Яви́р Зако́но 15 - Библия - Пэ Балтитко Романи чиб (Романэс) 2019

Палэ Длуги (Вужлыпэна)

¹ Пэ эфта́то (битринэ́нгиро дэ́што) бэрш змэк (дарин) вужлыпэ́н (длуго).

² Тэ змэкэс вужлыпэ́н исын дрэ дова́, соб (кай) кажно (сва́ко) ману́ш, саво́ дэ́ла дро длуго пэ́скирэ пашатунэскэ, тэ змэкэл (тэ даринэл) вужлыпэ́н и тэ на пхучэлпэ пэ́скирэ пашатунэстыр ци пэ́скирэ пшалэстыр, пал-дова́ со дыно́ тэ змэкэл вужлыпэ́н ваш Ра́скэ-Дэвлэ́скэ;

³ манушэ́стыр явирэ рига́тыр пхучпэ, а со явэ́ла тырэ́ пшалэ́стэ тырэстэ, змэк лэ́скэ.

⁴ Нэ ние́кх тэ на явэ́л ту́тэ бо́го: пал-дова́ со бахтякирэ́ла тут Рай Дэвэ́л пэ доя́ пхув, сави́ Рай Дэвэ́л, Дэвэ́л тыро́, дэ́ла ту́кэ дрэ миштыпна́скири ме́ра, со ту лыян ла сыр мэкно́ миштыпэ́н,

⁵ ко́ли ту явэ́са тэ шунэ́с Ра́скирэ-Дэвлэ́скири, тырэ́-Дэвлэ́скири зан, и тэ причхувэс зор тэ сполнинэс сарэ́ далэ́ припхэныбэна́, савэ́ мэ ададывэ́с ракира́ва ту́кэ;

⁶ пал-дова́ со Рай Дэвэ́л, тыро́ Дэвэ́л, бахтякирэ́ла тут, сыр Ёв ракирдя́ ту́кэ, и ту явэ́са тэ дэс дро вужлыпэ́н бутэнгэ манушэ́нгэ, а ту кокоро́ на явэ́са тэ лэс дро длуго; и хула́й ту явэ́са пэ бутэ́ манушэ́ндэ, а ёнэ пэ ту́тэ на явэ́на хулая́.

⁷ Ко́ли явэ́ла ту́тэ чороро́ вари-кон тырэ́ пшалэ́ндыр, пэ тыри́ пхув, сави́ Рай Дэвэ́л, Дэвэ́л тыро́, дэ́ла ту́кэ, тэды на холякир тыро́ ило́ и на [на гарав-ю.о.] тасав тыро́ васт анги́л тырэ́ чорорэ́ пшалэ́стэ,

⁸ нэ отчхакир лэ́скэ тыро́ васт и дэ лэ́скэ дро вужлыпэ́н, дыкхи́ пир лэ́скири трэ́бима, со лэ́скэ на ухтылэ́ла (на́доси);

⁹ ракхпэ, соб (кай) тэ на заджа́л дрэ тыро́ ило́ налачхи дума: “Явэ́ла (подджа́ла сыг) эфта́то бэрш, бэрш тэ змэкав вужлыпэ́н”, и, соб (кай) долэ́стыр тыри́ якх тэ на кэрэ́лпэ холями кэ чороро́ тыро́ пшал, и ту тэ на отпхэнэс лэ́скэ; пал-дова́ со ёв явэ́ла тэ дэл го́дла ту́тэ кэ Рай Дэвэ́л, и явэ́ла пэ ту́тэ грэ́хо;

¹⁰ дэ лэ́скэ дро вужлыпэ́н, и, ке́ли явэ́са тэ дэс лэ́скэ, нашты́, соб (кай) тэ тангинэ́л (тэ жалинэл) тыро́ ило́, пал-дова́ со пал дова́ бахтякирэ́ла тут Рай Дэвэ́л, тыро́ Дэвэ́л, дрэ сарэ́ рэ́нды тырэ́ и дро саро́, со явэ́на тэ кэрэ́н тырэ́ васта́;

¹¹ пал-дова́ со чорорэ́ ўса́ды (сак) явэ́на машки́р тыри́ пхув, палдава́ мэ и ракира́ва ту́кэ: “Отчхакир васт тыро́ тырэ́ пшалэ́скэ, чорорэскэ тырэ́скэ и богоскэ тырэ́скэ пэ тыри́ пхув.”

¹² Ко́ли бикнэлапэ ту́кэ тыро́ пшал, Юдос, ци Юдыца, тэды шов бэрш банго́ исын ёв тэ явэ́л сыр дына́ри ту́кэ, а пэ эфта́то бэрш отмэк лэс пэ́стыр пэ во́ля;

¹³ ке́ли явэ́са тэ отмэкэс лэс пэ́стыр пэ во́ля, на мэк лэс чхучэ́ (пустонэ) вастэ́нца,

¹⁴ нэ дэ лэ́скэ тырэ́ стадатыр, тырэ́ гумностыр и тырэ́ пресостыр: дэ лэ́скэ, со́са бахтякирдя́ тут Рай Дэвэ́л, Дэвэ́л тыро́:

¹⁵ ри́пир, со и ту са́нас писхариса пэ Египто́скири пхув, и зракхця́ тут Рай Дэвэ́л, тыро́ Дэвэ́л, палдава́ мэ ададывэ́с и ракира́ва дава́ ту́кэ.

¹⁶ Ко́ли ёв пхэнэ́ла ту́кэ: “На джа́ва мэ ту́тыр, палдава́ со ту ма́нгэ сан дро́го и тыро́ кхэр”, пал-дова́ со мишто́ исын лэ́скэ ту́тэ,

¹⁷ тэды лэ ярь (шыло), и пропхусав лэ́скиро кан кэ вуда́р; и явэ́ла ёв тыро́ писха́ри пэ ве́ко. Адя́кэ кэр и тырэ́ дынарицаса.

¹⁸ На гин дава́ ваш пэ́скэ пхарипнаса, со ту сан банго́ (мусинэса) тэ отмэкэс лэс пэ́стыр пэ во́ля, пал-дова́ со ёв пал шов бэрш закэрдя ту́кэ дрэ дуй мо́лы буты́р сыр плэскирибэн бутярнэскэ, саво́ ту́тэ сыс налыно; и бахтякирэ́ла тут Рай Дэвэ́л, Дэвэ́л тыро́, дрэ саро́, со ту явэ́са тэ кэрэ́с.

¹⁹ Саро́ англатуно́ бияныпнаскиро муршытко, со бияндёла барэ́ тырэ́ барэ́ мурдалэ́ндыр и тыкнэ́ кхэритконэ́ тырэ́ мурдалэ́ндыр, отдэ́ Ра́скэ-Дэвлэ́скэ, Дэвлэ́скэ тырэ́скэ: на кэр буты́ пэ англатунэ́ (пэрвонэ́) бияныпнаскирэ гурувэстэ тырэстэ, и на обчхин англатунэ́ бияныпнаскирэс тырэ́ тыкнэ́ кхэритконэ́ мурдалэ́ндыр;

²⁰ кажно бэрш ха дава́, ту и тыри́ чэ́карь (семейство) анги́л Растэ-Дэвлэ́стэ, Дэвлэ́стэ тырэстэ, пэ штэ́то, саво́ выкэдэ́ла Рай Дэвэ́л.

²¹ Ко́ли явэ́ла пэ лэ́стэ дош, лангало, ци короро́, ци яви́р вари-сави́ дош, тэды на лы́джа лэс дрэ свэ́нто яныбэ́н Ра́скэ-Дэвлэ́скэ, тырэ́скэ Дэвлэ́скэ,

²² нэ ту́кэ сашты́ (можна) тэ хас дава́ дро кхэр тыро́, жужо́ и нажужо сашты́ тэ хал лэс, сыр серна (мирга), адя́кэ-паць и оленёс.

²³ екх лэ́скиро рат на ха; вычхув лэс пэ пхув, сыр пани́.