Яви́р Зако́но 23 - Библия - Пэ Балтитко Романи чиб (Романэс) 2019

Конэ́скэ Нашты́ тэ Явэл пэ Скэдыибэ́н

¹ Конэ́стэ ростасадэ ятры (муршканэ́ маса́), ци отчхиндло кова, одова́ нашты́ (на могинэ́ла) тэ заджа́л пэ Ра́скирэ-Дэвлэ́скирэ скэдыибэ́н.

² Кхэлбо (нададэскиро чхаво́) нашты́ тэ заджа́л пэ Ра́скирэ-Дэвлэ́скиро скэдыибэ́н, и дэ́што ро́до лэ́скиро нашты́ тэ заджа́л пэ Ра́скирэ-Дэвлэ́скиро скэдыибэ́н.

³ Амонитянино и Моавитянино нашты́ (на могинэ́на) тэ заджа́н пэ Ра́скирэ-Дэвлэ́скиро скэдыибэ́н, и лэ́нгиро дэ́што ро́до нашты́ тэ заджа́л пэ Ра́скирэ-Дэвлэ́скиро скэдыибэ́н дрэ ве́ки,

⁴ палдава́ со ёнэ на стрэниндлэ тумэн марэ́са и пане́са пэ дром, ке́ли тумэ́ гинэ́ Египто́стыр, и палдава́ со ёнэ лынэ́ проти тумэ́ндэ Валаамос, Веороскирэ чхавэ́с, Пефоростыр Месопотамиякирэстыр, соб (кай) ёв тэ прокошэл тут;

⁵ нэ Рай Дэвэ́л, Дэвэ́л тыро́, на закамдя́ тэ шунэ́л Валаамос, и обрискирдя Рай Дэвэ́л, Дэвэ́л тыро́ лэ́скиро прокошыбэ́н дро бахтякирибэ́н ту́кэ, пал-дова́ со ту сан дро́го Ра́скэ Дэвлэ́скэ, тырэ́ Дэвлэ́скэ.

⁶ На манг лэ́нгэ рама́нё (миро), и на бахталякир лэн дрэ сарэ́ тырэ́ дывэса́, дро ве́ко.

⁷ На дыкх вучипна́са (на брыдинпэ) пэ Идумеяниностэ, пал-дова́ со ёв исын тыро́ пшал; на дыкх вучипна́са пэ Египтяниностэ, пал-дова́ со ту са́нас яви пэ лэ́нгири пхув;

⁸ а чхаворэ́, савэ́ лэ́ндэ бияндёна дро три́то ро́до, сашты́ (могинэ́на) тэ заджа́н пэ Ра́скирэ-Дэвлэ́скиро скэдыибэ́н.

Жужыпэн дро Ста́но (Таборо)

⁹ Ке́ли ту джа́са дро дром пэ тырэ́ вэргэ́ндэ (врогэндэ), то ракхпэ сарэ́ чорипна́стыр.

¹⁰ Ко́ли ту́тэ явэ́ла вари-кон нажужо, со кэрдя́пэ лэ́са раты́, то мэк ёв тэ выджа́л яври́ станостыр и тэ на заджа́л дро ста́но,

¹¹ а ке́ли ячэ́ла бэльвэ́ль, то трэй лэ́скэ тэ обморэл пэ́скирэ маса́ пане́са, и сыр заджа́ла кхам, то ёв могинэ́ла тэ заджа́л палэ дро ста́но.

¹² Штэ́то исын банго́ тэ явэ́л ту́тэ пал ста́но, карик бы ту́кэ трэй тэ выджас;

¹³ апри́ч тыри́ курта́ла, трэй, соб (кай) тэ явэ́л ту́тэ рыдлёвкица; и ке́ли явэ́са тэ бэшэс пал ста́но, вы΄ганав ла́са ґанбинори, и нэвэ́с заганав ла́са тыро́ нажужыпэн.

¹⁴ Пал-дова́ со Рай Дэвэ́л, Дэвэ́л тыро́, псирэ́ла машки́р ста́но тыро́, соб (кай) тэ зракхэ́л тут и тэ отдэ́л вэргэ́н тырэ́н дрэ васта́ тырэ́, а палдава́ ста́но тыро́ банго́ тэ явэ́л свэ́нто, соб (кай) Ёв тэ на дыкхэ́л ту́тэ вари-со нажужо, и тэ на отджал ту́тыр.

¹⁵ На выдэ писхари́с лэ́скирэ хула́скэ, ке́ли ёв прастала сарэ́са кэ ту пэ́скирэ хуластыр;

¹⁶ мэк ёв тэ дживэ́л ту́тэ, машки́р тумэ́ндэ пэ штэ́то, саво́ ёв выкэдэ́ла дро вари-саво́ тырэ́ форье́ндыр, лэ́скэ явэ́ла пир ило́; на притасав лэс.

¹⁷ И, соб (кай) тэ на явэ́л биладжакуны джувлы́ Израилёскирэ чхаендыр, и нашты́, соб (кай) тэ явэ́л биладжакуно мурш Израилёскирэ чхавэ́ндыр.

¹⁸ На ян ловэ́ биладжакунэ́-джувлякирэ и тими́н джуклэскири дрэ Ра́скирэ-Дэвлэ́скиро, тырэ́ Дэвлэ́скиро Кхэр, ни пир сави́ совэ́л, пал-дова́ со адалэ́ дуйджинэ́ исын магирипэ́н анги́л Растэ-Дэвлэ́стэ, тырэ́ Дэвлэ́стэ.

¹⁹ На дэ дро ко́фо (тэл процэнто) пшалэ́скэ тырэ́скэ ни руп, ни маро́, ни вари-со яви́р, со сашты́ тэ отдэс дро ко́фо,

²⁰ явирэ рига́тыр манушэ́скэ дэ дро ко́фо, а тырэ́ пшалэ́скэ на дэ дро ко́фо, соб (кай) Рай Дэвэ́л, Дэвэ́л тыро́, тэ бахтякирэ́л тут дрэ саро́, со кэрэ́лапэ тырэ́ вастэ́нца, пэ пхув, пэ сави́ ту джа́са, соб (кай) тэ лэс ла пэ́скэ.

²¹ Ко́ли ту дэ́са совэ́л Ра́скэ-Дэвлэ́скэ, Дэвлэ́скэ тырэ́скэ, сы́гэс кэр кэ ко́нцо (кэ яго́ро) лэс, пал-дова́ со Рай Дэвэ́л, Дэвэ́л тыро́, пхучэла пал лэ́стэ ту́тыр, и пэ ту́тэ явэ́ла грэ́хо;

²² ко́ли ту на дыя́н совэ́л, тэды на явэ́ла пэ ту́тэ грэ́хо.

²³ Со выгия́ тырэ́ уштэндыр, ракх и кэр кэ ко́нцо (кэ яго́ро) адя́кэ, сыр ту дыя́н лав Ра́скэ-Дэвлэ́скэ, Дэвлэ́скэ тырэ́скэ, пир пэ́скири во́ля, саво́ пхэндя́н ту пэ́скирэ уштэ́нца.

²⁴ Ке́ли заджаса ту дро винагра́днико тырэ́ пашатунэскиро, ту сашты́ (могинэ́са) тэ хас му́ри чалэ́с, ци бут камэ́ла тыро́ ди, а дро кхоро́ (сасудо) тыро́ на чхув.

²⁵ Ке́ли ту явэ́са пэ жатва (счхиныбэн) тырэ́ пашатунэскири, куш колосы вастэ́нца тырэнца, нэ серпо (чхиндло́) на ян пэ жатва тырэ́ пашатунэскири.