Яви́р Зако́но 12 - Библия - Пэ Балтитко Романи чиб (Романэс) 2019

Кай тэ Мангэ́нпэ Дэвлэ́скэ

¹ Акэ, исын упхэныбэна́ и зако́ны, савэ́ тумэ́нгэ трэй тэ причхувэ́н зор тэ кэрэ́н кэ ко́нцо/яго́ро (тэ сполнинэн пэ пхув), сави́ Рай Дэвэ́л тырэ́-дадэ́нгиро Дэвэ́л дэ́ла ту́кэ дро хулаибэн, пэ сарэ́ дывэса́, савэ́ тумэ́ явэ́на тэ дживэ́н пэ доя́ пхув.

² Розмарэн сарэ́са (пэ котэра́) сарэ́ штэ́ты, кай исын манушы́тка на́цыи (народы), пэ савэ́ндэ тумэ́ лэ́на лофо (власть), и савэ́ дынариндлэ́ пэ́скирэ дэвлорэ́нгэ, пэ вучэ́ бэ́рги, и пэ бэ́ргицы, и тэл кажно кашт (дрэ́во) ранденца;

³ и роспхагирэн лэ́нгирэ алта́ри, и пхагирэн лэ́нгирэ сты́лбы, и хачкирэ́н яга́са лэ́нгирэ вэладиня (рошчы), и розмарэн лэ́нгирэ-дэвлорэнгирэ истуканы, и протрадэн лэ́нгиро лав долэ́ штэто́стыр.

⁴ Тумэ́нгэ нашты́ тэ кэрэ́н дова́ ваш Ра́скэ-Дэвлэ́скэ, Дэвлэ́скэ тумарэскэ.

⁵ Нэ пэ штэ́то, саво́ выкэдэ́ла Рай Дэвэ́л, Дэвэ́л тумаро́, сарэ́ тумарэ́ родыцэндыр, соб (кай) тэ явэ́л Лэ́скиро Лав одо́й, родэ́н Лэс одо́й и явэ́н одори́к,

⁶ и одори́к янэ́н тумарэ́ цэ́ла схачкирибэна, и тумарэ́ свэ́нта дыибэна́ Ра́скэ-Дэвлэ́скэ, и тумарэ́ дэшэнгирья (десятины), и тумарэ́ вастэнгиро ґаздыпэн, и тумарэ́ совэла, и тумаро́ яныбэ́н пир пэ́скиро ило́, и англатунэн (пэрвонэ́ бияндлэн) тумарэ́ барэ́ и тыкнэ́ тумарэ́ кхэритконэ́ мурдалэ́ндыр (ското́стыр);

⁷ и тумэ́ хан одо́й анги́л Растэ-Дэвлэ́стэ, Дэвлэ́стэ тумарэстэ, и радынэ́нпэ тумэ́ и чэ́карья (семействы) тумарэ́, пал саро́, со кэрдэ́ тумарэ́ васта́, со́са бахтякирдя́ тумэн Рай Дэвэ́л, Дэвэ́л тыро́.

⁸ Одо́й тумэ́нгэ нашты́ тэ кэрэ́н саро́, сыр ада́й амэ акана́ кэра́са, кажно, пир пэ́скири годы́, со лэ́скэ здэлапэ чачипна́са;

⁹ пал-дова́ со тумэ́ акана́ ишчо (инкэ́) на загинэ́ пэ штэ́то тэ откхинён и пэ пхув дрэ миштыпна́скири ме́ра тэ прилэ́н, сави́ Рай Дэвэ́л, Дэвэ́л тыро́, дэ́ла ту́кэ.

¹⁰ Нэ ке́ли тумэ́ пириджана Иорда́но и лэ́на тэ дживэ́н пэ пхув, сави́ Рай Дэвэ́л, Дэвэ́л тумаро́, дэ́ла тумэ́нгэ дрэ миштыпна́скири ме́ра тэ прилэ́н, и ке́ли Ёв штылякирэла тумэн сарэ́ тумарэ́ вэргэ́ндыр, савэ́ явэ́на пашы́л тумэ́ндэ, и тумэ́ явэ́на тэ дживэ́н би трашакиро (би дара́киро),

¹¹ то тэды, саво́ штэ́то выкэдэ́ла Рай Дэвэ́л, Дэвэ́л тумаро́, соб (кай) тэ явэ́л лав Лэ́скиро одо́й, одори́к янэ́н саро́, со мэ пхэна́ва тумэ́нгэ: тумарэ́ цэ́ла схачкирибэна и тумарэ́ свэ́нта дыибэна́ Ра́скэ-Дэвлэ́скэ, тумарэ́ дэшэнгирья (десятины) и тумарэ́ вастэнгиро ґаздыпэн, и саро́, со исын выкэдымо фэды́р пир тумарэ́ совэла, пал со тумэ́ дынэ́ лав Ра́скэ-Дэвлэ́скэ;

¹² и радынэ́нпэ анги́л Растэ-Дэвлэ́стэ, Дэвлэ́стэ тумарэстэ, тумэ́ и тумарэ́ чхавэ́, и тумарэ́ чхая́, и тумарэ́ писха́рья, и тумарэ́ писхарицы, и Левито, саво́ исын машкира́л тумарэ́ кхэра́, пал-дова́ со нанэ лэ́скэ паш и миштыпна́скири ме́ра тумэ́нца.

¹³ Ракхпэ тэ янэс тыро́ цэ́ло схачкирибэ́н пэ кажно штэ́то, саво́ ту дыкхэ́са;

¹⁴ нэ пэ екх пэ дова́ штэ́то, саво́ выкэдэ́ла Рай Дэвэ́л дрэ екх тырэ́ родыцо́стыр, ян тыро́ цэ́ло схачкирибэ́н, и кэр саро́, со Мэ ракира́ва ту́кэ.

¹⁵ Нэ ко́ли закамэ́ла ди тыро́, ту́кэ сашты́ (можна) тэ зачхинэс и тэ хас, пир Ра́скирэ-Дэвлэ́скиро, тырэ́ Дэвлэ́скиро бахтякирибэ́н, мас, саво́ Ёв дыя́ ту́кэ, дрэ сарэ́ тырэ́ кхэра́: нажужо и жужо́ сашты́ (можна) тэ хан дава́, сыр серна и сыр оленёс;

¹⁶ екх рат на хан: пэ пхув вычхувэн лэс, сыр пани́.

¹⁷ Нашты́ ту́кэ тэ хас дрэ тырэ́ кхэра́ дэшэнгирья тырэ́ марэстыр, и мол (вино) тыри́ и елеё тыро́, и тырэ́ барэ́ мурдалэнгирэн (скотоскирэ) англатунэн и тырэ́ тыкнэ́ мурдалэнгирэн, и сарэ́стыр, пэ со исын тырэ́ совэла, савэ́ ту совлахадян и яныбэ́н пир пэ́скиро ило́, и тырэ́ вастэнгирэ ґаздыпнастыр;

¹⁸ нэ ха дава́ анги́л Растэ-Дэвлэ́стэ, тырэ́ Дэвлэ́стэ, пэ дова́ штэ́то, саво́ выкэдэ́ла Рай Дэвэ́л, тыро́ Дэвэ́л, – ту и тыро́ чхаво́, и тыри́ чхай, и тыро́ писха́ри, и тыри́ писхарица, и Левито, и ману́ш, саво́ явдя́ тэ дживэ́л дрэ тырэ́ кхэра́, и ра́дынпэ анги́л Растэ-Дэвлэ́стэ, тырэ́ Дэвлэ́стэ, пал саро́, со кэрдэ́ тырэ́ васта́.

¹⁹ Дыкх, на ячкир Левитос дрэ сарэ́ дывэса́, савэ́ явэ́са тэ дживэ́с пэ тыри́ пхув.

²⁰ Ке́ли Рай Дэвэ́л, Дэвэ́л тыро́, розбуґлякирэла тырэ́ ме́жы, сыр Ёв ракирдя́ ту́кэ, и ту пхэнэ́са: “Хава мэ мас”, пал-дова́ со ди тыро́ закамэ́ла тэ хал мас, – то тэды, пир тырэ́-дескири ра́дыма, ха мас.

²¹ Ко́ли дур явэ́ла ту́тыр дова́ штэ́то, саво́ выкэдэ́ла Рай Дэвэ́л, тыро́ Дэвэ́л, соб (кай) тэ явэ́л Лэ́скиро лав одо́й, тэды зачхин барэ́ и тыкнэ́ тырэ́ кхэритконэ́ мурдалэ́ндыр, саво́ дыя́ ту́кэ Рай Дэвэ́л, сыр мэ припхэндём ту́кэ, и ха дрэ тырэ́ кхэра́, пир тырэ́-дескири ра́дыма;

²² нэ ха лэн адя́кэ, сыр ха́на серна и оленёс; адя́кэ нажужо, сыр и жужо́ сашты́ (можна) тэ хан.

²³ екх шылалэс дыкх, соб (кай) тэ на хас рат, пал-дова́ со рат исын ди, и джиибэ́н исын дро рат, на ха ди кхэтанэ́ масэса.

²⁴ На ха лэс; вычхув лэс пэ пхув, сыр пани́.

²⁵ На ха лэс, соб (кай) шука́р тэ явэ́л ту́кэ и тырэ́ чхавэ́нгэ пало́ (после) ту́тэ, ко́ли ту явэ́са тэ кэрэ́с чачипэ́н анги́л Ра́скирэ-Дэвлэ́скирэ якха́.

²⁶ Екх свэнтыми тырэ́, савэ́ исын ту́тэ, и тырэ́ совэла ян, и яв пэ дова́ штэ́то, саво́ выкэдэ́ла Рай Дэвэ́л.

²⁷ И ян цэ́ло схачкирибэ́н тыро́, мас и рат, пэ Ра́скирэ-Дэвлэ́скиро, тыро́ Дэвлэ́скиро алта́рё; нэ рат явирэ тырэ́ свэнтонэ́ яныбнастыр Ра́скэ-Дэвлэ́скэ трэй, соб (кай) тэ явэ́л прочхудо пашы́л Ра́скирэ-Дэвлэ́скиро, тырэ́ Дэвлэ́скиро алта́рё, а мас ха.

²⁸ Шун и кэр саро́ пир сарэ́ далэ́ лава́, савэ́ мэ припхэнава ту́кэ, соб (кай) шука́р тэ явэ́л ту́кэ и тырэ́ чхавэ́нгэ пало́ (после) ту́тэ дро ве́ко, ко́ли явэ́са тэ кэрэ́с, со исын лачхо́ и чачуно́ анги́л Ра́скирэ-Дэвлэ́скирэ, тырэ́ Дэвлэ́скирэ якха́.

²⁹ Ке́ли Рай Дэвэ́л, Дэвэ́л тыро́ традэ́ла криг манушэ́н тырэ́ мо́стыр, кэ савэ́ ту джа́са, соб (кай) тэ лэс лофо пэ́скэ пэ лэ́ндэ, и ту, лыи лэн, лэ́са тэ дживэ́с пэ лэ́нгири пхув;

³⁰ то ракхпэ, соб (кай) ту тэ на попэрэс дрэ фэлы́ (сетка), адя́кэ-паць сыр ёнэ, ке́ли ту традэса криг лэн тырэ́ мо́стыр, и, соб (кай) ту на родыян лэ́нгирэ дэвлорэ́, ракири́: “Сыр дынариндлэ́ далэ́ манушы́тка на́цыи пэ́скирэ дэвлорэ́нгэ, адя́кэ ява́ва и мэ тэ кэра́в.”

³¹ На кэр адя́кэ Ра́скэ-Дэвлэ́скэ, Дэвлэ́скэ тырэ́скэ дова́, пал-дова́ со саро́, со́стыр гинэ́ла сыр джунгалыпэ́н (гидинэлапэ) Рай Дэвэ́л, со на камэ́ла Ёв, дова́ ёнэ кэрэ́на дэвлорэ́нгэ пэскирэнгэ: ёнэ и пэ́скирэ чхавэ́н, и пэ́скирэ чхае́н хачкирэна пэ яг дэвлорэ́нгэ пэскирэнгэ.

³² Саро́, со мэ ракира́ва тумэ́нгэ, причхувэ́н зор тэ кэрэ́н; ту на причху́в кэ дова́ и на отлэ долэ́стыр.