Sykadyipén 2 - Библия - Пэ Балтитко Романи чиб (Романэс) 2019

Лыл Ефесянэ́нгэ

¹ Чхин Янголоскэ Эфесоскирэ кхангирья́тыр: “Дава́ исын лава́ Одолэ́стыр, Кон рикирэ́ла эфта́ чэргеня дро Лэ́скиро чачо́ (право) васт, Кон псирэ́ла машки́р эфта́ сувнакунэ́ момолытка:

² “Мэ джино́м (джина́в) Тыри́ буты́ и сыр бут ту кэрдя́н буты́, и тыро́ вырикирибэн, и дова́, со ту на могинэ́са тэ пирилыджас чорэ́ манушэ́н, и со ту пропатякирдян кодолэ́н, савэ́ пхэнэ́на пэ пэ́стэ “Апо́столы” и савэ́ нанэ, со ту латхян, со ёнэ исын хохаибнарья;

³ и со ту вырикирдян, и со ту пиризорьякирдян мэ́ньки пал Миро лав и на ивья́ (на дармэс) кэрдя́н дава́:

⁴ нэ Мэ бангякирава тут пал дова́, со ту́кэ нанэ дро́го буты́р, со сыс ту́кэ са́мо дро́го ґарэды́р.

⁵ Тэды ри́пир дова́ лачхипэ́н, саво́ ту мэкцян; приґалёв банг, и кэр дова́, со ту кэрдя́н ангил дова́. Ко́ли ту на приґалёса банг, тэды Мэ ява́ва кэ ту и Мэ ла́ва тыро́ момолы́тко (свети́льнико) лэ́скирэ штэто́стыр, пака ту приґалёса банг.

⁶ Екх, лачхипэн со исын дрэ ту́тэ исын, дова́, со ту́кэ древа́н исын на пир ило́ дова́, со Никалаиты кэрэ́на, дова́ и Ма́нгэ адя́кэ-паць древа́н на пир ило́.

⁷ Конэ́стэ исын кана́, мэк ёв тэ шунэ́л дова́, со Ду́хо (Фа́но) пхэнэ́ла кхангирье́нгэ. Одолэ́стэ, кон лэ́ла упралыпэ́н, Мэ да́ва лэ́скэ право тэ хал джиибна́скирэ каштэ́стыр (дрэвостыр), со барьёла дро Дэвлэ́скиро Раё.”

Лыл Кхангирья́кэ дрэ Смирна

⁸ И чхин Янголоскэ Смирнакирэ кхангирья́тыр: “Дава́ ракирэ́ла Пэ́рво и Палатуно́, Кон исын муло́ и Кон отджидыя́:

⁹ Мэ джино́м (джина́в) тырэ́ рэ́нды (де́лы), тыро́ калыпэ́н (ту́га), нэ ту сан барвало́ и Мэ джино́м (джина́в), сыр калякирдэ тут одолэ́, савэ́ ракирэ́на, со ёнэ исын Юды и савэ́ нанэ, а ёнэ исын налачхэскирэ скэдынятыр (скедыибнастыр).

¹⁰ На дар нисостыр, пал со ту́кэ приявэлапэ тэ мэнчынэспэ. Ѓа́да, на́лачхо явэ́ла тэ чхурдэл вари-савэ́н тумэ́ндыр дро штарибэ́н (бэшыбэн); соб (кай) тумэн тэ пропатякирэн и тумэ́ндэ явэ́ла пхарипэ́н дэш дывэса́. Яв патяибны́тко кэ мэрибэ́н, и Мэ да́ва ту́кэ джиибна́скири вя́нка (коро́на).

¹¹ Конэ́стэ исын кана́, мэк ёв тэ шунэ́л дова́, со Ду́хо (Фа́но) пхэнэ́ла кхангирье́нгэ: Одолэ́скэ, кон пиризорьякирэла (збердынэла), яви́р мэрибэ́н на кэрэ́ла биба́хт.”

Лыл Кхангирья́кэ дро Перга́мо

¹² И чхин Янголоскэ Пергамоскирэ кхангирья́тыр: “Дава́ ракирэ́ла Одова́, Конэ́стэ исын востро (чолало́) дуе-ригэнгири курта́ла (мечо):

¹³ Мэ джино́м тыри́ буты́, и, кай ту дживэса, одо́й, кай на́лачхо исын бэшто́ пэ пэ́скиро троно. Ту рикирэсапэ пал Миро лав и ту на отпхэндянпэ пэ́скирэ патяибнастыр дрэ Ма́ндэ аж дрэ долэ́ дывэса́, ке́ли Антипо, миро патяибнаскиро якхи́тко, сыс замардо машки́р тумэ́ндэ одо́й, кай на́лачхо дживэ́ла.

¹⁴ Нэ ма́ндэ исын вари-со проти ту́тэ; ту́тэ исын кадасавэ́ мануша́, савэ́ рикирэнапэ пал Валаамоскиро сыклякирибэ́н, саво́ сыклякирдя́ Валакос тэ чхурдэл бар пэ дром тэ обштавэлпэ анги́л Израилёскирэ чхавэ́ндэ, соб (кай) ёнэ тэ хан свэ́нто дыибэ́н идолэ́нгэ и тэ дживэ́н джувле́нца би сэвлакиро.

¹⁵ И тумэ́ндэ адя́кэ-паць исын мануша́, савэ́ рикирэнапэ пал Никалаитэнгиро сыклякирибэ́н [саво́ мэ бидыкхава-р.с.].

¹⁶ Палдава́ приґалёв пэ́скиро грэ́хо: ко́ли ту на приґалёса, тэды Мэ ява́ва кэ ту сыг, и Мэ ява́ва тэ маравпэ тумэ́нца куртала́са, со выджа́ла Мирэ́ мо́стыр.

¹⁷ Конэ́стэ исын кана́, мэк ёв тэ шунэ́л дова́, со Ду́хо (Фа́но) пхэнэ́ла кхангирье́нгэ. Одолэ́скэ, кон пиризорьякэла, Мэ да́ва вари-кицы́ манка, сави́ исын гарады. Мэ адя́кэ-паць дава́ лэ́скэ парно́ бар, пэ саво́ явэ́ла чхиндло́ нэво́ лав, саво́ нико́н на джинэ́ла, апри́ч кодолэстэ, кон дорэсэ́ла дава́ бар.”

Лыл Кхангирья́кэ дро Фиатира

¹⁸ И чхин Янголоскэ Фиатиракирэ кхангирья́тыр: “Дава́ ракирэ́ла Дэвлэ́скиро Чхаво́, Конэ́стэ якха́ исын сы́рбы ягакири чиб, и Лэ́скирэ ґэра́ исын сы́рбы зяиндлы харко́ма (медь):

¹⁹ Мэ джино́м тыри́ буты́, тыро́ лачхипэ́н кэ яви́р мануша́, и тыро́ патяибэ́н и тыри́ буты́ ваш Дэвлэ́скэ, и тыро́ вырикирибэн. Тыри́ буты́ какана́ исын буты́р кодолятыр, сави́ сыс ґарэдыр (вагэды́р).

²⁰ Нэ Ма́ндэ исын вари-со проти ту́тэ: пал-дова́ со ту домэкэса, со ада́я джувлы́ Езавель, сави́ кхарэ́ла пэс пророчица, сыклякирэ́ла и затырдэла сы́рбы дрэ фэлы́ (петля) мирэ́ писхарье́н тэ дживэ́н джувле́нца би сэвлакиро, и тэ хан свэ́нто дыибэ́н (жэ́ртва) идолэ́нгэ.

²¹ И Мэ дыём ла́кэ часо тэ приґалёл ла́киро биладжаипэ́н, нэ ёй на камэ́ла тэ приґалёл пэ́скирэ грэ́хи.

²² Адя́кэ Мэ чхурдава ла пэ чхуибэ́н, кай ёй кэрдя́ на́гожа рэ́нды явирэ манушэ́нца, соб (кай) ёнэ тэ страдынэн, пака ёнэ приґалёна грэ́хо, саво́ сыс лэ́ндэ ла́са,

²³ и Мэ мулякирава ла́кирэ чхавэ́н, соб (кай) сарэ́ кхангирья тэ джинэ́н, со Мэ сом Одова́, Кон джинэ́ла, со ману́ш думинэ́ла, и со ёв мангэ́ла, Мэ да́ва палэ кажнонэ́скэ тумэ́ндыр пир дова́, сави́ буты́ тумэ́ кэрдэ́.

²⁴ А кадалэ́ манушэ́нгэ тумэ́ндыр дрэ Фиатира, савэ́ на рикирэнапэ пал дава́ сыклякирибэ́н и, савэ́ на джинэ́на хорипэ́н, со кхарэ́лапэ “налачхэскири зор”, Мэ пхэна́ва: Мэ на чхува́ва пэ тумэ́ндэ яви́р пхарипэ́н;

²⁵ а тумэ́ рикирэнпэ пал дова́, со исын тумэ́ндэ, пака мэ ява́ва.

²⁶ Одолэ́скэ, кон пиризорьякирэла и ракхэ́ла дова́, со Мэ кэра́ва кэ ко́нцо (кэ яго́ро), Мэ да́ва лэ́скэ зор пэ Наюдэ́ндэ,

²⁷ и ёв явэ́ла тэ хулаинэ́л пэ лэ́ндэ саструнэ́ дэстэса: ёнэ пхарадёна пэ котэра́ сыр глэяна (глинытка) пирья, и лэ́скири зор пэ лэ́ндэ явэ́ла дасави́-паць, сави́ мэ дорэсцём (долыём) Мирэ́ Дадэ́стыр,

²⁸ и Мэ да́ва лэ́скэ злокоскири чэргэн.

²⁹ Конэ́стэ исын кана́, мэк ёв тэ шунэ́л, со Ду́хо (Фа́но) ракирэ́ла кхангирье́нгэ.”