Sykadyipén 9 - Библия - Пэ Балтитко Романи чиб (Романэс) 2019

Панджо Ро́го

¹ И па́нджто Янго́ло пхурдыя дрэ пэ́скиро ро́го; и мэ дыкхцём чэргэн, со пыя́ болыбна́стыр пэ пхув, и ла́кэ сыс дыно́ клыдын люноскирэ ганынгатыр (безнатыр).

² И чэргэн псирадя (отпхандя) люноскири ґаны́нг и тхув (дымо) выгия́ ґанынгатыр, сыр тхув барэ́ бовэстыр: кхам и фа́но (воздухо) калынэ ґанынгакирэ тхувэстыр.

³ И пхакитка скочки (саранча) выгинэ́ пэ пхув тхувэстыр и сыс дыны́ лэ́нгэ зор, сави́ исын пхувитконэ скорпионэндэ.

⁴ Лэ́нгэ сыс пхэндло́ тэ на кэрэ́н чорипэ́н ни пхувитконэ чарьякэ, ни савэ́ зэлэнэ раслинакэ, ни савэ́ каштэскэ (дрэвоскэ), а екх манушэ́нгэ, савэ́ндэ на сыс Дэвлэ́скиро та́вро пэ лэ́нгирэ чэката:

⁵ и пхакитконэ скочкэнгэ сыс дыно́ тэ на мулякирэ́н лэн, а тэ мэнчынэн манушэ́н пандж чхона́; и лэ́нгири мэнька сыс сыр скорпионо мэнчынэла, ке́ли дукхавэла манушэ́с.

⁶ И дрэ долэ́ дывэса́ мануша́ явэ́на тэ родэ́н мэрибэ́н, нэ ёнэ на латхэ́на; ёнэ явэ́на тэ мангэ́н, соб (кай) тэ мэрэ́н, нэ мэрибэ́н нашэла лэ́ндыр.

⁷ Кадалэ́ пхакитка скочки (саранча) сыс сыр грая, савэ́ кэдынэпэ пэ мэрибэ́н; и пэ лэ́нгирэ шэрэ́ сыс вянки (короны) сы́рбы сувнака́стыр, и лэ́нгирэ муя́ сыс сы́рбы муя́ манушы́тка.

⁸ И лэ́нгирэ бала́ сыс сы́рбы бала́ джувликанэ́, и лэ́нгирэ данда́ сыс сы́рбы шчэрэндэ (левэндэ),

⁹ и сыс лэ́ндэ саструнэ́ колына сыр саструнэ́ панцыри, и лопотымо лэ́нгирэ пхакэндыр сыс сыр лопотымо ґаратунэ́ вурдэнэндыр, ке́ли грая праста́на пэ мэрибэ́н;

¹⁰ и сыс лэ́ндэ порья сыр скорпионэнгирэ жалы и дрэ кадалэ́ порья сыс зор тэ дукхавэн манушэ́н пэ пандж чхона́.

¹¹ Люноскиро (Адоскиро) Янго́ло сыс кра́ли пэ лэ́ндэ. Лэ́скиро лав пир Юды́тко чиб сыс “Абаддон”, а грэки́ткэс (балами́ткэс) “Апполион.”

¹² Пэ́рво би́да гия́ криг, акэ, ишчо (инкэ́) дуй биды, со джа́на пал пэрвонатэ.

¹³ И шо́вто Янго́ло пхурдыя дрэ пэ́скиро ро́го и мэ шундём зан штартонэ вэнглэндыр сувнакунэ́ алтарёстыр, со сыс анги́л Дэвлэ́стэ,

¹⁴ ґа́да, зан пхэнэлас шовтонэ Янголоскэ, савэ́стэ сыс ро́го: “Роспхандэ штарэ́ Янголэн, савэ́ исын пхандлэ пашы́л рэка (лэнь) Евфрато.”

¹⁵ И штар Янго́лы сыс роспхандлэ, савэ́ сыс скэдынэ́ ваш шту́нда и дывэ́с, и чхон, и бэрш тэ мулякирэ́н три́то паш манушэ́ндыр;

¹⁶ и сыс дуй милионы халадэ́н пэ грэ́ндэ и мэ шундём лэ́нгиро кицыпэн (количэство).

¹⁷ И, ґа́да, мэ дыкхцём грэн сы́рбы дрэ сунэ́ и одолэ́н, савэ́ сыс бэштэ́ уклистэ́ пэ лэ́ндэ; лэ́ндэ сыс саструнэ́ панцыри, лолэ́ сыр яг, цёмна-синэ сыр гиацынто, жылта сыр се́ра (дзэвэ́ля). Грэнгирэ шэрэ́ сыс сыр шчэрэнгирэ (левэнгирэ) шэрэ́, и лэ́нгирэ мо́стыр джа́лас яг, тхув и се́ра (дзэвэ́ля).

¹⁸ Три́то паш манушыпнастыр сыс мулякирды далэ́ тринэ́ франсэ́ндыр: яга́са, тхувэса и дзэвэляса, со джа́нас яври́ грэнгирэ муендыр.

¹⁹ Пал-дова́ со грэнгири зор сыс дрэ муя́ и порья лэ́нгирэ: и лэ́нгирэ порья сыс сыр сапа шэрэнца, савэ́нца ёнэ дукхавэнас.

²⁰ И яви́р ману́ш, савэ́ на сыс мулякирдэ́ кадалэ́ франсэнца, аж на рискирдэ́ палэ долэ́стыр, со ёнэ кэрдэ́ пэ́скирэ вастэ́нца. Ёнэ на пириячнэ тэ бандякирэн шэрэ́ налачхэ́ духэнгэ, хоханэ́ дэвлэнгэ сувнака́стыр, рупэ́стыр и харкома́тыр, барэ́стыр и каштэ́стыр, савэ́ на могинэ́на ни тэ дыкхэ́н, ни тэ шунэ́н, ни тэ псирэ́н.

²¹ И ёнэ на приджиндлэ пэ́скири банг дрэ мэрибэна, ни дрэ човаханыпэна, ни дрэ биладжакунэ́ рэ́нды, ни дрэ чорибэна.