Vygiiben 38 - Библия - Пэ Балтитко Романи чиб (Романэс) 2019

Алта́рё Ваш Цэ́ло Схачкирибэ́н

¹ И кэрдя́ ёв алта́рё ваш цэ́ло схачкирибэ́н ситимоскирэ вэшэ́стыр длэнгипна́са дрэ пандж куня́ и буґлыпнаса дрэ пандж куня́ (локти), штарэ́-вэнглытко, вучипна́са дрэ трин куня́;

² и кэрдя́ ёв шынга́ (ро́ги) пэ штар лэ́скирэ вэ́нглы адя́кэ, со лэ́стыр выджа́на шынга́ (ро́ги), и обчхудя́ лэс харкомаса (медяса).

³ И кэрдя́ ёв сарэ́ алтарёскирэ приборы кэ алта́рё: пирья, лопатки, тахтая́, бустя́ (видэлки) и угольницы; сарэ́ лэ́скирэ приборы кэрдя́ ёв харкома́тыр (медятыр).

⁴ И кэрдя́ ёв ваш алта́рё решотка, ро́до сеткакиро харкома́тыр (медятыр), пир лэ́скири яго́ро (краё) тэла́л кэ лэ́скири паш;

⁵ и кэрдя́ штар барэ́ ангрустя́ пэ штар вэ́нглы харкуны (медно) решотка тэ чхувэ́н баландиня́.

⁶ И кэрдя́ баландиня́ ситимоскирэ вэшэ́стыр, и обчхудя́ лэн харкомаса (медяса),

⁷ и чхудя́ андрэ́ баландиня́ дрэ барэ́ ангрустя́ пэ рига́ алтарёскирэ, соб (кай) тэ лыджа́н лэн лэ́нца; чхучо́ (пусто) андра́л пхалендыр ёв кэрдя́ лэс.

Москэ Чаро́ (Умывальнико)

⁸ И кэрдя́ Веселиило москэ чаро́ (умывальнико) харкома́тыр (медятыр) и лэ́скиро прэдко тэл ґэра́ харкома́тыр (медятыр) гожонэ патриненца (рисункэнца), савэ́ лынэ́ джувлендыр, кон гожакирэла загиибэ́н дрэ скэдыибна́скири ша́тра.

Грэ́да (Дво́ро)

⁹ И кэрдя́ ёв грэ́да (дво́ро) пашы́л-дывэсытконэ́ (южнонэ) рига́тыр, кэ паш-дывэ́с, ублады́тка шырмы (завесы) крэнцононэ висоно́стыр, длэнгипна́са дрэ шэл куня́;

¹⁰ сты́лбы ваш лэ́нгэ сыс биш и прэдки тэл ґэра́ кэ ёнэ сыс биш харкома́тыр (меди́тка); нанглорэ (крючки) пэ сты́лбы и лэ́нгирэ спхандыпэна сыс рупэ́стыр.

¹¹ И пир паш-рати́тко сыс ублады́тка шырмы дрэ шэл куня́; сты́лбы ваш лэ́нгэ сыс биш и основы кэ ёнэ сыс биш харкунэ́ (меди́тка); нанглорэ пэ сты́лбы и лэ́нгирэ спхандыпэна сыс рупэ́стыр.

¹² И пир за́падно (бэльвэлитко) риг ублады́тка шырмы сыс дрэ пандждэша́ куня́, сты́лбы ваш лэ́нгэ сыс дэш, и прэдки тэл ґэра́ сыс дэш, наглорэ пэ сты́лбы и лэ́нгирэ спхандыпэна сыс рупэ́стыр.

¹³ И англатунэ́ рига́тыр кэ васто́ко-ублады́тка шырмы дрэ пандждэша́ куня́.

¹⁴ Пэ екх риг пэ грэдакири по́рта-ублады́тка шырмы дрэ дэшупандж куня́; сты́лбы ваш лэ́нгэ трин, и основы кэ ёнэ сыс трин;

¹⁵ и ваш яви́р риг, пир дуй рига́ пэ грэдакири по́рта-ублады́тка шырмы дрэ дэшупандж куня́ и сты́лбы ваш лэ́нгэ трин, и прэдки тэл ґэра́ кэ ёнэ сыс трин.

¹⁶ Сарэ́ ублады́тка шырмы пэ сарэ́ грэдакирэ рига́ сыс крэнцонэ висоно́стыр,

¹⁷ а основы тэл сты́лбы сыс харкома́тыр (медятыр), нанглорэ (крючки) пэ сты́лбы и лэ́нгирэ спхандыпэна сыс рупэ́стыр; вучипэ́н лэ́нгиро сыс обчхудо рупэ́са, и сарэ́ сты́лбы дрэ грэ́да кхэтанякирдэпэ рупувэ́ спхандыипнаса.

По́рта Дрэ Грэ́да

¹⁸ Шы́рма ваш по́рта дрэ грэ́да (дво́ро) сыс узорэнгирэ бутя́тыр, голубовонэ́, пурпуронэ и чэрвлёнонэ вылна́тыр и крэнцонэ висоно́стыр, длэнгипна́са дрэ биш куня́, вучипна́са дрэ пандж куня́, пир саро́ длэнгипэ́н, дасавэ́-паць сыр грэдакири шы́рма;

¹⁹ и ваш лэ́нгэ сыс штар сты́лбы, и основы тэл сты́лбы сыс штар харкунэ́ (меди́тка); нанглорэ лэ́ндэ сыс рупувэ́, а вучипэ́н лэ́нгиро сыс обчхудо рупэ́са, и лэ́нгиро спхандыпэн сыс рупуво́.

²⁰ Сарэ́ килэ пашы́л ша́тра (ски́ния) и грэ́да (дво́ро) сыс харкунэ́ (меди́тка).

Материалы Ваш Ски́ния

²¹ Ѓа́да, исын материалоскиро гиныбэ́н долэ́скэ, со гия́ ваш ша́тра досыкаибна́са (ски́ния откровенияса), кэрдо́ пир Мойза́скиро припхэныбэ́н, и Леви́ты подынэ васт тэл дыкхибэ́н Ифамароскиро, Аароно́скирэ-чхавэ́скиро, рашаскиро.

²² А кэрдя́ саро́ о Веселеило, со припхэндя́ Рай Дэвэ́л Мойза́скэ. Веселиило сыс Урияскиро чхаво́, Ораскирэ-чхавэ́скиро, Юда́скирэ родыцо́стыр,

²³ и лэ́са кэрдя́ буты́ Аголиаво, Ахисамахоскиро чхаво́, Дано́скирэ родыцо́стыр, спецо-вычхиныбнари и вучэ́-класоскиро кхувибнари и высуибнари пир голубово, пурпурно, чэрвлёно и висонытко паркалё (тхан).

²⁴ Саро́ сувнака́й, саво́ гия́ пэ рэ́ндо (де́ло) пэ сари́ буты́ пэ свэ́нто штэ́то, сувнака́й, саво́ яндлэ́ дро да́ро, сыс биш тэ еня́ тала́нты и эфташэла́ трия́нда шэ́кели, пир пхарипэ́н дро шэ́келё ваш свэ́нто штэ́то;

²⁵ И руп, саво́ гиндлэ́ скэдыибнаскирэ манушэ́ндыр дро скэдыибэ́н, сыс шэл тала́нты и тысёнцо (бар) эфташэла́ эфтадэша́ пандж шэ́келё, пир пхарипэ́н дро шэ́келё ваш свэ́нто штэ́то.

²⁶ Пир паш шэ́келё манушэ́стыр пир пхарипэ́н пир шэ́келё ваш свэ́нто штэ́то шовэ шэлэндыр тринэ́ тысёнцэндыр, панджэ́ шэлэндыр пандждэшэ манушэ́ндыр, кажнонэстыр, савэ́ загинэ́ дрэ гиныбэ́н, бишэ́ бэршэ́ндыр и буты́р.

²⁷ Шэл тала́нты руп гия́ пэ вычхуибэн ваш основы тэл сты́лбы пэ свэ́нто штэ́то и прэдки тэл ґэра́ пашы́л шырмы; шэл основы шэлэ талантэндыр, пир таланто пэ екх основа;

²⁸ а тысёнцостыр (барэстыр) эфта́ шэлэндыр эфтадэшэндыр панджэндыр шэкелендыр кэрдя́ ёв нанглорэ пэ сты́лбы и учхакирдя́ лэ́нгиро вучипэ́н, и кэрдя́ ваш лэ́нгэ спхандыпэн.

²⁹ Харко́ма (медь), сави́ яндлэ́ дрэ да́ро, сыс эфтадэша́ тала́нты и дуй тысёнцы штаршэла́ шэ́кели;

³⁰ ла́тыр кэрдя́ ёв тэл основы ваш сты́лбы пашы́л загиибэ́н дрэ ша́тра досыкаибнаскири, и харкуно (медно) алта́рё, решотка медно ваш лэ́скэ, и сарэ́ кхорэ́ ваш алта́рё,

³¹ и основы ваш сты́лбы пэ грэ́да (дво́ро), основы ваш вударэнгирэ сты́лбы трусця́л (кругом) грэ́да, и сарэ́ шатракирэ килэ и сарэ́ килэ пашы́л грэ́да (дво́ро).