Sykadyipén 21 - Библия - Пэ Балтитко Романи чиб (Романэс) 2019

Нэво́ Болыбэ́н и Нэви́ Пхув

¹ И мэ дыкхцём нэво́ болыбэ́н и нэви́ пхув. Пэ́рво болыбэ́н и пэ́рво пхув хасинэ́ и мо́рё (дэрья́в) буты́р нанэ.

² И мэ, Иа́но, дыкхцём Свэ́нто Фо́ро, нэво́ Ерусалимо, саво́ джа́лас тэлэ́ Дэвлэ́стыр болыбна́стыр. Фо́ро сыс скэдыно́ и шукар уридо́ сы́рбы тэрны́ ваш ла́кирэ ромэ́скэ.

³ И мэ шундём зоралы́ зан троностыр, со пхэндя́: “Акэ, исын Дэвлэ́скири ша́тра кхэтанэ́ манушэ́нца! Ёв явэ́ла тэ дживэ́л лэ́нца, и ёнэ явэ́на Лэ́скирэ мануша́. Кокоро́ Дэвэ́л явэ́ла лэ́нца и Ёв явэ́ла лэ́нгиро Дэвэ́л.

⁴ И Дэвэ́л выкхосэла кажно ясвин лэ́нгирэ якхэ́ндыр. Мэрибэ́н буты́р на явэ́ла, ни ту́га, ни роибэ́н, ни дукх. Пал-дова́ со саро́, со сыс анги́л, хасия́.”

⁵ И, Кодова́, Кон сыс бэшто́ пэ троно, пхэндя́: “Акэ, мэ кэра́ва саро́ нэво́.” И адя́кэ-паць пхэнэ́ла ма́нгэ: “Зачхин, пал-дова́ со кадалэ́ лава́ исын чачунэ́ и патяибнытка.”

⁶ И Ёв пхэндя́ ма́нгэ: “Кэрдя́пэ кэ ко́нцо (яго́ро) (сполниндяпэ). Мэ сом Альфа и Омега, Англыпэ́н и Ко́нцо (Яго́ро). Одолэ́скэ, конэ́стэ исын смэга (жажда), Мэ да́ва тэ пьел джиибна́скирэ-панё́скирэ ґанынгорьятыр би ловэнгиро.

⁷ Одова́, кон лэ́ла упралыпэ́н, прилэ́ла дава́ мэкно́ миштыпэ́н Ма́ндыр: Мэ ява́ва лэ́скэ Дэвэ́л, и ёв явэ́ла Миро Чхаво́.

⁸ А даранду́ки, напатяибна́скирэ, магирдэ́ дро вари-со, замарибна́рья; одолэ́, кон кэрдя́ биладжаипэ́н, човаханэ́, кон клониндяпэ патыва́са (кэрдэ шэрэ́са) идолэ́нгэ, хохаибна́рья-лэ́нгири паш явэ́ла кхэтанэ́ дро зеро (озеро), со хачола яга́са и дзэвэля́са (сераса); дава́ исын-яви́р мэрибэ́н.”

Нэво́ Ерусали́мо

⁹ И ґа́да, екх эфта́ (эфтэ) Янголэ́ндыр, савэ́ндэ сыс эфта́ тахтая́ (чашы), со сыс пхэрдэ́ эфта́ палатунэ́ франсэ́нца, подги́я кэ, мэ и пхэндя́: “Яв! Мэ сыкава́ва ту́кэ тэрня́ Свэнтонэ́-Бакрорэ́скирья ромня́!”

¹⁰ Мэ со́мас дро ду́хо (фа́но) и Янго́ло ґаздыя́ ман пэ бари и вучи́ бэ́рга и сыкадя́ ма́нгэ свэ́нто фо́ро, Ерусалимо, со джа́лас тэлэ́ болыбна́стыр, Дэвлэ́стыр.

¹¹ Дава́ фо́ро зяиндя Дэвлэ́скирэ ярконэ́ слава́са. Лэ́скиро дуд, саво зяиндя, сыс сы́рбы древа́н куч бар, со зяинэла, сыр бар ясписо, дыцьло сыр кристало.

¹² Дро дава́ фо́ро сыс бари и вучи́ ва́нта дэшудуе́ портэнца (вратэнца) и дэшуду́й Янго́лы сыс пашы́л далэ́ по́рты, а пэ далэ́ по́рты сыс зачхиндлэ́ дэшуду́й лава́, со исын дэшуду́й ти́тулы-дэшудуе́ Израилёскирэ родэ́ндыр.

¹³ Пэ чачи́ риг сыс трин по́рты, трин по́рты пэ за́падно паш-рати́тко (северно) риг, трин по́рты пэ паш-дывэсы́тко (южно) риг, трин по́рты пэ пал-панитко (за́падно) риг.

¹⁴ Форо́скиро ты́но рикирдяпэ пэ дэшуду́й тэлатунэ́ бара́, пэ савэ́ сыс дэшуду́й лава́ Свэнтонэ́-Бакрорэ́скирэ Апостолэ́ндыр.

¹⁵ И Янголостэ, саво́ ракирдя́ ма́нца, сыс сувнакуно́ дэсто́ тэ меринэл фо́ро, по́рта (вра́ты), лэ́скиро тыно (ва́нта).

¹⁶ И фо́ро сыс сыр квадрато: лэ́скиро длэнгипэ́н сыс дасаво-паць сыр буґлыпэ́н. И Янго́ло змериндя фо́ро дэстэса: дуй бара́ штар шэла́ километры (вэрсты), длэнгипэ́н, и буґлыпэ́н, и вучипэ́н исын дасавэ́-паць.

¹⁷ И ёв мериндя форо́скири бар: шовдэша́ мэтры штар шэла́ пир манушэ́нгири ме́ра, дава́ исын и Янголоскири ме́ра.

¹⁸ Фороскири ва́нта (бар) сыс кэрды ясписостыр, а фо́ро сыс жужэ́ сувнака́стыр сыр жужо́ стёкло (балу́н).

¹⁹ И тэлатунэ́ бара́, пэ савэ́ сыс форо́скири ва́нта, сыс гожакирдэ кажнонэ́ куч барэ́нца: пэ́рво тэлатуно бар сыс ясписостыр, яви́р – сапфиростыр, три́то – халкидоностыр, шта́рто – зумрудостыр;

²⁰ па́нджто – сардониксостыр, шо́вто – сардисостыр, эфта́то-хризолитостыр, охто́то – бирилостыр, еня́то – топазостыр, дэ́што – христопразостыр, дэшупэрво – гиацынтостыр, дэшудуйто – аметистостыр.

²¹ И дэшуду́й по́рты сыс кэрдэ́ дэшудуе́ мутинэ́ндыр (жэмчугэндыр), кажно по́рта екхэ мутинатыр. Форо́скирэ вули́цы (га́сы) сыс жужэ́ сувнака́стыр сыр прозрачно стёкло (балун).

Нэвонэ́ Ерусалимо́скири Ярко Сла́ва

²² Нэ мэ на дыкхцём Кхангири́ дро дава́ фо́ро, пал-дова́, со Рай Дэвэ́л, Сарэзорья́киро, и Свэ́нто Бакроро́ Кокоро́ исын дая́ Кхангири́.

²³ Фороскэ на трэй ни кхам, ни чхон тэ дэл дуд (свэ́то), соб (кай) тэ зяинэл дро лэ́стэ. Дэвлэ́скири ярко сла́ва зяинэла дудэ́са дро фо́ро и Бакроро́ исын сы́рбы момолы́тко (свети́льнико).

²⁴ И манушы́тка народы явэ́на тэ псирэ́н форо́скирэ дудэ́стыр, а кра́лья пэ пхув янэ́на пэ́скиро миштыпэ́н.

²⁵ И форо́скири по́рта на запхандэ́лапэ ни дывэсэ́, пал-дова́ со рат на явэ́ла одо́й.

²⁶ И манушы́тка расы (народы) янэ́на дро фо́ро сла́ва и паты́в.

²⁷ Ни саво́ магирдо́, и кодова́, кон кэрэ́ла джунгалыпэ́н (брыткима) и хохавэла нашты́ тэ заджа́л дро дава́ фо́ро, а екх одова́, кон исын зачхиндло́ дрэ джиибна́скири лылвари́ Бакрорэстэ.