Яви́р Зако́но 3 - Библия - Пэ Балтитко Романи чиб (Романэс) 2019

Кра́ли Васаноскиро Ого Домардо

¹ И рисиям амэ одотхы́р, и гиям кэ Васа́но, и выгия́ проти амэ́ндэ пэ марибэ́н Ого, о Васаноскиро кра́ли, сарэ́ пэ́скирэ манушэ́нца, пашы́л Едрея.

² И пхэндя́ ма́нгэ Рай Дэвэ́л: “На дар лэ́стыр, пал-дова́ со Мэ отда́ва лэс дро тыро́ васт, и сарэ́н лэ́скирэ манушэ́н, и сари́ лэ́скири пхув, и ту кэрэ́са лэ́са адя́кэ, сыр ту кэрдя́н Сигоноса [Сихоноса-ю.о.], Аморее́нгирэ крали́са, саво́ дживдя́ кэ Есево́но.”

³ И отдыя́ Рай Дэвэ́л, Дэвэ́л амаро́, дрэ амарэ́ васта́ и Огос, Васаноскирэ крали́с, и сарэ́н лэ́скирэ манушэ́н; и амэ домардям лэс адя́кэ, со нико́н на яця́пэ лэ́стэ джидо́;

⁴ и лыям амэ дрэ дова́ часо сарэ́ лэ́скирэ фо́рья, на сыс фо́ро, саво́ амэ тэ на лас лэ́ндыр; шовдэша́ фо́рья, сари́ Арговоскири округа, Васаноскирэ-Огоскиро кралипнастыр.

⁵ Сарэ́ далэ́ фо́рья, сыс кэрдэ́ зоралэ́ тынэ́нца, вучэ́ вантэнца, вударэнца, и заучхакирибнэнца, апри́ч фо́рья, савэ́ на сыс облыджинэ зоралэ́ тынэ́нца, сыс древа́н бут.

⁶ И отдыям амэ лэн прокошыбнаскэ, сыр кэрдя́м Сигоноса, Есевоноскирэ крали́са, отдыям прокошыбнаскэ кажно фо́ро муршэнца, джувле́нца и чхаворэнца;

⁷ нэ сарэ́ кхэритконэ́ мурдалэ́н (ското) и саро́ закэдыно дрэ фо́рья лыям амэ пэ́скэ дро дорэсыбэ́н (добыча).

⁸ И лыям амэ дрэ дова́ часо дуе Аморее́нгирэ-кральенгирэ вастэ́стыр дая́ пхув, сави́ сыс пир дая́ Иорданоскири риг, Арноноскирэ сыгнонэ рэка́тыр (лэня́тыр) кэ бэ́рга Ермоно, –

⁹ Сидоняни Ермоно кхарэ́на Сирионо, а Амореи кхарэ́на лэс Сениро, –

¹⁰ сарэ́ фо́рья пэ лошчы́на, саро́ Галаа́до и саро́ Васа́но кэ Салха и Едрея, Васаноскирэ-Огоскирэ кралипнаскирэ фо́рья;

¹¹ екх Ого, о Васаноскиро кра́ли, яця́пэ Рефаимэндыр. Ѓа́да, лэ́скиро чхуибэ́н (одро), чхуибэ́н саструно, и акана́ исын дрэ Рава, Амоноскирэ чхавэ́ндэ: длэнгипэ́н лэ́скиро исын еня́ (биекхэ́скиро дэш) куня́ (логци), а лэ́скиро буґлыпэ́н исын штар куня́, муршэнгирэ куня́.

Сыр Роскэрдэ Пхув пэ Васто́ко Иорданостыр

¹² Пхув дая́ амэ лыям дрэ дова́ часо, лыям Ароеростыр, саво́ исын пашы́л Арноноскири сы́гно рэ́кица (лэнори́); и пашы́л бэ́рга Галаадоскири ла́кирэ форьенца отдыём мэ Рувимо́скирэ и Гадо́скирэ родыцо́скэ;

¹³ а со яця́пэ Галаадостыр и саро́ Васа́но, Огоскиро кралипэ́н, отдыём мэ паш пхув Манасия́скирэ родыцо́скэ, сари́ округа Арговоскири сарэ́ Васаноса.

¹⁴ Иаиро (Яиро), о Манасия́скиро чхаво́, лыя́ сари́ Аргэнгири округа кэ Гесуроскирэ и Маахакирэ ме́жы, и ёв кхардя́ ла Васа́но, пир пэ́скиро лав, Яироскирэ ґавэнца, со кэ далэ́ дывэса́;

¹⁵ И мэ дыём Галаа́до Махироскэ.

¹⁶ И Рувимо́скирэ и Гадо́скирэ родыцо́скэ дыём мэ пхув Галаадостыр кэ Арноноскири сы́гно рэ́кица (лэнори́), пхув машкира́л сы́гно рэ́кица (лэнори́) и ме́жа, кэ сы́гно рэ́кица (лэнори́) Иавокоскири, Амоноскирэ-чхавэ́нгирэ ме́жа,

¹⁷ адя́кэ-паць лошчы́на и Иорда́но, саво́ и исын ме́жа Кинерефостыр кэ лошчы́на морёскири, Лондэ-морёскири, пашы́л Фасгакирэ-бэрга́киро склоно кэ васто́ко.

¹⁸ И дыём мэ тумэ́нгэ дро дова́ часо упхэныбэ́н, ракири́: “Рай Дэвэ́л, Дэвэ́л тумаро́, дыя́ тумэ́нгэ дая́ пхув; сарэ́, кон могинэ́ла тэ джал пэ марибэ́н, лэн марибны́тко (оружыё), джа́н анги́л тумарэ́ пшалэ́ндэ, Израилёскирэ чхавэ́ндэ;

¹⁹ екх тумарэ́ ромня́ и тумарэ́ чхавэ́ и тумарэ́ кхэри́тка мурдала́ (ското) тумарэ́, мэк тэ ячэ́нпэ дрэ тумарэ́ фо́рья, савэ́ мэ дыём тумэ́нгэ,

²⁰ пака Рай Дэвэ́л дэ́ла рама́нё (миро) тумарэ́ пшалэ́нгэ, сыр тумэ́нгэ, и пака и ёнэ дорэсэ́на дро хулаибэн пхув, сави́ Рай Дэвэ́л, Дэвэ́л тумаро́, дэ́ла лэ́нгэ пал Иорда́но; тэды рисён кажно дро пэ́скиро хулаибэн, саво́ мэ дыём тумэ́нгэ.”

²¹ И Исусо́скэ (Ёхошуаскэ) ракирдём мэ дро долэ́ дывэса́: “Тырэ́ якха́ дыкхнэ́ саро́, со кэрдя́ Рай Дэвэ́л, Дэвэ́л тумаро́, дуе далэ́ кральенца; дова́-паць кэрэ́ла Рай Дэвэ́л сарэ́ кралипнэнца, савэ́ ту явэ́са тэ проджас;

²² на дарэ́н лэ́ндыр, пал-дова́ со Рай Дэвэ́л, Дэвэ́л тумаро́, Кокоро́ марэлапэ пал тумэ́ндэ.”

Мойза́скэ Пхэндло́ тэ на Заджа́л пэ Доя́ Пхув

²³ И мангдёмпэ мэ Ра́скэ-Дэвлэ́скэ дрэ долэ́ дывэса́ дасавэ́ лавэ́нца:

²⁴ “Баро́ Раё, Раё Дэ́вла, Ту лыян тэ сыкавэс Тырэ́ писхари́скэ сла́ва Тыри́ и зорало́ васт Тыро́; пал-дова́ со, саво́ дэвэл исын пэ болыбэ́н, ци пэ пхув, саво́ могиндя́ бы тэ кэрэ́л дасавэ́ рэ́нды, сыр Тырэ́, и зорья́са дасавьяса, сыр Тыри́ исын?

²⁵ Дэ ма́нгэ тэ пириджав и тэ дыкха́в доя́ лачхи́ пхув, сави́ исын пал Иорда́но, и доя́ шука́р бэ́рга и Лива́но.”

²⁶ Нэ Рай Дэвэ́л холясолас пэ ма́ндэ пал тумэ́ндэ, и на кандыя́ ман, и пхэндя́ ма́нгэ Рай Дэвэ́л: “Ухты́лла (до́си) ту́кэ, анги́л на ра́кир Ма́нгэ буты́р пал дава́;

²⁷ а джа́ упрэ́ пэ Фасгакиро вучипэ́н, и подыкх тырэ́ якхэ́нца кэ мо́рё (дэрья́в), и кэ паш-рат (северо), и кэ паш-дывэ́с (юго), и кэ васто́ко, и подыкх тырэ́ якхэ́нца, пал-дова́ со ту на проджаса пир дава́ Иорда́но;

²⁸ нэ дэ упхэныбэ́н Исусо́скэ (Ёхошуаскэ), и дэ зор лэ́скэ и зоралякир лэс дро ду́хо (фа́но); пал-дова́ со ёв явэ́ла анги́л адалэ́ манушэ́ндэ, и ёв роздэла лэ́нгэ пир миштыпна́скири ме́ра пхув, пэ сави́ ту подыкхэса.”

²⁹ И тэрдиям амэ пэ до́ло, проти Беф-Фегоро.