Sykadyipén 4 - Библия - Пэ Балтитко Романи чиб (Романэс) 2019

Сыр Явэ́на тэ Мангэ́нпэ Дэвлэ́скэ дро Болыбна́скиро Раё

¹ Пало́ (после) дава́ мэ дыкхцём, – ґа́да, со вуда́р исын псирадо (отпхандло) дро Болыбна́скиро Раё. И доя́-паць зан, со ґарэдыр мэ шундём, хай, рогоскири (трубакири), сави́ ракирдя́ ма́нца, пхэндя́: “Яв упрэ́ адари́к, и Мэ сыкава́ва ту́кэ, со сыг явэ́ла пало́ дава́.

² Екха́тыр Ду́хо (Фа́но) лыя́ упралыпэ́н пэ ма́ндэ. И, акэ, сыс троно дро Болыбна́скиро Раё, и пэ дава́ троно сыс бэшто́ Вари-Кон.

³ И Одова́, Кон сыс бэшто́, зяиндя сыр бар ясписо и сардисо, и сыс брышындэскири банги (радуга) трусця́л троно сы́рбы смарагдо.

⁴ И трусця́л кадава́ троно сыс биш тэ штар яви́р троны и биш тэ штар годэпхурэ́ сыс бэштэ́ пэ кадалэ́ троны дрэ парнэ́ урибэна́ и пэ шэрэ́ сыс лэ́ндэ сувнакунэ́ вянки (короны).

⁵ И троностыр джа́нас блискави́цы, и заня́, и гро́мы и эфта́ шандалэ (подсвечники) хачонас анги́л троно, савэ́ исын эфта́ Дэвлэ́скирэ ду́хи.

⁶ Анги́л троно сыс стёклы́тко (балунало́) мо́рё (дэрья́в) сыр кристало, и машкира́л и трусця́л троно сыс штар джидалэ (жывотна), савэ́ндэ сыс пхэрдо́ якха́ пала́л и анги́л;

⁷ и пэ́рво джидало сыс сыр шчэр (ле́во), яви́р джидало сыс сыр гуруворо, и тритонэстэ джидалэстэ сыс манушы́тко муй, и шта́рто джидало сыс сыр вурняибнытко о́рло (ки́до).

⁸ И кажнонэ́ джидалэстэ сыс шов пхака́ (крылы) пэ сарэ́ рига́, и андрэ́ сыс пхэрдо́ якха́ и дывэсэ́ и раты́ ёнэ ракирэ́нас: “Свэ́нто, Свэ́нто, Свэ́нто исын Рай Дэвэ́л, Сарэзорья́киро, Саво́ сыс исын, и Саво́ трэй исын тэ явэ́л.”

⁹ И ке́ли штар джидалэ (жывотна) славинэна, дэ́на паты́в и парикирэна Одолэ́скэ, Кон исын бэшто́ пэ троно и Саво́ дживэ́ла ве́чнэс пэ сарэ́ ве́ки,

¹⁰ тэды дэшуштар годэпхурэ́ клонинэнапэ патыва́са анги́л Кадалэстэ, Кон исын бэшто́ пэ троно, и Саво́ дживэ́ла ве́чнэс пэ сарэ́ ве́ки. Ёнэ чхурдэна пэ́скирэ вянки (короны) анги́л троно, пхэни́:

¹¹ “Амаро́ Рай Дэвэ́л и Дэвэ́л! Ту сан мол тэ прилэс сла́ва, паты́в и зор, пал-дова́ со Ту создыян саро́ и пир Тыри́ во́ля саро́ сыс создыно́ и дживэ́ла.”