Vygiiben 26 - Библия - Пэ Балтитко Романи чиб (Романэс) 2019

Ски́ния (Ша́тра)

¹ Ша́тра (ски́ния) кэр дэшэ цэргэндыр (покрывалэндыр) крэнцэнонэ висоно́стыр, и голубовонатыр, пурпуровонатыр и чэрвлёнонэ вылна́тыр, и кэр херувимы пэ лэ́ндэ высудэ бутяса;

² длэнгипэ́н кажнонэ́-цэргакирэ тэ явэ́л биш тэ охто́ (бидуе́нгиро дэш) куня́ (локти), а буглыпэн кажнонэ́-цэргкиро ядякэ-паць тэ явэ́л штар куня́: тэ явэ́л екх барипэ́н сарэ́ цэргэнгэ.

³ Пандж цэрги мэк тэ явэ́н кхэтанякирдэ екх екхаса, и яви́р пандж цэрги кхэтанякирдэ екх екхаса.

⁴ Кэр фэля́ (петли) голубовонэ́ цвятоса (мастиняса) пэ яго́ро (краё) дрэ англатуны цэ́рга пэ яго́ро, кай кхэтанякирэнапэ дуй паша́; адя́кэ кэр и пэ яго́ро (краё) пэ палатуны цэ́рга.

⁵ Пандждэша́ фэля́ (петли) кэр дрэ екх цэ́рга, и пандждэша́ фэля́ (петли) кэр пэ яго́ро цэргакиро, сави́ кхэтанякирэлапэ явирьяса; фэля́ трэй, соб (кай) тэ поджан екх кэ яви́р;

⁶ и кэр пандждэша́ нанглорэ (крючки) сувнакунэ́, и нанглорэнца кхэтанякир цэрги екх явирьяса, и явэ́ла ша́тра (ски́ния) сыр екх цэ́ло.

⁷ И кэр дэки (цэрги) бузненгирэ вылна́тыр, соб (кай) тэ заучхакирэн ша́тра; дэшуекх цэрги кэр дасавэ́;

⁸ длэнгипэ́н дрэ екх цэ́рга тэ явэ́л трия́нда куня́ (локти), а буглыпэн штар куня́; дава́ исын екх цэ́рга: дрэ дэшуекх цэрги екх барипэ́н (размеро).

⁹ И кхэтанякир пандж цэрги ишчо (инкэ́) е́кхвар и шов цэрги ишчо (инкэ́) е́кхвар; шо́вто цэ́рга кэр дуендыр англатунэ́-шатракирэ рига́тыр.

¹⁰ Кэр пандждэша́ фэля́ (петли) пэ яго́ро дро крайнё цэ́рга, соб (кай) тэ кхэтанякирэс ла явирьяса, и пандждэша́ фэля́ пэ яго́ро дрэ яви́р цэ́рга, ваш кхэтанякирибэн ла́са;

¹¹ кэр пандждэша́ нанглорэ харкома́тыр (медятыр), и чхув дрэ фэля́, и кхэтанякир лэн, соб (кай) ёв тэ явэ́л сыр екх цэ́рга.

¹² А лишнё ишчо (инкэ́) котэ́р, со ячэ́лапэ шатракирэ цэргэндыр, – паш лишнё цэ́рга мэк тэ явэ́л змэкны пэ палатуны шатракири риг (боко);

¹³ а лишнё котэ́р шатракирэ-цэргакирэ длэнгипнастыр, пэ кунь екхэ рига́тыр, и пэ кунь явирэ рига́тыр, мэк тэ явэ́л змэкно пир рига́ дрэ ша́тра долэ́ и явирэ рига́тыр, ваш ла́киро учхакирибэн.

¹⁴ И кэр дэка (покрышка) бакранэ лолэ́ цыпэндыр, и ишчо (инкэ́) упратуны дэка синэ (барсукэнгирэ) цыпэндыр.

¹⁵ И кэр брусы ваш ша́тра вэшэ́стыр ситимо, соб (кай) ёнэ тэ тэрдён:

¹⁶ длэнгипна́са брусо дрэ дэш куня́ (локти), и екх пашэ́са кунь буґлыпэ́н дрэ кажно брусо;

¹⁷ дрэ кажно брусо пир дуй шыпы, екх анги́л явирэ́стэ; адя́кэ кэр дрэ сарэ́ брусы дрэ ша́тра.

¹⁸ Адя́кэ кэр брусы ваш ша́тра: биш брусы пир паш-дывэсы́тко риг, кэ юго,

¹⁹ И тэл биш брусы кэр штардэша́ рупунэ (рупувэ́) гэрорэ: дуй ґэрорэ тэл екх брусо ваш дуй лэ́скирэ шыпы, и дуй ґэрорэ тэл яви́р брусо ваш дуй лэ́скирэ шыпы;

²⁰ и биш брусы ваш явирэ-шатракири риг кэ паш-рат (северо),

²¹ и ваш лэ́нгэ штардэша́ рупувэ́ ґэрорья: дуй ґэрорья тэл екх брусо, и дуй ґэрорья тэл яви́р брусо.

²² Ваш палатуны шатракири риг кэ западо кэр шов брусы.

²³ И дуй брусы кэр ваш шатракирэ вэ́нглы пэ палатуны риг;

²⁴ трэй, соб (кай) ёнэ тэ явэ́н кхэтанякирдэ дро низо и кхэтанякирдэ упрэ́ кэ екх бари ангрусты (брэнчо): адя́кэ трэй тэ явэ́л лэ́нца дуенца; ваш дуй вэ́нглы мэк ёнэ тэ явэ́н;

²⁵ и адя́кэ явэ́ла охто́ (бидуе́нгиро дэш) брусы, и ваш лэ́нгэ дэшушов рупувэ́ ґэрорья: дуй ґэрорья тэл екх брусо, и дуй ґэрорья тэл яви́р брусо.

²⁶ И кэр баландиня́ (шосты) вэшэ́стыр ситимо, пандж ваш брусы екхэ-ригакирэ скиниятыр,

²⁷ и пандж баландиня́ ваш брусы явирэ рига́тыр дрэ ша́тра, и пандж баландиня́ ваш брусы палатунэ́ рига́тыр (бокостыр) палэ ша́тра, кэ западо;

²⁸ а андратуны́ баландин явэ́ла тэ проджал машкира́л брусы екхэ ягоро́стыр кэ яви́р;

²⁹ брусы обчхув сувнака́са, и барэ́ ангрустя́ (брэнчы) тэ чхувэ́н андрэ́ баландиня́, кэр сувнака́стыр, и баландиня́ (шосты) обчхув сувнака́са.

³⁰ И чхув ша́тра (ски́ния) упрэ́ пир сыкаибэ́н (образцо), саво́ сыс сыкадо ту́кэ пэ бэ́рга.

³¹ И кэр полого (завеса) голубовонэ́, пурпуронэ и чэрвлёнонэ вылна́тыр и крэнцонэ висоно́стыр; узорэнца спецоскирэ бутя́тыр трэй тэ явэ́н кэрдэ́ пэ ла́тэ херувимы;

³² и ублав ла пэ штар ситимоскирэ сты́лбы, обчхудэ сувнака́са, сувнакунэ́ нанглорэнца, пэ штар рупувэ́ ґэрорья;

³³ и ублав полого тэлэ́ пэ нанглорэ, и залыджа одори́к пал шы́рма, сави́ исын анги́л ковчэго досыкаибна́са (откровениё); и явэ́ла шы́рма, тэ роскэрэ́л свэ́нто штэ́то Свэнтонэ́ – Свэнтонэндыр.

³⁴ И чхув дэнко (крышка) пэ ковчэго досыкаибна́са (откровенияса) дро Свэ́нто-Свэнтонэндыр.

³⁵ И чхув сками́нд пал шы́рма, и момолы́тко (свети́льнико) проти сками́нд пэ риг шатракири кэ паш-дывэ́с (юго); сками́нд чхув пэ паш-рати́тко (северно) риг.

³⁶ И кэр шы́рма тэ учхакирэс загиибэ́н дрэ ша́тра голубовонэ́ и пурпуронэ и чэрвлёнонэ вылна́тыр и крэнцононэ висоно́стыр высудэ бутя́тыр пир узоро;

³⁷ и кэр ваш шы́рма пандж сты́лбы ситимостыр, и обчхув лэн сувнака́са; нанглорэ кэ ёнэ тэ явэ́н сувнакунэ́; и вычхув ваш лэ́нгэ пандж ґэрорья харкома́тыр (медятыр).