Яви́р Зако́но 18 - Библия - Пэ Балтитко Романи чиб (Романэс) 2019

Пал Левитэндэ

¹ Левитэ́нгирэ рашангэ, сарэ́ Левиёскирэ родыцо́скэ, на явэ́ла паш и миштыпна́скири ме́ра Израилёса: ёнэ исын бангэ́ тэ чалякирэнпэ свэнтонэ́ яныбнастыр Ра́скэ-Дэвлэ́скэ и Лэ́скирэ пашэ́са;

² и миштыпна́скири ме́ра на явэ́ла лэ́нгэ машки́р лэ́скирэ пшалэ́ндэ: Кокоро́ Рай Дэвэ́л исын лэ́нгири миштыпна́скири ме́ра, сыр ракирдя́ Ёв лэ́нгэ.

³ И, акэ, со трэй тэ явэ́л чхудо рашангэ манушэ́ндыр, савэ́ янэ́на дрэ свэ́нто дыибэ́н Ра́скэ-Дэвлэ́скэ гурувэ́н ци бакрэ́н: ёнэ исын бангэ́ тэ отдэ́н раша́скэ псико́, жанды (пашчонки) и кужум (жэлудко);

⁴ адя́кэ-паць и пэ́рва барьякирдэ́ (начатки) марэстыр тырэстыр, моля́тыр (виностыр) тырьятыр и елеёстыр тырэстыр, и пэ́рва балытка тырэ́ бакрэ́нгирэ вылна́тыр отдэ́ лэ́скэ, Левитоскэ,

⁵ пал-дова́ со лэс выкэдыя́ Рай Дэвэ́л, Дэвэ́л тыро́, сарэ́ родыцо́стыр тырэстыр, соб (кай) ёв тэ тэрдёл анги́л Растэ-Дэвлэ́стэ, Дэвлэ́стэ тырэстэ, тэ дынаринэ́л Ра́скирэ-Дэвлэ́скирэ лавэ́са, кокоро́ и лэ́скирэ чхавэ́ дрэ сарэ́ дывэса́.

⁶ И ко́ли Левито явэ́ла екхэ тырэ́ штэто́стыр, сарэ́ Израилёскирэ-чхавэ́нгирэ пхувья́тыр, ёв дживдя́, и явэ́ла пир пэ́скирэ-дескиро выкэдыибэн пэ штэ́то, саво́ выкэдэ́ла Рай Дэвэ́л,

⁷ и ёв явэ́ла тэ дынаринэ́л лавэ́са ваш Ра́скэ-Дэвлэ́скэ, пэ́скирэ Дэвлэскирэскэ, сыр и сарэ́ лэ́скирэ пша́ла, Леви́ты, савэ́ исын тэрдэ́ одо́й анги́л Растэ Дэвлэ́стэ,

⁸ то тэды мэк ёнэ тэ лэн кадасавэ́ паша́ сыр яви́р Леви́ты, апри́ч дова́, со ёнэ дорэснэ́ дадэ́скирэ барвалыпнастыр, сыр ёнэ бикиндлэ лэс.

Ракхэ́н Пэс Налачхэ́ Присыкляибнастыр

⁹ Ке́ли ту заджаса пэ пхув, сави́ дэ́ла ту́кэ Рай Дэвэ́л, Дэвэ́л тыро́, тэды на сыклёв тэ кэрэ́с магирипэ́н, савэ́ кэрдэ́ одолэ́ мануша́:

¹⁰ нашты́, соб (кай) тэ явэ́л ту́тэ ману́ш, саво́ пролыджала пэ́скирэ чхавэ́с, ци пэскирья́ чха пирда́л яг, зумакирибнаскиро, драбакирибнари, човахано,

¹¹ калэ́-магитко (обаятелё), кон выкхарэла ду́хи, знахарё, мулэнгиро човахано;

¹² пал-дова́ со магирдо́ тэ явэ́л анги́л Растэ-Дэвлэ́стэ кажно (сва́ко), кон кэрэ́ла дава́, и пал далэ́ магирипэна Рай Дэвэ́л, Дэвэ́л тыро́, традэ́ла криг лэн тырэ́ мо́стыр;

¹³ яв бидошакиро анги́л Растэ-Дэвлэ́стэ, Дэвлэ́стэ тырэстэ;

¹⁴ пал-дова́ со адалэ́ мануша́, савэ́н ту традэса криг, шунэ́на драбакирибнарьен пир болыбэ́н (чэргэня́), зумакирибнаскирэн, а ту́кэ на дова́ дыя́ Рай Дэвэ́л, Дэвэ́л тыро́.

¹⁵ Пророко́с машки́р ту́тэ, тырэ́ пшалэ́ндыр, сыр ман, дэ́ла ту́кэ Рай-Дэвэ́л, Дэвэ́л тыро́, Лэс шунэ́н, –

¹⁶ адя́кэ сыр ту мангдян Ра́стыр-Дэвлэ́стыр, тырэ́ Дэвлэ́стыр, пашы́л Хориво пэ скэдыибнаскиро дывэ́с, ракири́: “Мэ буты́р на шунава Ра́скирэ-Дэвлэ́скирэ, мирэ́ Дэвлэ́скири зан (глос), и дая́ бари яг мэ буты́р на дыкха́в, соб (кай) ма́нгэ тэ на мэрав.”

¹⁷ И пхэндя́ ма́нгэ Рай Дэвэ́л: “Мишто́ дова́, со ёнэ ракирдэ́.

¹⁸ Мэ да́ва лэ́нгэ Пророко́с лэ́нгирэ пшалэ́ндыр, адасавэс сыр ту, и чхува́ва лава́ Мирэ́ дрэ Лэ́скирэ ушта́, и Ёв явэ́ла тэ ракирэ́л лэ́нгэ саро́, со Мэ пхэна́ва Лэ́скэ;

¹⁹ а кон на явэ́ла тэ шунэ́л Мирэ́ лава́, савэ́ одова́ проро́ко явэ́ла тэ ракирэ́л Мирэ́ лавэ́са, одова́ отпхэнэ́ла Ма́нгэ.

²⁰ Нэ, пророко́с, саво́ явэ́ла муршкано́ тэ ракирэ́л Мирэ́ лавэ́са дова́, со Мэ на пхэндём лэ́скэ тэ ракирэ́л, и саво́ явэ́ла тэ ракирэ́л явирэ-дэвлорэнгирэ лавэ́са, адасавэс пророко́с отдэ́н мэрибна́скэ.”

²¹ И ко́ли пхэнэ́са дро ило́ тыро́: “Сыр амэ уджинаса лав, саво́ на Рай Дэвэ́л ракирдя́?”

²² Ко́ли проро́ко пхэнэ́ла Ра́скирэ-Дэвлэ́скирэ лавэ́са, нэ лав дова́ на явэ́ла дро чачипэ́н, и на кэрэ́лапэ, тэды на Рай Дэвэ́л ракирдя́ дава́ лав, нэ ракирдя́ дава́ проро́ко пир пэ́скири нахратыма, на дар лэ́стыр.