Гиленгири (Соломоно́скири) Гилы́ 8 - Библия - Пэ Балтитко Романи чиб (Романэс) 2019

¹ О, соб (кай) ту тэ явэс мирэ́ пшалэса, конэ́скэ мири́ дай тэ дэл колы́н тэ пьел! Ко́ли мэ латхавас тут пэ вули́ца (пэ га́са), то мэ чамудавас тут, и нико́н на дыкхэ́лас пэ ма́ндэ вучипна́са.

² Мэ лыджавас тут, и мэ янавас тут дро кхэр мирэ́-да́киро. Ту сыклякирэсас ман, а мэ панякиравас тут соко́са (хумэ́са) гранатытконэ пхабэндыр.

³ Лэ́скиро зэ́рво (ле́во) васт исын тэл миро шэро́, а чачо́ (право) васт облэла ман.

⁴ Мэ засовлахава тумэн, чхая́лэ Ерусалимо́скирэ, на джангавэн и на пхарьякирэн ило́ пирамня́кэ (камлякэ), пака ёй джангадёла кокори.

Шо́вто Гилы́ Нэвякирдо Илытко Паты́в дро Левано

⁵ Кон дава́ джа́ла упрэ́ чхучэ́ пхувья́тыр, и кон дава́ пририкирэлапэ пал пэ́скирэ пирамнэстэ? Мэ джангадыём тут тэл пхабэлин. Одо́й тыри́ дай бияндя́ тут. Одо́й тыри́ родно дай бияндя́ тут.

⁶ Причху́в ман пэ тыро́ ило́ сыр чэргэнори́, сыр ангрусты пэ тыро́ васт, пал-дова́ со пирамнипэ́н (камлыпэн) исын зорало́ сыр мэрибэ́н: пирамнипэ́н зэвлынэла сыр маґила (кула); ла́кирэ марибны́тка бустя́ (стре́лы) исын сыр ягитка бустя́, сыр яг, сави́ на мурдёла.

⁷ Барэ́ паня́ нашты́ тэ мурдякирэл пирамнипэ́н, и рэ́ки (лэня́) на зачхувэна лэс. Ко́ли тэ дэл о ману́ш саро́ пэ́скиро барвалыпэ́н пал пирамнипэ́н, то дава́ прилэнас бы ёв бангэ́ илэ́са.

⁸ Амэ́ндэ исын пхэн, и ла́тэ нанэ колынорэ; со амэ́нгэ тэ кэра́с амарэ́ пхэняса, сыр явэ́на тэ сватынэн ла?

⁹ Ко́ли ёй тэ явэ́л вантаса (сцянаса), то амэ кэрасас коморы (харомы) рупувэ́; ко́ли тэ явэ́л ёй вударэса, то амэ обсываса лэс кедрытконэ пхаленца.

¹⁰ Мэ сом ва́нта, и мирэ́ цюця исын сы́рбы вучардя (башни); пал-дава́ мэ ява́ва дрэ лэ́скирэ якха́ сыр дасави́, кон латхя́ рама́нё (миро).

¹¹ Соломоностэ сыс винаграды́тко у́нта (садо) дро Ваал-Гамоно: ёй отдыя́ дая́ у́нта ракхибнарьенгэ; кажно исын банго́ тэ янэл пал далэ́ барьякирдэ́ (пло́ды) бар рупувэ́ ловэ́.

¹² Нэ мири́ винаграды́тко у́нта исын пашы́л ма́ндэ. Ту́кэ, о Соломо́нэ, мэк тэ явэ́л бар (тысёнцо), а дуй шэла́ одолэ́нгэ, савэ́ ракхэна барьякирдэ́ (пло́ды).

¹³ Ту, кон дживэ́ла дрэ у́нта! Тырэ́ мала́ кандэ́на тыри́ зан (глос), мэк и ман тэ шунав тыри́ зан.

¹⁴ Наш, пирамнэ ми́ро; яв сыр мирга (серна) ци яв сыр тэрно́ шынгуно́ (оленё) пэ бэ́рги бальзамитка!