Яви́р Зако́но 20 - Библия - Пэ Балтитко Романи чиб (Романэс) 2019

Пал Марибэна

¹ Ке́ли ту выджаса пэ марибэ́н проти тырэ́ вэргостэ (врогостэ) и ту явэ́са тэ дыкхэ́с грэн и марибны́тка вурдэна́ и манушэ́н буты́р сыр ту́тэ, тэды на дар лэ́ндыр, пал-дова́ со ту́са исын Рай Дэвэ́л, Дэвэ́л тыро́, Саво́ вылыджия́ тут Египто́скирэ пхувья́тыр.

² И явэ́ла адя́кэ, ке́ли джа́на тумэ́ пэ марибэ́н, тэды мэк тэ подджа́л раша́й, и тэ ракирэ́л манушэ́нгэ,

³ и тэ пхэнэ́л лэ́нгэ: “Шун, Израилё! Тумэ́ ададывэ́с джа́на пэ марибэ́н тумарэ́ вэргэнца, мэк тэ на кхинёл ило́ тумаро́, на дарэ́н, на издран, и на трашадён лэ́ндыр,

⁴ пал-дова́ со Рай Дэвэ́л, Дэвэ́л тумаро́, джа́ла тумэ́нца, соб (кай) тэ марэ́лпэ пал тумэ́ндэ тумарэ́ вэргэнца, и тэ выракхэл тумэн.”

⁵ Причхувибнарья [барыдыра́ пэ халадэ́ндэ-ю.о.], мэк тэ пхэнэ́н анги́л манушэ́ндэ, ракири́: “Кон чхудя́ нэво́ кхэр и на нэвякирдя лэс, одова́ мэк тэ джал и тэ рисёл дро пэ́скиро кхэр, соб (кай) ёв тэ на мэрэ́л пэ марибэ́н, и яви́р ману́ш тэ на нэвякирэл лэ́скиро кхэр;

⁶ и кон чхудя́ винагра́днико и на хая му́ри лэ́стыр, одова́ мэк тэ джал и тэ рисёл дро пэ́скиро кхэр, соб (кай) ёв тэ на мэрэ́л пэ марибэ́н и яви́р ману́ш тэ на хал му́ри лэ́скирэ винаградникостыр;

⁷ и кон ангрустындяпэ (зарэнчындяпэ) ромня́са и на лыя́ ла, одова́ мэк тэ джал и тэ рисёл дрэ пэ́скиро кхэр, соб (кай) тэ на мэрэ́л пэ марибэ́н, и соб (кай) яви́р ману́ш тэ на лэл лэскирья ромня́.”

⁸ Причхувибнарья [барыдыра́ пэ халадэ́ндэ-ю.о.] мэк тэ пхэнэ́н анги́л манушэ́ндэ, и пхэнэ́на: “Кон дарла (дарэ́ла) и нанэ муршкано́, одова́ мэк тэ джал и тэ рисёл дро пэ́скиро кхэр, соб (кай) ёв тэ на кэрэ́л намуршканэнца лэ́скирэ-пшалэнгирэ илэ, сыр лэ́скиро ило́.”

⁹ Ке́ли мануша́, савэ́ дыкхэ́на, пхэнэ́на саро́ дава́ манушэ́нгэ, тэды ёнэ исын бангэ́ тэ чхувэ́с халадэ́нгирэ барыдырэ́н, соб (кай) тэ лыджа́н манушэ́н пэ марибэ́н.

¹⁰ Ке́ли подджаса (явэ́са пашы́л) кэ фо́ро, соб (кай) тэ залэс лэс, то чхурдэ (пхэн) лав лэ́скэ пал рама́нё (миро);

¹¹ ко́ли ёв доракирэлапэ ту́са пэ рама́нё (миро) и отчхакирэла ту́кэ вудара́, тэды сарэ́ мануша́, савэ́ исын дрэ лэ́стэ, явэ́на тэ плэскирэн ту́кэ дань и тэ дынаринэ́н ту́кэ;

¹² ко́ли ёв на доракирэлапэ ту́са пэ рама́нё и явэ́ла тэ лыджа́л ту́са марибэ́н, тэды чхув осада трусця́л лэ́стэ,

¹³ и ке́ли Рай Дэвэ́л, Дэвэ́л тыро́, отдэ́ла лэс дрэ тырэ́ васта́, пропхусав лэ́стэ сарэ́ муршэ́н куртала́са;

¹⁴ екхэ джувле́н и чхаворэ́н, и кхэритконэ́ мурдалэ́н (ското), и саро́, со исын дро фо́ро, саро́ лэ́скиро дорэсыбэ́н лэ пэ́скэ, и лэ сыр трэй дорэсыбнастыр тырэ́ вэргэ́нгирэ, савэ́н отдыя́ ту́кэ Рай Дэвэ́л, Дэвэ́л тыро́;

¹⁵ адя́кэ кэр сарэ́ форьенца, савэ́ исын ту́тыр древа́н дур, савэ́ исын на адалэ́-манушэ́нгирэ фо́рья.

¹⁶ А дрэ адалэ́-манушэ́нгирэ фо́рья, савэ́ Рай Дэвэ́л, Дэвэ́л тыро́, дэ́ла ту́кэ, на ячкир джидо́ ние́кх ди.

¹⁷ А отдэ́ лэн прокошыбнаскэ: Хетеен и Амореен, и Хананеен, и Ферезеен, и Евеен, и Евусеен, сыр ракирдя́ ту́кэ Рай Дэвэ́л, Дэвэ́л тыро́,

¹⁸ соб (кай) ёнэ тэ на высыклякирэн тумэн тэ кэрэ́н дасавэ́ магирипэна, савэ́ ёнэ кэрдэ́ ваш пэ́скирэ дэвлорэ́нгэ, и соб (кай) тумэ́ тэ на кэрэ́н грэ́хо анги́л Растэ-Дэвлэ́стэ, Дэвлэ́стэ тумарэстэ.

¹⁹ Ко́ли баро́ часо ту явэ́са тэ рикирэс дрэ осада вари-саво́ фо́ро, соб (кай) лэс тэ лэс, тэды на хасякир лэ́скиро вэш, савэ́стыр сашты́ (можна) тэ чаравэспэ, и на чхучакир рига́, пал-дова́ со кашт (дрэ́во) пэ фэ́лда исын на ману́ш, соб (кай) могиндя́ тэ джал ту́тыр пэ штэ́то, кай исын осада.

²⁰ екх долэ́ кашта́, пал савэ́ ту джинэ́са, со ёнэ ничы́ на янэ́на дро хабэ́н, сашты́ тэ хасякирэс и тэ чингирэс, и тэ кэрэ́с зорало́ тыно проти фо́ро, саво́ лыджа́ла ту́са марибэ́н, пака ту заухтылэса лэс.