нево, пэ Фасгакиро вучипэ́н, со исын проти Ерихо́но, и сыкадя́ лэ́скэ Рай Дэвэ́л сари́ пхув Галаадоскири кэ Дано,

² и сари́ Нефалимоскири пхув, и сари́ Ефремо́скири пхув и Манасияскири, и сари́ Юдаскири пхув, аж кэ за́падно (пал-панитко) мо́рё (дэрья́в),

³ и паш-дывэсы́тко (южно) риг, и лошчы́на пэ до́ло Ерихо́но, Пальмэнгиро фо́ро, кэ Сигоро.

⁴ И пхэндя́ лэ́скэ Рай Дэвэ́л: “Ѓа́да, исын пхув, пал сави́ мэ совлахадём Авраамо́скэ, Исаако́скэ и Яково́скэ, ракири́: ‘Родоскэ тырэ́скэ Мэ да́ва ла’; Мэ дыём ту́кэ тэ дыкхэ́с ла якхэ́нца тырэнца, нэ пэ ла́тэ ту на заджаса.”

⁵ И мыя́ одо́й Мо́йза, писха́ри Ра́скирэ-Дэвлэ́скиро, пэ Моавитоскири пхув, пир Ра́скирэ-Дэвлэ́скиро лав;

⁶ и ґарадэ́ лэс пэ до́ло пэ Моавитоскири пхув проти Беф-Фегоро, и нико́н на джинэ́ла штэ́то ґараибнытко лэ́скиро аж кэ дава́ дывэ́с.

⁷ Мойза́скэ сыс шэл тэ биш бэрш, ке́ли ёв мыя́; нэ якха́ лэ́скирэ на коринэ, и зор дрэ лэ́стэ яця́пэ.

⁸ И рондлэ́ пал Мойзастэ Израилёскирэ чхавэ́ пэ Моавитоскирэ лошчыны трия́нда дывэса́. И прогинэ́ роибнытка дывэса́ и пиридживипэн пал Мойзастэ.

⁹ И Ису́со (Ёхошуа́), Навиноскиро чхаво́, пхэрдия годякирэ духо́са, пал-дова́ со Мо́йза чхудя́ пэ лэ́стэ васта́ пэ́скирэ, и кандынэ́ лэс Израилёскирэ чхавэ́, и кэрдэ́ адя́кэ, сыр ракирдя́ Рай Дэвэ́л Мойза́скэ.

¹⁰ И на сыс буты́р Израилёстэ пророко́с адасавэс, сыр Мо́йза, савэ́с Рай Дэвэ́л джиндя́ муй кэ муй,

¹¹ пир, сарэ́ знаме́нии (ґертыка́) и ди́вы, савэ́ бичхадя́ лэс Рай Дэвэ́л тэ кэрэ́л пэ Египто́скири пхув пэ фараоностэ, и пэ сарэ́ лэ́скирэ писхарьендэ, и пэ сари́ лэ́скири пхув,

¹² и пир зорало́ васт, и пир барэ́ ди́вы, савэ́ Мо́йза кэрдя́ анги́л сарэ́ Израилёскирэ якха́.