Яви́р Зако́но 16 - Библия - Пэ Балтитко Романи чиб (Романэс) 2019

Пал Патради́

¹ Дыкх патыва́са пэ чхон Авиво, и свэнкин Патради́ Ра́скирэ-Дэвлэ́скири, Дэвлэ́скири тырэскири, пал-дова́ со дро чхон Авиво вылыджия́ тут Рай Дэвэ́л, тыро́ Дэвэ́л раты́ Египто́стыр.

² И зачхин Патради́ (патрадитконэ бакрорэс) Ра́скэ-Дэвлэ́скэ, Дэвлэ́скэ тырэ́скэ, тыкнэ́ и барэ́ кхэритконэ́ мурдалэстыр пэ штэ́то, саво́ выкэдэ́ла Рай Дэвэ́л, соб (кай) тэ явэ́л одо́й лав Лэ́скиро.

³ На ха ла́са шутло (квасно); эфта́ (битринэ́нгиро дэш) дывэса́ ха ла́са опресноки, дава́ исын маро́ бидакиро, пал-дова́ со ту сыгныпнаса выгиян Египто́скирэ пхувья́тыр, соб (кай) ту тэ рипирэс пэ́скиро выгиибнаскиро дывэ́с Египто́скирэ пхувья́тыр дрэ сарэ́ тырэ́ джиибна́скирэ дывэса́.

⁴ Нашты́, соб (кай) тэ явэ́л ту́тэ нисо́ шутло дрэ сари́ тыри́ миштыпна́скири ме́ра дрэ сарэ́ эфта́ дывэса́, и мас, саво́ ту яндян дрэ свэ́нто дыибэ́н Ра́скэ-Дэвлэ́скэ бэльвэле́ дро пэ́рво дывэ́с, нисо́ нашты́ тэ ячэ́лпэ кэ ра́нко (кэ зло́ко).

⁵ Нашты́, соб (кай) ту тэ зачхинэс Патради́ дро кхэр, саво́ Рай Дэвэ́л, Дэвэ́л тыро́, дэ́ла ту́кэ;

⁶ нэ пэ екх дова́ штэ́то, саво́ выкэдэ́ла Рай Дэвэ́л, Дэвэ́л тыро́, соб (кай) тэ явэ́л одо́й лав Лэ́скиро, зачхин Патради́ бэльвэле́, анги́л кхамэскиро загиибэ́н, дрэ дова́-паць часо (цы́ро), дро саво́ ту выгиян Египто́стыр;

⁷ и пэк и ха пэ дова́ штэ́то, саво́ выкэдэ́ла Рай Дэвэ́л, Дэвэ́л тыро́, а пэ яви́р дывэ́с ту сашты́ (могинэ́са) тэ рисёс и тэ заджас дрэ тырэ́ ша́тры.

⁸ Шов дывэса́ ха пресна марэ́, а пэ эфта́то дывэ́с свэ́нто скэдыибэ́н Ра́скэ-Дэвлэ́скэ, тырэ́ Дэвлэ́скэ; на залэпэ бутяса.

Пал Свэ́нки Эфтангирья, Кушчэнгирэ

⁹ Эфтангирья (седмицы) отгин пэ́скэ; лэ тэ гинэс эфта́ эфтангирья долэ́ дывэсэ́ндыр, сыр явэ́ла серпо (чхиндло́) тэ укэдэл;

¹⁰ тэды свэнкин свэ́нко эфтангирьенгиро Ра́скэ-Дэвлэ́скэ, Дэвлэ́скэ тырэ́скэ, пир зор тырэ́ вастэскиро, ци бут ту дэ́са, дыкхи́ пир дова́, со́са бахтякирэ́ла тут Рай Дэвэ́л, Дэвэ́л тыро́;

¹¹ и ра́дынпэ анги́л Растэ-Дэвлэ́стэ, Дэвлэ́стэ тырэстэ, ту, и тыро́ чхаво́, и тыри́ чхай, и тыро́ писха́ри, и тыри́ писхарица, и Левито, саво́ исын дро тыро́ кхэр, и ману́ш, саво́ явдя́, и пирото (сирота), и пивлы (удова), савэ́ исын машки́р ту́тэ, пэ штэ́то, саво́ выкэдэ́ла Рай Дэвэ́л, Дэвэ́л тыро́, соб (кай) тэ явэ́л одо́й лав Лэ́скиро;

¹² ри́пир, со и ту са́нас писха́ри дро Еги́пто, и ракх, и кэр саро́ пир далэ́ упхэныбэна́.

Пал Свэ́нко Кушчэнгиро

¹³ Свэ́нко кушчэнгиро кэр пэ́стэ эфта́ дывэса́, ке́ли укэдэса саро́ тырэ́ шурнатыр (гумностыр), и тырэ́ пресостыр;

¹⁴ и ра́дынпэ пэ свэ́нко тыро́ ту, и тыро́ чхаво́, и тыри́ чхай, и дына́ри тыро́, и дына́рица тыри́, и Левито, и ману́ш, саво́ явдя́, и пирото (сирота), и пивлы (удова), савэ́ исын дрэ тырэ́ кхэра́;

¹⁵ эфта́ (битринэ́нгиро дэш) дывэса́ свэнкин Ра́скэ-Дэвлэ́скэ, Дэвлэ́скэ тырэ́скэ, пэ штэ́то, саво́ выкэдэ́ла Рай Дэвэ́л, тыро́ Дэвэ́л; пал-дова́ со бахтякирэ́ла тут Рай Дэвэ́л, Дэвэ́л тыро́, дрэ сарэ́ тырэ́ бутя́, и дро кажно тырэ́-вастэнгиро рэ́ндо, и ту явэ́са екх со тэ радынэспэ.

¹⁶ Трин мо́лы дро бэрш сарэ́ мурша́ исын бангэ́ тэ явэ́н анги́л Ра́скирэ-Дэвлэ́скиро, тырэ́ Дэвлэ́скиро муй, пэ штэ́то, саво́ выкэдэ́ла Ёв: пэ свэ́нко опреснокэнгиро, пэ свэ́нко эфтангирьенгиро и пэ свэ́нко кушчэнгиро; и никонэ́скэ нашты́, соб (кай) тэ явэ́л анги́л муй Ра́скирэ-Дэвлэ́скиро чхучэ́ вастэ́нца,

¹⁷ нэ кажно (сва́ко) тэ явэ́л дро пэ́скиро васт дароса, дыкхи́ пир Ра́скирэ-Дэвлэ́скиро, тырэ́-Дэвлэ́скиро бахтякирибэ́н, саво́ Ёв дыя́ ту́кэ.

¹⁸ Дрэ сарэ́ тырэ́ кхэра́, савэ́ Рай Дэвэ́л, Дэвэ́л тыро́, дэ́ла ту́кэ, чхув пэ́скэ сэндарьен и ракхибнарьен пир тырэ́ ро́дыцы, соб (кай) ёнэ тэ сэндякирэн манушэ́н чачунэ́ сэндоса;

¹⁹ на пирикрэнцын Зако́но, на дыкх пэ муя́, и на лэ почастунко (да́ро), пал-дова́ со почастунко корьякирэла годьварэнгирэ якха́ и пирикрэнцынэла чачунэнгиро лава́;

²⁰ чачипэ́н, ро́дэ чачипэ́н, соб (кай) ту тэ явэс джидо́, и тэ явэ́л ту́тэ пхув, сави́ Рай Дэвэ́л, Дэвэ́л тыро́, дэ́ла ту́кэ.

²¹ На почхув дрэ пхув вэшорэ вари-савэ́ каштэндыр (дрэвэндыр) пашы́л свэ́нто яныбнаскиро штэ́то тырэ́ Ра́скэ-Дэвлэ́скэ, саво́ ту кэрэ́са пэ́скэ,

²² и на чхув пэ́скэ свэ́нто сты́лбо [вэлади́н/рошча-р.с.], со древа́н холякирэла Рас-Дэвлэ́с, Дэвлэ́с тырэ́с.