Sykadyipén 11 - Библия - Пэ Балтитко Романи чиб (Романэс) 2019

Дуй Якхи́тка (Свиде́тели)

¹ И сыс дыно́ ма́нгэ тришчынитко кашт (трость) сыр дэсто́ тэ меринав, и сыс пхэндло́: “Ушты́ и вымерин Дэвлэ́скири Кхангири́ и алта́рё и одолэ́н манушэ́н, савэ́ клонинэнапэ патыва́са одо́й.

² А грэ́да (дво́ро), сави́ исын яврестыр пал Кхангири́, мэк ла и на мерин ла. Ёй сыс дыны́ Наюдэ́нгэ. Ёнэ явэ́на тэ штакирэн ґэрэ́нца Свэ́нто Фо́ро штардэша́ дуй чхона́.

³ И мэ да́ва зор мирэ́ дуе Якхитконэнгэ и ёнэ явэ́на тэ ангилпхэнэн тысёнцо дуй шэла́ шовдэша́ дывэса́, савэ́ явэ́на уридэ́ дрэ гонэ́ балэндыр.”

⁴ Далэ́ дуй Якхи́тка исын оливитка кашта́ и дуй момолытка (светильники), савэ́ исын тэрдэ́ анги́л Дэвлэ́стэ пир пхув.

⁵ И ко́ли вари-кон выкэдэ́ла тэ кэрэ́л чорипэ́н лэ́нгэ, тэды яг выджа́ла лэ́нгирэ мо́стыр и хасякирэ́ла лэ́нгирэ вэргэ́н. И ко́ли вари-кон закамэ́ла тэ кэрэ́л чорипэ́н лэ́нгэ, тэды адя́кэ-паць одолэ́скэ трэй тэ мэрэ́л.

⁶ Адалэ́ Якхитконэндэ исын зор тэ пхандэн болыбэ́н, соб (кай) тэ на джал брышы́нд, ке́ли ёнэ явэ́на тэ ангилпхэнэн (тэ пророчынэн). И ёнэ рикирэ́на зор, соб (кай) паня́ тэ пирикэрэнпэ дро рат и тэ мулякирэ́н лэн франсэнца ада́кицы бут мо́лы, кицы́ ёнэ выкэдэна.

⁷ И ке́ли ёнэ кончындлэ пэ́скиро допхэныбэ́н, тэды драконо, саво́ выджа́ла люностыр, явэ́ла тэ марэ́лпэ лэ́нца, и лэ́ла упралыпэ́н пэ лэ́ндэ и мулякирэ́ла лэн.

⁸ И явэ́на лэ́нгирэ тру́пы пэ барэ́-форо́скирэ вули́цы (га́сы). Дава́ фо́ро пир ду́хо (фа́но) явэ́ла тэ кхарэлпэ Содо́мо и Еги́пто, кай адя́кэ-паць амаро́ Рай Дэвэ́л сыс примардо пэ трушу́л.

⁹ И мануша́ манушытконэ́ нацые́ндыр, екхэ-чибакирэ ирье́ндыр (сэм΄е́ндыр), кхэритконэ́ родэндыр и явирэ манушэ́ндыр явэ́на тэ дыкхэ́н пэ дуй далэ́ тру́пы трин пашэ́са дывэса́ и на домэкэна тэ заганавэн лэн дрэ пхув.

¹⁰ И одолэ́, савэ́ явэ́на тэ дживэ́н пэ пхув, явэ́на тэ радынэ́нпэ лэ́нгирэ мэрибна́стыр. Ёнэ явэ́на тэ радынэппэ зоралэ́с и тэ бичхавэн да́ры екх екхэ́скэ, пал-дова́ со кодолэ́ дуй проро́ки древа́н мэнчындлэ манушэ́н.

¹¹ И пало́ трин пашэ́са дывэса́ джиибна́скиро ду́хо (фа́но) Дэвлэ́стыр загия́ дрэ лэ́ндэ. Ёнэ тэрдинэ́ пэ пэ́скирэ ґэра́ и бари дар пыя́ пэ одолэ́ндэ, савэ́ дыкхнэ́ пэ лэ́ндэ.

¹² И ёнэ шундлэ́ зоралы́ зан болыбна́стыр, со ракирдя́ лэ́нгэ: “Джа́н упрэ́ адари́к.” И адалэ́ дуй проро́ки гинэ́ упрэ́ пэ болыбэ́н дро о́блоко, и лэ́нгирэ вэ́рги дыкхнэ́ пэ лэ́ндэ.

¹³ И дро дова-паць мардо́ (шту́нда) кэрдя́пэ древа́н баро́ пхувья́киро тринскирибэн и дэ́што форо́скири паш пыя́, и эфта́ тысёнцы манушэ́н сыс замардэ́. И одолэ́, савэ́ ячнэ́пэ, страха́дынэ и славиндлэ Дэвлэ́с, Саво́ исын дро Болыбна́скиро Раё.

¹⁴ Яви́р би́да гия́ криг: дыкх, три́то би́да джа́ла сы́гэс.

Эфта́то Ро́го (Тру́ба)

¹⁵ И эфта́то (битринэнтиро дэ́што) Янго́ло пхурдыя дрэ пэ́скиро ро́го (труба): и сыс зоралэ́ заня́ пэ болыбэ́н, со ракирдэ́: “Свэтытко Кралипэ́н амарэ́ Ра́скирэ-Дэвлэ́скиро и Лэ́скирэ Христосо́скиро явдя́ и Ёв явэ́ла тэ кралинэн пэ сарэ́ ве́ки.”

¹⁶ И биш тэ штар годэпхурэ́, савэ́ сыс бэштэ́ пал пэ́скирэ троны анги́л Дэвлэ́стэ пынэ́ пэ пэ́скирэ муя́ и поклониндлэпэ патыва́са Дэвлэ́скэ, пхэни́:

¹⁷ “Амэ парикираса Ту́кэ, Баро́ Раё Дэ́вла, Сарэзорья́киро, Екх, Кон исын и Кон сыс, пал-дова́ со Ту лыян Тыро́ зоралыпэ́н и яця́н тэ кралинэс.

¹⁸ На́юды холясынэ долэ́скэ, со явдя́ Тыри́ холы́ дро часо тэ сэндякирэс мулэн, и тэ отдэс палэ Пэ́скирэ писхарье́нгэ, пророкэнгэ, и свэнтонэнгэ и одолэ́нгэ, савэ́ дарэ́на Тырэ́ лавэ́стыр, барэнгэ и тыкнэнгэ. Тэ мулякирэс одолэ́н, савэ́ хасякирэна пхув.”

¹⁹ И псирадыя (отпхандя́пэ) Дэвлэ́скири Кхангири́, сави́ исын дро Болыбна́скиро Раё и Ковчэ́го (Мохто́) Дэвлэ́скирэ завето́са сыс дыцьло дрэ Кхангири́. И ячнэ́ блискави́цы, и заня́ (глося́), и гро́мы, и пхувья́киро триинскирибэн и баро́ ґра́до.