Sykadyipén 15 - Библия - Пэ Балтитко Романи чиб (Романэс) 2019

Янго́лы и Палатунэ́ (Последня) Франсы (Язвы)

¹ И мэ дыкхцём яви́р бари и дивно ґерты́к (знаме́ниё) пэ болыбэ́н: сыс эфта́ Янго́лы эфта́ (эфтэ) палатунэ́ франсэнца, савэ́нца Дэвлэ́скири холы́ кончындяпэ.

² Тэды мэ дыкхцём вари-со сы́рбы стёклы́тко (балунало́) мо́рё (дэрья́в), саво́ сыс змешындло яга́са. И сыс тэрдэ́ пэ мо́рё (дэрья́в) кодолэ́, савэ́ лынэ́ упралыпэ́н пэ рискирибна́скирэ мурдалэ́стэ, пэ лэ́скири патри́н (о́бразо) и лэ́скирэ-лавэскиро чысло (гин). Ёнэ рикирдэ Дэвлэ́скирэ гусли.

³ И ёнэ баганас Мойзаскири гилы́, Дэвлэ́скирэ писхарискири, и Свэнтонэ́ Бакрорэскири гилы́, пхэни́: “Савэ барэ́ и ди́вна тырэ́ бутя́, Раё Дэ́вла, Сарэзорья́киро! Тырэ́ дрома́ исын чачунэ́ и чачипнаскирэ, Кра́ли манушэ́нгиро!

⁴ Кон исын одова́, саво на дарэ́ла Ту́тыр, Раё Дэ́вла, И кон на славинэла Тыро́ Лав? Пал-дова́ со Ту сан Екх Свэ́нто, пал-дова́ со сарэ́ мануша́ явэ́на, и ёнэ поклонинэнапэ патыва́са анги́л Ту́тэ пал-дова́, со Ту чачунэ́с приджинэса манушэ́н анги́л бангипэн!”

⁵ И пало́ (после) саро́ дава́ мэ дыкхцём Свэ́нто Ша́тра, дрэ Сави́ псирадяпэ Кхангири́.

⁶ И выгинэ́ эфта́ Янго́лы далэ́ Кхангирья́тыр, савэ́ндэ сыс эфта́ фра́нсы, и савэ́ сыс уридэ́ дрэ жужэ́, парнэ́, похтанытка урибэна́ и ёнэ сыс пирипхандлэ кэ колы́н сувнакунэ́ кустыкэнца.

⁷ И екх штарэ́ джидалэндыр (жывотнонэндыр) дыя́ эфта́ Янголэнгэ эфта́ сувнакунэ́ кучика, со сыс пхэрдэ́ Дэвлэ́скирэ холя́са, со явэ́ла тэ дживэ́л пэ сарэ́ ве́ки.

⁸ И Кхангири́ яця́ пхэрды́ тхувэса Дэвлэ́скирэ славатыр и зоралыпнастыр и никонэ́скэ сыс нашты́ тэ заджа́л дрэ Кхангири́, пака кончынэнапэ эфта́ фра́нсы Янголэ́нгирэ.