Sykadyipén 3 - Библия - Пэ Балтитко Романи чиб (Романэс) 2019

Лыл Кхангирья́кэ дро Сардисо

¹ И чхин Янголоскэ Сардисоскирэ кхангирья́тыр: “Дава́ ракирэ́ла Одова́, Конэ́стэ исын эфта́ Дэвлэ́скирэ ду́хи и эфта́ чэргэня́: “Мэ джино́м (джина́в) тыри́ буты́, и со мануша́ дэн годы́ пэ́скэ (думинэ́на), со ту сан джидо́, нэ ту сан муло́.

² Ракхпэ и зоралякир дова́, со яця́пэ ту́тэ и со мэрэ́ла сыг, пал-дова́ со Мэ на латхём, соб (кай) тыри́ буты́ тэ явэ́л пхэрды́ анги́л Мирэ́ Дэвлэ́скирэ якха́.

³ Палдава́ пририпир дова́, со ту сыклякирдян, со ту шундя́н, ракх да́ва и ри́скир пэ́скиро джиибэ́н кэ Дэвэ́л. Ко́ли ту на явэ́са тэ ракхэспэ, тэды Мэ ява́ва пэ ту́тэ сыр чор, и ту на явэ́са тэ джинэ́с, ке́ли мэ ява́ва.

⁴ Нэ исын на́бут мануша́ ту́тэ дро Сардисо, савэ́ на мэлякирдэ пэ́скирэ урибэна́ грэхэ́нца, и ёнэ явэ́на тэ псирэ́н Ма́нца дрэ парнэ́ урибэна́, пал-дова́ со ёнэ исын лачхэ́.

⁵ Кон лэ́ла упралыпэ́н, одова́ урьела парнэ́ ризы, и Мэ на кхосава криг лэ́скиро лав джиибнытконэ лылварьятыр (книгатыр), и мэ приґалёвава лэ́скиро лав анги́л мирэ́ Дадэ́стэ и анги́л Лэ́скирэ Янголэндэ,

⁶ Конэ́стэ исын кана́, мэк ёв тэ шунэ́л, со Ду́хо (Фа́но) ракирэ́ла кхангирье́нгэ!”

Лыл Кхангирья́кэ дрэ Филадэльфия

⁷ И чхин Янголоскэ Филадэльфиякирэ кхангирья́тыр: “Дава́ ракирэ́ла Одова́, Кон исын Свэ́нто, Чачуно́. Лэ́стэ исын Давидо́скиро клыдын и Ёв псиравэла (отпхандэла) вуда́р, и нико́н на пхандэла, и ке́ли Ёв пхандэла, ние́кх на псиравэла.

⁸ Мэ джино́м тыри́ буты́. Дыкх: Мэ чхудём анги́л ту́тэ псирадо вуда́р и никонэ́скэ нашты́ тэ пхандэл дава́ вуда́р. Ту́тэ исын на́бут зор, и ту зракхця́н Миро лав и ту на отпхэндянпэ Ма́ндыр.

⁹ Акэ, мэ да́ва ту́кэ одолэ́н, савэ́ исын налачхэскирэ скэдыибна́стыр, савэ́ ракирэ́на, со ёнэ исын Юды, а дава́ нанэ чачипэ́н, ёнэ исын хохаибнарья; ґа́да, Мэ кэра́ва адя́кэ, соб (кай) ёнэ тэ дэн “паклоно” патыва́са анги́л тырэ́ ґэра́, тэ джинэ́н, со Ма́нгэ яця́н ту дро́го.

¹⁰ Палдава́ со ту ракхцян лав тэ вырикирэс, то и Мэ адя́кэ-паць ракхава тут мардэстыр (штундатыр), ке́ли явэ́на тэ пропатякирэн саро́ свэ́то, соб (кай) тэ пропатякирэн кажнонэ́ манушэ́с, кон дживэ́ла пэ пхув.

¹¹ Дыкх, Мэ сы́гэс ява́ва. Рикир, со исын ту́тэ, соб (кай) вари-кон тэ на лэл ту́тыр тыри́ вя́нка (коро́на), ке́ли ту лыян упралыпэ́н.

¹² Кон лэ́ла упралыпэ́н, кодолэстыр Мэ кэра́ва важно сты́лбо дрэ Мирэ́-Дэвлэ́скири Кхангири́, и ёв буты́р на выджа́ла яври́. И Мэ чхина́ва пэ дава́ сты́лбо Мирэ́ Дэвлэ́скиро лав, и Мирэ́-Дэвлэ́скирэ форо́скиро лав “Нэво́ Ерусалимо.” Дава́ нэво́ Ерусалимо явэ́ла тэ джал тэлэ́ Болыбна́скирэ Раёстыр, Мирэ́ Дэвлэ́стыр. И Мэ чхина́ва пэ лэ́стэ Миро нэво́ лав.

¹³ Конэ́стэ исын кана́, мэк ёв тэ шунэ́л, со Ду́хо (Фа́но) ракирэ́ла кхангирье́нгэ.”

Лыл Кхагирья́кэ дрэ Лаодикия

¹⁴ И чхин Янголоскэ Лаодикиякирэ кхангирья́тыр: “Дава́ ракирэ́ла “Ами́нь”, патяибны́тко и чачуно́ Якхи́тко, Саво́ исын англыпэ́н сарэскэ, со́стыр Дэвэ́л создыя́ свэ́то:

¹⁵ Мэ джино́м (джина́в) тыри́ буты́, со ту на сан шылало, и со ту на сан хачкирдо. Фэды́р явэ́лас, соб (кай) ту тэ явэс хачкирдо ци шылало.

¹⁶ Палдава́ со ту сан тато, а ту на сан шылало ци хачкирдо, мэ чунгардава тут Мирэ́ мо́стыр.

¹⁷ Пал-дова́ со ту ракирэ́са: ‘Мэ сом барвало́ и мэ барвалыём и ма́нгэ на трэй ничы́, нэ ту на джинэ́са, со ту сан бэдо и бибахтало́; чороро́, короро́ и нанго;’

¹⁸ палдава́ мэ подпхэнава ту́кэ тэ кинэс сувнака́й Ма́ндыр, саво́ сыс пробиндло яга́са. Кин адя́кэ-паць парны и́дя тэ урьеспэ, соб (кай) тэ сыкавэс ладж пэ́скирэ нангипнаскири; и помакх пэ́скирэ якха́ якхитконэ макхлуняса (мазяса), соб (кай) тэ дыкхэ́с.

¹⁹ Сарэ́нгэ, кон исын дро́го Ма́нгэ, Мэ пхэна́ва зорья́са лэ́нгири банг и сыклякирава лэн кэ дукха́. Палдава́ яв хачкирдэ́ илэ́са кэ Дэвэ́л и ри́скир пэ́скиро джиибэ́н кэ Ёв.

²⁰ Дыкх! Мэ сом тэрдо́ пашы́л вуда́р и марава дрэ лэ́стэ; ко́ли вари-кон шунэ́ла Мири́ зан и псиравэла (отпхандэла) вуда́р, тэды Мэ заджава андрэ́ кэ ёв и ява́ва тэ хав бэльвэлякиро хабэ́н лэ́са и ёв Ма́нца.

²¹ Одолэ́с, кон лэ́ла упралыпэ́н, Мэ бэшлякирава лэс тэ бэшэ́л Ма́нца пэ троно, сыр и Мэ, ке́ли Мэ лыём упралыпэ́н и бэсцём Мирэ́ Дадэ́са пэ Лэ́скиро троно.

²² Конэ́стэ исын кана́, мэк ёв тэ шунэ́л, со Ду́хо (Фа́но) ракирэ́ла кхангирье́нгэ.”