Яви́р Зако́но 19 - Библия - Пэ Балтитко Романи чиб (Романэс) 2019

Пал Фо́рья тэ Гарадён Набангэнгэ

¹ Ке́ли Рай Дэвэ́л, Дэвэ́л тыро́, хасякирэ́ла манушы́тка на́цыи (народы), савэнгири пхув дэ́ла ту́кэ Рай Дэвэ́л, Дэвэ́л тыро́, и ту прилэса мэкно́ миштыпэ́н пало́ (после) лэ́ндэ, и ту лэ́са тэ дживэ́с дрэ лэ́нгирэ фо́рья и кхэра́ лэ́нгирэ,

² то выкэдэ (отлэ) пэ́скэ трин фо́рья машки́р тыри́ пхув, сави́ Рай Дэвэ́л, Дэвэ́л тыро́, дэ́ла ту́кэ тэ хулаинэс;

³ кэр пэ́скэ дром, и роскэр (розделин) пэ трин паша́ сари́ тыри́ пхув, сави́ Рай Дэвэ́л, Дэвэ́л тыро́, дэ́ла ту́кэ дрэ миштыпна́скири ме́ра; ёнэ явэ́на ваш нашыбэн сваконэ (кажнонэ́) манушэ́скэ (умарибнарискэ).

⁴ И ґа́да, саво́ замарибнари (умарибнари) сашты́ (могинэ́ла) тэ нашэ́л одори́к и тэ ячэ́лпэ джидо́: кон замарэла пэ́скирэ пашатунэс наками, на сыс лэ́скэ вэ́рго (врого) тася́ и три́то дывэ́с;

⁵ одова́, кон джа́ла пэ́скирэ пашатунэса дро вэш тэ чингирэл кашта́, и замахнинэлапэ лэ́скиро васт товэрэса, соб (кай) тэ чингирэл вэш, и пэрэ́ла састы́р васторэстыр (товэришчатыр) и попэрла дрэ пашатунэстэ, и ёв мэрэ́ла, адасаво́ ману́ш мэк тэ нашэ́л дро екх фо́ро долэ́ форье́ндыр, соб (кай) тэ ячэ́лпэ ёв джидо́,

⁶ соб (кай) ману́ш, саво́ явэ́ла тэ отхал палэ (тэ отомстинэл) пал рат дрэ лэ́скири холы́ тэ на традэлпэ пал замарибнаристэ (умарибнаристэ) и тэ на дотрадэл лэс, ко́ли дур явэ́ла дром, и тэ на замарэ́л лэс, машки́р дова́, сыр ёв исын намол сэндоскэ пэ мэрибэ́н, пал-дова́ со ёв на сыс вэ́рго лэ́скэ тася́ и три́то дывэ́с;

⁷ пир саро́ мэ дыём ту́кэ упхэныбэ́н, ракири́: “Выкэдэ ваш пэ́скэ трин фо́рья.”

⁸ Ке́ли Рай Дэвэ́л, Дэвэ́л тыро́, кэрэ́ла барэды́р тыри́ пхув, сыр Ёв совлахадя́ тырэ́ дадэ́нгэ, и дэ́ла ту́кэ сари́ пхув, пал сави́ Ёв дыя́ лав тэ дэл тырэ́ дадэ́нгэ,

⁹ ко́ли ту явэ́са тэ причхувэс зор тэ кэрэ́с саро́ пир сарэ́ далэ́ припхэныбэна́ (дэшэнгирья), пал савэ́ мэ ракира́ва ададывэ́с ту́кэ, тэ рикирэс дро ило́ сыр Дро́гима Рас-Дэвлэ́с, Дэвлэ́с тырэ́с, и тэ псирэ́с дрэ сарэ́ дывэса́ Лэ́скирэ дромэ́нца, тэды кэ далэ́ трин фо́рья дочхув ишчо (инкэ́) трин фо́рья,

¹⁰ соб (кай) тэ на прочхувэлпэ рат Манушэ́скиро, саво́ на банго́ машки́р тыри́ пхув, сави́ Рай Дэвэ́л, Дэвэ́л тыро́, дэ́ла ту́кэ дрэ миштыпна́скири ме́ра, и соб (кай) тэ на явэ́л пэ ту́тэ ратэскири банг.

¹¹ Нэ ко́ли вари-кон явэ́ла вэргоса (врогоса) пэ́скирэ пашатунэскэ и явэ́ла тэ подракхэл лэс, и ґаздэ́лапэ пэ лэ́стэ и замарла лэс кэ мэрибэ́н, и нашэла дро екх фо́ро долэ́ форье́ндыр,

¹² тэды лэ́скирэ-форо́скирэ шэралэ́ исын бангэ́ тэ бичхавэн, соб (кай) тэ лэн лэс одотхы́р и тэ отдэс лэс дрэ васта́ манушэ́скэ, саво́ отхала (отомстинэла) палэ пал рат, соб (кай) ёв тэ мэрэ́л;

¹³ мэк тэ на тангинэ́л лэс тыри́ якх; вымор манушэ́скиро рат Израилёстыр, саво́ исын набанго, и явэ́ла ту́кэ шука́р.

Миштыпнаскирэ Ме́жы

¹⁴ На пириджа ме́жа тырэ́ пашатунэскирэ, сави́ чхудэ́ тырэ́-дадэнги́рэ дада́ дрэ тыри́ миштыпна́скири ме́ра, сави́ дояцяпэ ту́кэ пэ пхув, сави́ Рай Дэвэ́л, Дэвэ́л тыро́, дэ́ла ту́кэ.

Зако́но пал Якхитконэндэ

¹⁵ На ухтылэ́ла (на́доси) екхэ-якхитконэс (свидетелёс) проти вари-конэ́стэ дрэ вари-сави́ банг, и дро вари-саво́ грэ́хо, саво́ ёв кэрдя́: пашы́л дуе-якхитконэнгирэ лава́, ци пашы́л тринэ́-якхитконэнгирэ лава́, явэ́ла рэ́ндо.

¹⁶ Ко́ли выштавэла проти конэ́стэ начачуно якхи́тко, кэри лэс бангэса,

¹⁷ то тэды, мэк тэ явэ́н дуй адалэ́ мануша́, савэ́ чингардэнапэ, анги́л Растэ-Дэвлэ́стэ, анги́л рашандэ и анги́л сэндарьендэ, савэ́ явэ́на дрэ долэ́ дывэса́;

¹⁸ сэнда́рья исын бангэ́ миштэ́с тэ роскэдэнпэ, и, ко́ли якхи́тко одова́ явэ́ла хохано́, и хохаибэ́н пхэндя́ пэ пэ́скирэ пшалэ́стэ,

¹⁹ то кэрэ́н лэ́скэ дова́, со ёв камдя́ тэ кэрэ́л пэ́скирэ пшалэ́скэ; и адя́кэ вытрадэ фуипэ́н пэ́стыр;

²⁰ и яви́р шунэ́на, и страхадёна, и на явэ́на буты́р тэ кэрэ́н дасаво фуипэ́н машки́р ту́тэ;

²¹ мэк тэ на тангинэ́л лэс тыри́ якх: ди пал ди, якх пал якх, данд пал данд, васт пал васт, ґэро́й пал ґэро́й.