Sykadyipén 8 - Библия - Пэ Балтитко Романи чиб (Романэс) 2019

Эфта́то Чэргэнори́ (Якхи́тко)

¹ Ке́ли Свэ́нто Бакроро́ отпхандя эфта́то (битринэнтиро дэ́што) чэргэнори́, тэды яця́ штылыпэн пэ болыбэ́н пэ паш мардо́ (шту́нда).

² И мэ дыкхцём эфта́ Янголэн, савэ́ сыс тэрдэ́ анги́л Дэвлэ́стэ, и лэ́нгэ сыс дынэ́ эфта́ ро́ги (трубы).

³ И явдя́ яви́р Янго́ло и тэрдия́ анги́л алта́рё. Лэ́скэ сыс дыны́ тхувэнгири тыкнори (кадила), кай сыс бут фимиа́мо соб (кай), кай ёв тэ чхувэ́л кхэтанэ́ мангипнэнца свэнтонэ́ манушэ́ндыр пэ сувнакуно́ алта́рё, со сыс тэрдо́ анги́л троно.

⁴ И фимиа́мо ґаздыя́пэ кхэтанэ́ мангипнэнца Дэвлэ́скэ свэнтонэ́ манушэ́ндыр анги́л Дэвлэ́стэ Янголоскирэ вастэ́стыр.

⁵ И Янго́ло лыя́ тхувэнгири тыкнори (кадила), пхэрдякирдя́ ла яга́са алтарёстыр и чхурдыя́ ла пэ пхув: и сыс заня́ и гро́мы, и блискави́цы, и пхувья́киро тринскирибэн.

Башаибны́тка Ро́ги

⁶ И эфта́ Янго́лы эфта́ (эфтанэ) рогэ́нца (трубэнца) скэдынэ́пэ тэ пхурдэ́н дрэ ро́ги.

⁷ И пэ́рво Янго́ло пхурдыя дро пэ́скиро ро́го; яця́ ґрадо и яг, савэ́ сыс змешындлэ ратэ́са и сыс чхурдынэ́ пэ пхув. Три́то паш пхувья́тыр хачия и три́то паш каштэндыр (дрэвэндыр) хачия, и кажно зэлэны чар хачия.

⁸ И яви́р Янго́ло пхурдыя дрэ пэ́скири ро́го и вари-саво́ дова́, со сыс сы́рбы бари бэ́рга яга́са, со хачолас, сыс чхурдыно́ дро мо́рё (дэрья́в). Три́то морёскири паш кэрдя́пэ ратэ́са;

⁹ и мыя́ три́то паш джидалэндыр, савэ́ дживэ́на дро мо́рё (дэрья́в), и три́то паш пармэндыр (кораблендыр) пхадия.

¹⁰ И три́то Янго́ло пхурдыя дрэ пэ́скиро ро́го: и бари чэргэн пыя́ тэлэ́ болыбна́стыр, сави́ хачолас сыр момолы́тко (свети́льнико), и пыя́ пэ три́то паш рэкэндыр (лэнорьендыр) и панескирэ ґанынгорьендыр.

¹¹ Адалэ́-чэргэнякиро лав исын Полы́но (Вэ́рмуля); и три́то паненгири паш яця́ киркэ чарьяса, и бут мануша́ мынэ́ панендыр, пал-дова́ со ёнэ ячнэ́ киркэ.

¹² И шта́рто Янго́ло пхурдыя дрэ пэ́скири ро́го: и три́то паш кхамэскири сыс отмарды, и три́то паш чхонэскири, и три́то паш чэргэненгири, со калынэ; на сыс дуд (свэ́то) ни дро три́то паш дывэсы́тко, ни адя́кэ-паць рати́тко.

¹³ И мэ дыкхцём и шундём екхэ орло́с (кидо́с), саво́ вурнялас вучэ́с дро болыбэ́н, ракири́: “Бида, би́да, би́да одолэ́нгэ, кон дживэ́ла пэ пхув, сыр яви́р трин Янго́лы явэ́на тэ пхурдэ́н дрэ ро́ги.”