Sykadyipén 14 - Библия - Пэ Балтитко Романи чиб (Романэс) 2019

Свэ́нто Бакроро́ и Лэ́скирэ Мануша́

¹ И мэ дыкхцём и, акэ, Свэ́нто Бакроро́ исын тэрдо́ пэ бэ́рга Сио́но, и сыс Лэ́са шэл тэ штардэша́ штар тысёнцы манушэ́н, савэ́ндэ Лэ́скиро лав и Лэ́скирэ-Дадэ́скиро лав сыс чхиндлэ́ пэ чэкат.

² И мэ шундём зан болыбна́стыр, сыр бутэ́-пане́нгирэ шоля́ и сыр баро́ громо. И мэ шундём, сыр башаибнаскирэ башавэнас пэ пэ́скирэ гусли.

³ И ёнэ баганас нэви́ гилы́ анги́л троно и анги́л штарэ́ джидалэндэ (жывотнонэндэ) анги́л годэпхурэндэ. И нико́н на могиндя́ тэ сыклёл дая́ гилы́ апри́ч кадалэ́ шэл тэ штардэша́-штар-шэла́ тысёнцы манушэ́ндэ, савэ́н Христо́со выкиндя сарэ́ манушэ́ндыр пэ пхув.

⁴ Дава́ исын мануша́, савэ́ на магирдэ́ пэс джувле́нца; ёнэ сыс на́романдунэ мурша́. Ёнэ джа́нас пала́л пал Свэнтонэ́ Бакрорэ́стэ, карик на джа́лас Ёв. Ёнэ сыс выкиндлэ машки́р манушэ́ндэ, и ёнэ исын пэ́рва мануша́ пхувья́тыр ваш Дэвлэ́скэ и Свэнтонэ́ Бакрорэскэ.

⁵ И на сыс латхно хохаибэ́н дро лэ́нгиро муй, ёнэ сыс бидоша́кирэ.

Трин Янго́лы

⁶ И мэ дыкхцём явирэ Янголо́с, саво́ вурнялас вучэ́с дро фа́но (воздухо), машкира́л болыбэ́н, конэ́стэ сыс ве́чно Ева́нгелия, соб (кай) тэ миштопхэнэл одолэ́нгэ, савэ́ дживэ́нас пэ пхув, кажнонэ́ кхэритконэ́ родо́скэ и родыцо́скэ и екхэ́-чиба́кирэ ирья́кэ/сэм΄я́кэ (чибакэ/ чибьякэ) и кажнонэ́-манушытконэ́ нацыя́кэ.

⁷ Ёв пхэндя́ зоралэ́ заня́са: “Дарэ́н Дэвлэ́стыр, выпхэнэн сла́ва Лэ́скэ! Лэ́скиро мардо́ (шту́нда) тэ сэндякирэ́л явдя́. Поклонинэнпэ патыва́са Одолэ́скэ, Кон создыя́ болыбэ́н и пхув, и мо́рё (дэрья́в) и пане́нгирэ ґанынгорья́.”

⁸ И яви́р Янго́ло, саво́ джа́лас пала́л пал Пэрвонэстэ, пхэндя́: “Пыя́ тэлэ́, бари Вавилония, пыя́ тэлэ́! Ёй панякирдя сарэ́ на́цыи пэ́скирэ-камибна́скирэ моля́са (виноса) тэ кэрэ́н зоралэ́с биладжаипэ́н.”

⁹ И три́то Янго́ло, саво́ джа́лас пала́л пал лэ́ндэ, пхэндя́ зоралэ́ заня́са: “Кон клонинэлапэ патыва́са рискирибна́скирэ мурдалэ́скэ и лэ́скирэ патриня́кэ (образо́скэ), и прилэ́ла шпэ́ра пэ пэ́скиро чэкат ци васт,

¹⁰ кодова́ явэ́ла тэ пьел Дэвлэ́скирэ-холякири мол, со исын нарозлыджими пане́са дрэ кучик Лэ́скирэ зорьякири! Кон создыя́ дава́, явэ́ла тэ мэнчынэлапэ дрэ яг и дрэ се́ра (дзэвэ́ля) анги́л свэнтонэ́ Янголэндэ и анги́л Свэнтонэ́ Бакрорэстэ.

¹¹ Тхув (дымо) лэ́нгирэ мэнькатыр ґаздэ́лапэ пэ сарэ́ ве́ки. На явэ́ла ни дывэ́с, ни рат тэ откхинён одолэ́нгэ, савэ́ клонинэнапэ патыва́са анги́л рискирибна́скирэ мурдалэ́стэ ци анги́л лэ́скири патри́н (о́бразо), и кажнонэ́скэ (сваконэскэ), кон прилыя́ шпэ́ра лэ́скирэ лавэ́са.

¹² Ѓа́да, трэй вырикирибэн свэнтонэнгэ, савэ́ приракхэна Дэвлэ́скирэ припхэныбэна́ и патяибэ́н дрэ Исусо́стэ.

¹³ И мэ шундём зан болыбна́стыр, сави́ пхэндя́: “Зачхин: ‘Бахталэ́ исын одолэ́, савэ́ мэрэ́на дро екхипэ́н Дэвлэ́са ададывэсэстыр!’” “Чачо́”, – ракирэ́ла Ду́хо. “Ёнэ дэ́на ра́да тэ откинён пхарэ́ бутя́тыр и лэ́нгирэ рэ́нды джа́на пала́л!”

Апло́до пэ Пхув

¹⁴ И мэ дыкхцём, акэ, парно́ о́блоко, и вари-кон сыс бэшто́ сы́рбы Чхаво́ Манушэ́скиро. Пэ Лэ́скиро шэро́ сыс сувнакуны́ вя́нка (коро́на) и дро Лэ́скиро васт сыс востро (чолало́) серпо (чхиндло́).

¹⁵ И яви́р Янго́ло выгия́ Кхангирья́тыр и дыя́ го́дла зоралэ́ заня́са одолэ́скэ, кон сыс бэшто́ пэ о́блоко: “Бичха́в пэскро востро (чолало́) серпо и чхин, пал-дова́ со мардо́ (шту́нда) тэ счхинэс, явдя́, гива́ пэ пхув исын спяла.”

¹⁶ И Одова́, Кон сыс бэшто́ пэ о́блоко, чхиндя́ чхурдыпнаса пир пхув и аплодо пэ пхув сыс счхиндло.

¹⁷ И яви́р Янго́ло выгия́ Кхангирья́тыр дро Болыбна́скиро Раё, савэ́стэ сыс адя́кэ-паць востро (чолало́) серпо.

¹⁸ И яви́р Янго́ло выгия́ алтарёстыр, савэ́стэ сыс зор пэ яг, и, саво́ ракирдя́ зоралэ́ заня́са одолэ́ Янголоскэ, конэ́стэ сыс востро (чолало́) серпо, и пхэндя́: “Бичха́в пэскро востро (чолало́) серпо и скэ́дэ винаградоскирэ рандя́ пэ пхув, пал-дова́ со винаграды́тка му́ри ячнэ́ спяла.”

¹⁹ И Янго́ло ухтылдя пэскро серпо и скэдыя́ винаградо (дракх) пэ пхув и чхурдыя́ тэл баро́ пресо Дэвлэ́скирэ холя́тыр:

²⁰ и сыс штакирдэ (стопчындлэ) му́ри дро пресо, пало́ фо́ро, и рат тхадыя пресостыр кэ грэ́нгирэ шварья́ ручаёса пэ трин шэла́ километры (вэрсты) длэнгипна́са и пашы́л дуй шэла́ мэтры дро хорипэ́н.