Sykadyipén 12 - Библия - Пэ Балтитко Романи чиб (Романэс) 2019

Джувлы́ и Драко́но

¹ И сыс дыцьлы/бицялы древа́н бари ґерты́к (знаме́ниё) пэ болыбэ́н: сыс джувлы́ сы́рбы уриды дро кхам и чхон сыс тэл ла́кирэ ґэра́, и вя́нка (коро́на), сави́ сыс чхуды́ кхэтанэ́ дэшудуе́ чэргэнендыр, сыс пэ ла́киро шэро́.

² Адая джувлы́ сыс пхари́: ёй дэ́лас го́дла дукхэндыр и ёй мэнчындяпэ сыр джувлы́, сави́ биянэ́ла.

³ И сыс яви́р ґерты́к дыцьлы/бицялы пэ болыбэ́н: и, акэ, баро́ лоло́ драконо эфта́ (эфтанэ) шэрэнца и дэшэнца шынгэнца и пэ далэ́ шэрэ́ сыс эфта́ диадэмы;

⁴ и лэ́скири пори тырдэла три́то паш болыбна́скирэ чэргэнендыр и ёв чхурдыя́ тэлэ́ лэн пэ пхув. И драконо тэрдия́ анги́л джювлятэ, савьякэ трэиндя́ тэ биянэ́л, соб (кай), сыр ёй биянэ́ла, ёв могиндя́ тэ хал тыкнорэ́с.

⁵ И ёй бияндя́ муршорэс, саво́ явэ́ла тэ хулаинэ́л пэ сарэ́ манушы́тка ро́ды саструнэ́ дэстэса. А ла́киро тыкноро сыс чхудо ваш Дэвлэ́скэ и Лэ́скиро троно.

⁶ Джувлы́ насця пэ чхучи́ пхув пэ штэ́то, саво́ Дэвэ́л приготовиндя ла́кэ, соб (кай) ёнэ тэ чалякирэн ла екх бар и дуйшэла́ шовдэша́ дывэса́.

⁷ И кэрдя́пэ марибэ́н дро Болыбна́скиро Раё. Михаило и лэ́скирэ Янго́лы мардэ́пэ драконоса. А драконо и лэ́скирэ Янго́лы мардэ́пэ палэ и лэ́нца:

⁸ и ёнэ на пиримардэ, и на латхяпэ аж штэ́то ваш лэ́нгэ дро Болыбна́скиро Раё.

⁹ И баро́ драконо сыс чхурдыно́ тэлэ́, пхурано́ сап, савэ́с кхарэ́на на́лачхо ци бэнг, саво́ хохавэлас саро́ свэ́то. Ёв сыс чхурдыно́ тэлэ́ пэ пхув и лэ́скирэ Янго́лы сыс чхурдынэ́ тэлэ́.

¹⁰ И мэ шундём зоралы́ зан болыбна́стыр, со ракирдя́: “Какана́ явдя́ зракхибэ́н и зор и Кралипэ́н Дэвлэ́стыр Дадэ́стыр. Какана́ исын Лэ́скирэ-Христососкири зор, пал-дова́ со бангякирибнаскиро пэ амарэ́ пшалэ́ндэ, саво́ бангякирэлас лэн анги́л Дэвлэ́стэ дывэсэ́ и раты́, сыс чхурдыно́ тэлэ́.

¹¹ И амарэ́ пша́ла лынэ́ упралыпэ́н пэ лэ́стэ свэнтонэ́ Бакрорэ́скирэ ратэ́са и лавэ́са лэ́нгирэ допхэныбнэндыр и ёнэ на дэ́нас чол (цэниндлэ) пэ́скиро джиибэ́н буты́р мэрибна́стыр.

¹² Палдава́ ра́дынпэ, Болыбна́скиро Раё! Радынэ́нпэ одолэ́, кон дживэ́ла одо́й! Нэ би́да пэ пхув и пэ мо́рё (дэрья́в), пал-дова́ со на́лачхо гия́ тэлэ́ даранэ холя́са, джининдой, со яця́пэ лэ́скэ на́бут часо.

¹³ И ке́ли драконо дыкхця́, со лэс чхурдынэ́ тэлэ́ пэ пхув, тэды ёв лыя́ тэ традэл джувля́, сави́ бияндя́ муршорэс.

¹⁴ И ла́кэ сыс дынэ́ барэ́-орло́скирэ (кидо́скирэ) дуй пхака́ (крылы), соб (кай) ёй тэ вурнял пэ чхучи́ пхув пэ пэ́скиро штэ́то, кай ла чаравэнас трин пашэ́са бэрш криг сапэстыр.

¹⁵ И мэкця́ сап мо́стыр пани́ сыр рэка (лэнь), соб (кай) рэкакири (лэнякири) пани́ тэ лыджа́л криг ла.

¹⁶ Нэ пхув помогиндя джувля́кэ и псирадя (отпхандя) пхув пэ́скиро андрыпэн сы́рбы муй и затырдыя рэкакиро (лэнякиро) пани́, саво́ драконо мэкця́ мо́стыр.

¹⁷ А драконо зоралэ́с холя́сыя пэ джувля́тэ и гия́ пэ марибэ́н явирэ ла́кирэ биятэнца, савэ́ ячнэ́пэ ла́кирэ родо́стыр, кон приракхэлас Дэвлэ́скирэ припхэныбэна́ и рикирэлас Христосо́скирэ лава́.