Яви́р Зако́но 11 - Библия - Пэ Балтитко Романи чиб (Романэс) 2019

Рай Дэвэ́л Бахтякирэ́ла Одолэ́н, Кон Кандэ́ла

¹ И палдава́ сыка́в паты́в Ра́скэ-Дэвлэ́скэ, Дэвлэ́скэ тырэ́скэ, и ракх, со Ёв пхэндя́ тэ ракхэ́с, и упхэныбэна́ Лэ́скирэ и зако́ны Лэ́скирэ и припхэныбэна́ Лэ́скирэ дрэ сарэ́ дывэса́.

² И акана́ пририпирэн, – пал-дова́ со мэ ракира́ва на тумарэ́ чхавэ́нца, савэ́ на джинэ́на и на дыкхнэ́ ка́ра Ра́скирэ-Дэвлэ́скири, тумарэ́ Дэвлэ́скири; Лэ́скири сла́ва, Лэ́скиро зорало́ васт и Лэ́скиро вучо́ псико́,

³ знаме́нии (ґертыка́) Лэ́скирэ и Лэ́скирэ рэ́нды (де́лы), савэ́ Ёв кэрдя́ машкира́л Еги́пто фараонэнца, Египто́скирэ крали́са, и сарэ́ лэ́скирэ пхувья́са,

⁴ и со Ёв кэрдя́ Египто́скирэ халадыбнаса, лэ́скирэ грэнца и лэ́скирэ марибнытконэ́ вурдэнэнца, савэ́н Ёв тасадя дрэ Лолэ́-морёскирэ (дэрьявэ́скирэ) паня́, ке́ли ёнэ традынэпэ пал тумэ́ндэ, – и мулякирдя́ лэн Рай Дэвэ́л аж кэ/жы́ко дава́ дывэ́с;

⁵ и со Ёв кэрдя́ ваш тумэ́нгэ пэ чхучи́ пхув, пака тумэ́ догинэ́ кэ дава́ штэ́то,

⁶ и со Ёв кэрдя́ Дафаноса и Авироноса, Елиавоскирэ чхавэ́нца, Рувимо́скирэ чхавэ́са, ке́ли пхув роскэрдя́ пэ́скирэ ушта́ машки́р саро́ Израилё и накхадя (проглыниндя) лэн, и лэ́нгирэ чэ́карья (семействы), и лэ́нгирэ ша́тры, и саро́ барвалыпэ́н лэ́нгиро, саво́ сыс лэ́ндэ.

⁷ Пал-дова́ со якха́ тумарэ́ дыкхнэ́ сарэ́ барэ́ Ра́скирэ-Дэвлэ́скирэ рэ́нды, савэ́ Ёв кэрдя́.

⁸ И палдава́ ракхэ́н сарэ́ Лэ́скирэ припхэныбэна́, савэ́ мэ ракира́ва тумэ́нгэ ададывэ́с, соб (кай) тумэ́ тэ зоралён, и тэ джа́н и тэ лэн пхув, пэ сави́ тумэ́ пириджана, соб (кай) тэ лэн ла;

⁹ и, соб (кай) тумэ́ тэ дживэ́н бут часо пэ доя́ пхув, сави́ совлахадя́ Рай Дэвэ́л тумарэ́ дадэ́нгэ тэ дэл лэ́нгэ и лэ́нгирэ родо́скэ пэ пхув, пэ сави́ тхадэ́ла тхуд и авги́н (мэда).

¹⁰ Пал-дова́ со пхув, пэ сави́ ту джа́са, соб (кай) тэ лэс ла, на дасави́, сыр Египто́скири пхув, савья́тыр выгинэ́ тумэ́, ту почхудян семё тыро́, панякирдян ла тырэ́ ґэрэнгирэ подрикирибнаса (помошшаса), сыр маслинитко у́нта (садо),

¹¹ нэ пхув, пэ сави́ тумэ́ пириджана, соб (кай) тэ залэн ла, исын пхув бэргэнца и лошчынэнца, и сави́ болыбна́скирэ брышындэстыр панякирэлапэ,

¹² пхув, пал сави́ Рай Дэвэ́л, Дэвэ́л тыро́, пэкэлапэ, якха́ Ра́скирэ-Дэвлэ́скирэ, Дэвлэ́скирэ тырэскирэ, саро́ часо исын пэ ла́тэ, бэршэскирэ англыпна́стыр и кэ бэршэскиро ко́нцо (кэ яго́ро).

¹³ Ко́ли тумэ́ явэ́на тэ шунэ́н Мирэ́ припхэныбэна́, савэ́ Мэ ракира́ва тумэ́нгэ ададывэ́с, тэ рикирэ́н сыр Дро́гима дро тумаро́ ило́ Рас-Дэвлэ́с, Дэвлэ́с тумарэс, и тэ дынаринэ́н Лэ́скэ сарэ́ тумарэ́ илэ́стыр и сарэ́ тумарэ́ дестыр,

¹⁴ то Мэ да́ва тумарэ́ пхувьякэ брышы́нд дрэ пэ́скиро часо, тасярлуно/пэрвотуно (раннё) и коригуно (позднё); и ту скэдэса тыро́ маро́ и тыри́ мол (вино), и елеё тыро́;

¹⁵ и Мэ да́ва чар пэ фэ́лда тыри́ ваш тырэ́ кхэритконэ́ мурдалэ́нгэ (ското) и, ту явэ́са тэ хас и тэ чалёс.

¹⁶ Ракхэ́нпэ, соб (кай) тэ на хохавэлпэ ило́ тумаро́, и тумэ́ тэ на отджан дрэ риг, и тэ на лэн тэ дынаринэ́н явирэ дэвлорэ́нгэ, и тэ на мангэ́нпэ лэ́нгэ;

¹⁷ и тэды, захачола холы́ Ра́скирэ-Дэвлэ́скири пэ тумэ́ндэ, и Ёв зачхакирэла болыбэ́н; со на явэ́ла брышы́нд, и пхув на янэ́ла пэ́скиро умалото (урожаё), и тумэ́ сыг хасёна лачхэ́ пхувья́тыр, сави́ Рай Дэвэ́л дэ́ла тумэ́нгэ.

¹⁸ И палдава́ чхувэ́н (прилэ́н) далэ́ Мирэ́ лава́ дро тумаро́ ило́ и дро тумаро́ ди, и пхандэн лэн пэ рипирибэ́н пэ пэ́скиро васт, и мэк тэ явэ́н ёнэ пхандыпнаса машки́р тумарэ́ якха́;

¹⁹ и сыклякирэ́н лэ́нгэ пэ́скирэ чхавэ́н, ракири́ пал лэ́ндэ, ке́ли ту сан бэшто́ дро тыро́ кхэр, и ке́ли ту джа́са дромэ́са, и ке́ли ту пасёса, и ке́ли уштэса;

²⁰ и чхин лэн пэ тырэ́-кхэрэ́скирэ косяки и пэ тырэ́ вудара́,

²¹ соб (кай) ада́кицы бут тэ явэ́н тумарэ́ дывэса́ и тумарэ́-чхавэ́нгирэ дывэса́ пэ доя́ пхув, сави́ Рай Дэвэ́л совлахадя́ тэ дэл тумарэ́ дадэ́нгэ, ци бут дывэса́ болыбэ́н явэ́ла пэ пхув.

²² Ко́ли тумэ́ явэ́на тэ ракхэ́н сарэ́ далэ́ припхэныбэна́, савэ́ Мэ ракира́ва тумэ́нгэ тэ кэрэ́н саро́ пир лэ́ндэ, и тумэ́ явэ́на тэ рикирэ́н сыр Дро́гима дро пэ́скиро ило́ Рас-Дэвлэ́с, Дэвлэ́с тумарэс, тэ псирэ́н сарэ́ Лэ́скирэ дромэ́нца и тэ причхувэнпэ кэ Ёв,

²³ то тэды вытрадэла Рай Дэвэ́л сарэ́ адалэ́ манушэ́н тумарэ́ мо́стыр, и тумэ́ лэ́на лофо (власть) пэ манушэ́ндэ, савэ́ исын буты́р и зоралэды́р тумэ́ндыр;

²⁴ кажно штэ́то, пэ саво́ тэрдёла тумари́ ґэро́й, явэ́ла тумаро́; чхучэ́ пхувья́тыр и Ливаностыр, рэка́тыр (лэня́тыр) Ефратостыр, адя́кэ-паць кэ за́падно (пал-панитко) мо́рё (дэрья́в) явэ́на штэ́ты тумарэ́.

²⁵ Нико́н на вытэрдёла проти тумэ́ндэ: Рай Дэвэ́л, Дэвэ́л тумаро́, янэ́ла дар анги́л тумэ́ндэ пэ кажно пхув, пэ сави́ тумэ́ тэрдёна, сыр Ёв ракирдя́ тумэ́нгэ.

²⁶ Акэ, мэ выпхэнава тумэ́нгэ ададывэ́с бахтякирибэ́н и прокошыбэ́н:

²⁷ бахтякирибэ́н, ко́ли тумэ́ шунэ́на припхэныбэна́ Ра́скирэ-Дэвлэ́скирэ, тумарэ́ Дэвлэ́скирэ, савэ́ мэ ракира́ва тумэ́нгэ ададывэ́с,

²⁸ а прокошыбэ́н, ко́ли тумэ́ на явэ́на тэ шунэ́н припхэныбэна́ Ра́скирэ-Дэвлэ́скирэ, тумарэ́ Дэвлэ́скирэ и джа́на дрэ риг дромэ́стыр, пал саво́ ракира́ва тумэ́нгэ ададывэ́с, и джа́на пала́л пал явирэ дэвлорэндэ, савэ́н тумэ́ на джинэ́на.

²⁹ Ке́ли янэ́ла тут Рай Дэвэ́л, Дэвэ́л тыро́, пэ доя́ пхув, пэ сави́ ту джа́са, соб (кай) тэ лэс лофо пэ ла́тэ, тэды пхэнэ́н бахтякирибэ́н пэ бэ́рга Гаризимо, а прокошыбэ́н (арман) пэ бэ́рга Гевало.

³⁰ Ѓа́да, ёнэ исын пал Иорда́но, пир дром кэ кхамэскиро загиибэ́н, пэ пхув Хананеенгири, савэ́ дживэ́на пэ лошчы́на (равнина), проти Галга́ло, на́дур дэмбитконэ вэшорэстыр Море.

³¹ Пал-дова́ со тумэ́ пириджана Иорда́но, соб (кай) тэ джа́н тэ лэс пхув, сави́ Рай Дэвэ́л, тумаро́ Дэвэ́л, дэ́ла тумэ́нгэ и тумэ́ лэ́на ла, и явэ́на тэ дживэ́н пэ ла́тэ.

³² И палдава́ кэрэ́н саро́ пир сарэ́ упхэныбэна́ и Лэ́скирэ зако́ны, савэ́ Мэ выпхэнава тумэ́нгэ ададывэ́с.