Vygiiben 22 - Библия - Пэ Балтитко Романи чиб (Романэс) 2019

Зако́ны Пал Миштыпэ́н

¹ Ко́ли вари-кон чорэла гурувэ́с ци бакря́, и зачхинэла, ци бикнэла, тэды ёв исын банго́ пандж гурувэ́н тэ выплэскирэл пал гурувэстэ, и штар бакрен пал бакрятэ.

² Ко́ли вари-кон ухтылэ́ла чорэс, саво́ подґанавэлапэ тэ чорэл, и пэкавэла лэс адя́кэ, со ёв мэрэ́ла, тэды рат на явэ́ла пэ лэ́стэ;

³ нэ ко́ли ґаздыя́пэ кхам пэ лэ́стэ, тэды лэ́скиро рат явэ́ла пэ лэ́стэ. Чор исын банго́ тэ заплэскирэл; а ко́ли нанэ со́са, тэды мэк лэс тэ бикнэн ваш выплэскирибэн лэ́са пал чордо миштыпэ́н;

⁴ ко́ли латхэлапэ чордо дрэ лэ́скирэ васта́, со исын джидо́, ци гурув, ци о́сло (мега́ри), ци бакри, мэк тэ выплэскирэл ёв дрэ дуй мо́лы.

⁵ Ко́ли вари-кон мэкэ́ла кхэритконэ́ мурдалэс (ското) пэ чу́жо фэ́лда ци дро винагра́днико тэ выхал, пал-дова́ со ёв мэкця́ пэ́скирэ мурдалэс тэ выхал чу́жо фэ́лда, то мэк ёв тэ отдэ́л фэдыршо да́ро пэ́скирэ фэлдатыр и фэдыршонэ лэ́скирэ винаградникостыр.

⁶ Ко́ли ячэ́ла яг и облэла тернё (кодро), и выхачкирла ґарбы (снопы), ци жатва, ци фэ́лда, тэды одова́ ману́ш исын банго́ тэ заплэскирэл, кон кэрдя́ дава́ схачкирибэ́н.

⁷ Ко́ли вари-кон отдэ́ла пашатунэскэ тэ зракхэ́л руп ци и́ди, и ёнэ явэ́на чордэ лэ́скирэ кхэрэ́стыр, тэды, ко́ли латхэлапэ чор, мэк ёв тэ заплэскирэл дрэ дуй мо́лы;

⁸ а ко́ли на латхэлапэ чор, мэк кхэрэ́скиро хула́й тэ явэ́л анги́л сэндарьендэ и тэ совлахал, со ёв на ґаздыя́ пэ́скиро васт пэ лэ́скирэ-пашатунэскиро миштыпэ́н.

⁹ Пал кажно спрэчно рэ́ндо, пал гурувэстэ, пал ослостэ, пал бакрятэ, пал и́ди, пал кажно вешча (вешч), сави́ хасия́, пал сави́ вари-кон пхэнэ́ла, со ёй исын лэ́скири, рэ́ндо (де́ло) дуенгиро банго́ тэ явэ́л долыджино кэ сэнда́рья. Конэ́с сэнда́рья бангякирэна, одова́ заплэскирэла пэ́скирэ пашатунэскэ дрэ дуй мо́лы.

¹⁰ Ко́ли вари-кон отдэ́ла пэ́скирэ пашатунэскэ осло́с, ци гурувэ́с, ци бакря́, ци явирэ́с вари-савэ́с кхэритконэ́ мурдалэс пэ зракхибэ́н, а ёв мэрэ́ла, ци явэ́ла калечындло, ци отлыджино адя́кэ, со нико́н дава́ на дыкхэ́ла,

¹¹ то совла́х анги́л Растэ-Дэвлэ́стэ мэк тэ явэ́л машки́р дуендэ дрэ дова́, со кон лыя́ пэ зракхибэ́н, на ґаздыя́ пэ́скиро васт пэ пэ́скирэ-пашатунэскиро миштыпэ́н; и хула́й исын банго́ тэ прилэл, а одова́ на явэ́ла тэ плэскирэл;

¹² а ко́ли лэ́стэ явэ́ла чордо, тэды ёв исын банго́ тэ заплэскирэл лэ́скирэ хула́скэ;

¹³ ко́ли явэ́ла захано рискирибна́скирэ мурдалэса (зверёса), тэды мэк дро допхэныбэ́н тэ янэл захано дова́: пал захано ёв на плэскирэла.

¹⁴ Ко́ли вари-кон залэла пэ́скирэ пашатунэстыр кхэритконэ́ мурдалэс (ското), и ёв явэ́ла калечындло, ци мурдёла, а лэ́скирэ хула́с на сыс пашы́л лэ́стэ, тэды ёв исын исын банго́ тэ заплэскирэл;

¹⁵ нэ ко́ли лэ́скиро хула́й сыс пашы́л лэ́стэ, тэды ёв исын на банго́ тэ плэскирэл; ко́ли ёв сыс лыно́ пал вужлыпэ́н (длуго) пал ловэ́, тэды мэк ёв и тэ джал пал доя́ тими́н.

Зако́ны Пал Патывалыпэн

¹⁶ Ко́ли вари-кон обхохавэла напалоромиткона чха, сави́ исын наобрэнчындлы (наангрустякирды) и пирисовэла ла́са, мэк тэ дэл ла́кэ вено (да́ро) и тэ лэл ла пэ́скэ палоро́м (тэ лэл ла ромня́са);

¹⁷ а ко́ли дад на закамэ́ла тэ отдэ́л ла пал лэ́стэ, мэк ёв тэ заплэскирэл ада́кицы руп, ци бут трэй пэ вено, сыр пал напалоромитконэ чхаендэ.

¹⁸ Драбакирибнаскирэн на ячкир джидэнца.

¹⁹ Кажно скотоложнико мэк тэ явэ́л отдыно́ пэ мэрибэ́н.

²⁰ Кон янэ́ла свэ́нто дыибэ́н (жэ́ртва) дэвлорэ́нгэ, апри́ч екхэ Растэ-Дэвлэ́стэ, мэк ёв тэ явэ́л мулякирдо.

²¹ Манушэ́с, саво́ явэ́ла явирэ рига́тыр, на притасав, и на дукхав лэс, пал-дова́ со тумэ́ кокорэ́ са́нас явирэ-ригакирэ мануша́, савэ́ явнэ́ пэ Египто́скири пхув.

²² Ни ўдовэн (пивлен), ни сиротэн (пиротэн) на притасавэн;

²³ ко́ли ту притасавэса лэн, тэды, ке́ли ёнэ явэ́на тэ годлэн кэ Мэ, Мэ шунава лэ́нгири го́дла,

²⁴ и захачкирэлапэ Мири́ холы́, и Мэ замарава тумэн куртала́са (мечоса), и явэ́на тумарэ́ ромня́ ўдовэнца (пивленца), и тумарэ́ чхавэ́ сиротэнца (пиротэнца).

²⁵ Ко́ли дэ́са ту дро длуго (вужлыпэ́н) ловэ́ чорорэскэ Мирэ́ манушэ́ндыр, тэды на притасав лэн, и на чхув пэ лэ́ндэ ко́фо (процэнто).

²⁶ Ко́ли лэ́са дрэ сымады́ (залого) тырэ́-пашатунэскири и́дя, кэ кхамэскиро загиибэ́н, отдэ́ ла палэ,

²⁷ пал-дова́ со ёй (и́дя) исын екхори учхакирибэн лэ́стэ, ёй-лэ́скирэ-масэ́нгиро урибэ́н: дро со ёв явэ́ла тэ совэ́л? Адя́кэ, ке́ли ёв загодлэла кэ Мэ, Мэ ушунава, пал-дова́ со Мэ сом тангипнаскиро.

²⁸ Сэндарьен на кош, и тхагарьен дрэ тырэ́ манушэ́ндэ на обракир.

²⁹ На зарикир тэ янэс Ма́нгэ пэ́рва барьякирдэ́ (пло́ды) тырэ́ гумностыр (гиваобкэрибнаскирэ шурнатыр) и тырэ́ пресостыр (точылостыр); отдэ́ Ма́нгэ одолэ́ чхавэ́ндыр, кон бия́ндыя англатуно́;

³⁰ дава́-паць кэр тырэ́ гурувэса и тырэ́ бакряса. Эфта́ дывэса́ мэк ёнэ тэ явэ́н пашы́л пэ́скирэ датэ, а пэ охто́то (бидуе́нгиро дэ́што) дывэ́с отдэ́ лэн Ма́нгэ.

³¹ И явэ́на тумэ́ Ма́ндэ свэнтонэ́ манушэ́нца; и мас, саво́ рискирдя́ рискирибна́скиро мурда́л (зверё) пэ фэ́лда, на хан, чхурдэ́н лэс джуклэнгэ.