Sykadyipén 22 - Библия - Пэ Балтитко Романи чиб (Романэс) 2019

Джиибна́скири Рэка

¹ И Янго́ло сыкадя́ ма́нгэ рэка (лэнь) джиибна́скирэ пане́са, сави́ сыс жужы, сыр кристало. Ёй тхадэлас Дэвлэ́скирэ и Бакрорэ́скирэ троно́стыр.

² Машкир форо́скири ґаса (вули́ца), пэ екх и пэ яви́р рэкакири (лэнякири) риг сыс джиибна́скиро кашт (дрэ́во), со дэ́лас дэшуду́й барьякирдэ́ (пло́ды), кажно чхон пэ́скиро барьякирдо́. И каштэ́скирэ патря́ (листы) сыс тэ састякирэн манушы́тка на́цыи (народы).

³ И буты́р на явэ́ла нисо́ прокошно́. И Дэвлэ́скиро и Свэнтонэ́-Бакрорэскиро троно явэ́на дро дава́ фо́ро и Лэ́скирэ писха́рья явэ́на тэ дынаринэ́н Лэ́скэ,

⁴ и ёнэ явэ́на тэ дыкхэ́н Лэ́скиро муй. И Лэ́скиро титуло явэ́ла пэ лэ́нгирэ чэката.

⁵ И рат на явэ́ла буты́р и лэ́нгэ на явэ́ла трэй лампакиро дуд (свэ́то) и дуд кхамэстыр, пал-дова́ со Рай Дэвэ́л явэ́ла тэ дэл лэ́нгэ дуд. И ёнэ явэ́на тэ кралинэн пэ сарэ́ ве́ки.

Сыр Ису́со Явэ́ла

⁶ И Янго́ло пхэндя́ ма́нгэ: “Кадалэ́ лава́ исын патяибнытка и чачунэ́. И Рай Дэвэ́л, Кон дэ́лас ду́хо (фа́но) пророкэнгэ [свэнтонэ́-р.с.], бичхадя́ Лэ́скирэ Янголо́с тэ сыкавэ́л Лэ́скирэ писхарье́нгэ дова́, со трэй тэ явэ́л сыг.

⁷ И, акэ, Мэ ява́ва сыгэс”, – ракирэ́ла Христо́со. “Бахтало́ исын кодова́, кон ракхэ́ла пророчытка лава́ лылварьякирэ пхэныбнастыр пал дова́, со явэ́ла анги́л.”

⁸ Мэ сом, Иа́но, саво́ дыкхця́ и шундя́ кадава́. И ке́ли мэ шундём и дыкхцём, тэды мэ пыём мо́са тэ поклонинавпэ патыва́са анги́л Янголоскирэ ґэра́, Саво́ сыкавэлас ма́нгэ сарэ́ далэ́ рэ́нды.

⁹ Нэ ёв пхэндя́ ма́нгэ: “Дыкх! На кэр дава́! Мэ сом дасаво-паць писха́ри, сыр ту сан. Мэ адя́кэ-паць сом писха́ри, сыр и тырэ́ пша́ла, проро́ки, савэ́ ракхэна лава́ далэ́ лылварьякирэ свиткостыр: “Кэр шэрэ́са (клонинпэ) патыва́са Дэвлэ́скэ!”

¹⁰ И ёв пхэндя́ ма́нгэ: “На́ чхув чэргэнори́ пэ лава́ пхэныбнастыр пал дова́, со явэ́ла анги́л (со исын дро лылварьякиро сви́тко), пал-дова́ со часо исын пашы́л.

¹¹ Мэк начачуно дурэды́р тэ кэрэ́л начачипэ́н, мэк ладжакирдо́ кэ магирибэн дурэды́р тэ кэрэ́л ладжаипэ́н. Мэк чачуно́ дурэды́р тэ кэрэ́л чачипэ́н; мэк свэ́нто дурэды́р тэ явэ́л Свэнтонэса.”

¹² “Акэ, Мэ ява́ва сы́гэс (ракирэ́ла Христо́со), – соб (кай) Мэ тэ отдав палэ кажнонэ́скэ пир дова́, со ёв кэрдя́.

¹³ Мэ сом Альфа и Омега, Пэ́рво и Палатуно́, Англыпэ́н и Ко́нцо (Яго́ро).

¹⁴ Бахталэ́ исын одолэ́, савэ́ рикирэнапэ кэ Лэ́скирэ припхэныбэна́, соб (кай) лэ́ндэ тэ явэ́л право кэ джиибна́скиро кашт (дрэ́во), и соб (кай) тэ заджа́л дро фо́ро пир по́рта.

¹⁵ А яври́ пал фо́ро исын джукэла, човаханэ, и кон дживдя́ джувле́нца сыр ромня́са би сэвлакиро, замарибнарья, и кон мангдя́пэ идолэ́нгэ, и сарэ́ яви́р, конэ́скэ дава́ сыс пир ило́ тэ ракирэ́л хохаибэ́н.

¹⁶ Мэ сом, Ису́со, бичхадём Мирэ́ Янголо́с тэ допхэнав тумэ́нгэ дава́ пир кхангирья. Мэ сом Давидо́скирэ ратэстыр и лэ́скирэ-чхавэ́нгиро чхаво́, ярко Злокоскири Чэргэн.”

¹⁷ Ду́хо (Фа́но) и тэрны́ пхэнэ́на: “Яв!” И мэк о одова́, кон шунэ́ла, тэ пхэнэ́л: “Яв!” И мэк одова́, конэ́стэ исын смэ́га, тэ пьел джиибна́скиро пани́ би ловэнгиро.

¹⁸ Мэ допхэнава кажнонэ́скэ, кон шунэ́ла лава́ далэ́ лылварьякирэ пхэныбнастыр пал дова́, со явэ́ла анги́л, со исын дро сви́тко тэ ракхэлпэ: ко́ли вари-кон пхэнэ́ла лишнима кэ дава́ пхэныбэ́н, со явэ́ла анги́л, тэды Дэвэ́л бичхавэ́ла фра́нсы пэ кодолэстэ, пал со исын чхиндло́ дро дава́ лылварьякиро сви́тко.

¹⁹ И ко́ли вари-кон отлэла вари-со далэ́ лылварья́кирэ пхэныбна́стыр, со явэ́ла анги́л, тэды Дэвэ́л отлэла лэ́скиро штэ́то джиибна́скирэ каштэ́стыр (дрэвостыр) дро свэ́нто фо́ро, пал со исын чхиндло́ дро дава́ лылварья́киро сви́тко.

²⁰ Одова́, Кон допхэнэ́ла саро́ кадава́, ракирэ́ла: “Чачо́. Мэ ява́ва сыг.” Ами́нь. Яв, Раё Дэ́вла, Ису́со.

²¹ Мэк бахталыпэ́н Ра́скирэ-Дэвлэ́скирэ, Исусо́скиро Христосо́скиро тэ явэ́л тумэ́нца.