Sykadyipén 7 - Библия - Пэ Балтитко Романи чиб (Романэс) 2019

Чэргэнори́ пэ Дэвлэ́скиро Писхарье́ндэ

¹ Пало́ дава́ мэ дыкхцём штарэ́ Янголэн, Савэ сыс тэрдэ́ пэ штар вэ́нглы пэ пхув и рикирэнас штар балваля, соб (кай) тэ на пхурдэл ни сави́ балва́л ни пир пхув, ни пир мо́рё (дэрья́в), ни пир вари-саво́ кашт (дрэ́во).

² И мэ дыкхцём явирэ Янголо́с, Саво́ джа́лас долэ́ рига́тыр, кай кхам уштэ́ла и савэ́стэ сыс Джидэ́-Дэвлэ́скири чэргэнори́. Ёв дыя́ го́дла зоралэ́ заня́са штарэ́ Янголэнгэ, конэ́скэ Дэвэ́л дыя́ зор тэ кэрэ́л чорипэ́н пэ пхув и пэ мо́рё (дэрья́в) и пхэндя́:

³ “На кэрэ́н чорипэ́н ни пэ пхув, ни пэ мо́рё (дэрья́в), анги́л дова́, сыр амэ чхуваса чэргэнори́ пэ чэкат писхарье́нгэ Амарэ́ Дэвлэ́скирэ.”

⁴ И мэ шундём одолэнгирэ-манушэ́нгиро кицыпэн (количэство), конэ́скэ чхудэ́ чэргэнори́: 144000 мануша́, савэ́ сыс сарэ́ Израилёскирэ-чхавэ́нгирэ родэндыр (чангэ́ндыр):

⁵ 12 тысёнцы Юда́скирэ родо́стыр, 12 тысёнцы Рувимо́скирэ родо́стыр, 12 тысёнцы Гадо́скирэ родо́стыр (чангэ́ндыр);

⁶ 12 тысёнцы Асироскирэ родо́стыр, 12 тысёнцы Нефалимоскирэ родо́стыр, 12 тысёнцы Манасиякирэ родо́стыр;

⁷ 12 тысёнцы Симёоноскирэ (Семёноскирэ) родо́стыр, 12 тысёнцы Левиёскирэ родо́стыр, 12 тысёнцы Изахароскирэ родо́стыр;

⁸ 12 тысёнцы Завулоноскирэ родо́стыр, 12 тысёнцы Ёза́скирэ (Иосифо́скирэ) родо́стыр, 12 тысёнцы Вениамино́скирэ родо́стыр.

Бут исын Дэвлэ́скирэ Мануша́

⁹ Пало́ дава́ саро́ мэ дыкхцём, и, ґа́да, исын бут бут мануша́, со никонэ́скэ на сыс пир зор тэ гинэл лэн, сарэ́ кхэритконэ́ родэндыр, сарэ́ родэндыр, сарэ́ манушытконэ́ нацые́ндыр, сарэ́ екхэ-чибакирэ ирье́ндыр (сэм΄е́ндыр/чибэ́ндыр/чибье́ндыр), савэ́ сыс тэрдэ́ анги́л троно и анги́л Свэнтонэ́ Бакрорэстэ. Ёнэ сыс уридэ́ дрэ парнэ́ урибэна́, и дрэ васта́ сыс лэ́ндэ пальмитка рандя́ (вэ́тки).

¹⁰ И ёнэ дэ́нас го́дла зоралэ́ заня́са и пхэнэнас: “Зракхибэ́н явэ́ла амарэ́ Дэвлэ́стыр, Саво́ исын бэшто́ пэ троно и Свэнтонэ́ Бакрорэстыр.”

¹¹ И сарэ́ Янго́лы, со сыс тэрдэ́ трусця́л троно, и годэпхурэ́ и штар джидалэ́ (жывотна) пынэ́ пэ́скирэ муе́нца анги́л троно и поклониндлэпэ патыва́са (кэрдэ́ шэрэ́са) Дэвлэ́скэ,

¹² и пхэнэнас: “Ами́нь! Мэк манушэ́нгиро шарибэ́н, и сла́ва, и годыпэ́н, и парикирибэн, и паты́в, и зоралыпэ́н, и зор тэ явэ́л амарэ́ Дэвлэ́скэ пэ сарэ́ ве́ки. Ами́нь.”

¹³ Екх годэпхурэндыр отпхэндя́ ма́нгэ, пхэни́: “Кон исын кадалэ́ мануша́, савэ́ндэ исын парнэ́ урибэна́, каты́р ёнэ исын?”

¹⁴ И мэ пхэндём лэ́скэ: “Раё Миро, Ту ж джинэ́са.” И ёв пхэндя́ ма́нгэ: “Дава́ исын кодолэ́ мануша́, со явнэ́ барэ́ страдицостыр (бидатыр), вымордэ пэ́скирэ урибэна́ и парнякирдэ лэн Свэнтонэ́ Бакрорэскирэ ратэ́са.

¹⁵ Ваш дава́ ёнэ исын анги́л Дэвлэ́скиро троно и дынаринэ́нас (служынэ́нас) Лэ́скэ дывэсэ́ и раты́ дрэ Лэ́скири Кхангири́. Одова́, Кон исын бэшто́ пэ троно, росчхувэла пэ́скири ша́тра пэ лэ́ндэ сы́рбы зракхэ́ла лэн.

¹⁶ Ёнэ на явэ́на буты́р тэ бокхалён, на явэ́на тэ тырдэнпэ тэ пьен: кхам и вари-саво́ хачкирибэ́н на пэрэ́ла пэ лэ́ндэ;

¹⁷ сыр Свэ́нто Бакроро́, Саво́ исын машкира́л троно, явэ́ла тэ чалякирэл лэн и тэ лыджа́л кэ ґанынгорья джидэ́-панескирэ. И Дэвэ́л выкхосэла кажно ясвин лэ́нгирэ якхэ́ндыр.”