Гиленгири (Соломоно́скири) Гилы́ 6 - Библия - Пэ Балтитко Романи чиб (Романэс) 2019

Ерусалимо́скирэ Чхая́ Ракирэ́на

¹ Карик да гия́ тыро́ пирамно́, ту, кон сан най шукарэдыр машки́р джувлендэ? Дрэ сави́ риг рисия́ тыро́ пирамно́, соб (кай) амэ тэ родас Лэс ту́са?

Ранякирэ-Джувлякири Зан

² Миро пирамно́ гия́ тэлэ́ дрэ пэ́скири у́нта, кэ бэтки [цветники-р.с.] приправэнца, тэ чалякирэлпэ дрэ унты (сады) и тэ кэдэл лилии.

³ Мэ сом екх мирэ́ пирамнэ́скири, и миро пирамно́ исын екх миро: ёв чаравэла пэ́скири стада машки́р лилии.

Па́нджто Гилы́ Соломоно́скири Зан

⁴ Ту сан шука́р сыр Тарза (Фирца), ту сан гожо-шука́р сыр Ерусалимо, ту сан трашаны сыр халадыбэна (полки) сцягэнца!

⁵ Ри́скир криг пэ́скирэ якха́ ма́ндыр, пал-дова́ со ёнэ лэ́на упралыпэ́н пэ ма́ндэ, тырэ́ бала́ исын сыр бузнорэнгири (козэнгири) ста́ды, савэ́ джана тэлэ́ Галаадо́скирэ навучэ бэргицатыр.

⁶ Тырэ́ дандорэ исын сыр бакрорэнгири стада, сави́ акана́ явдя́ морибнастыр, кажно лэ́ндыр биянэ́ла близнятэн, и ние́кх лэ́ндыр исын на ялово.

⁷ Тырэ́ чхаморэ исын сыр пашорья (котэрорэ) гранатытконэ пхабэндыр, со исын тэл длэнго дыкхло.

⁸ Исын шовдэша́ кралицы, и охтодэша́ бисовлахакирэ джувля́, и исын бут патывалэ́ чхая́, со нашты́ тэ гинэс:

⁹ нэ ту, ми́ри голу́мбица, сан мири́ екхори, мири́ най фэдэды́р, ту сан екхори пэ́скирэ датэ, тыри́ дай, кон бияндя́ тут, отдэ́ла ило́ буты́р ту́кэ. Сарэ́ патывалэ́ джувля́ дыкхнэ́ ла, и ёнэ кхардэ́ тут бахталяса.

¹⁰ Кон жа исын ёй, сави́ зяинэла сыр зло́ко (ра́нко), сави́ исын шукарни сыр чхон, ясно сыр кхам, исын трашаны сыр халадыбэна сцягэнца?

Ранякирэ-Джувлякири Зан

¹¹ Мэ гиём тэлэ́ дрэ пэґэнгэ́нгири у́нта (садо), тэ дыкха́в чарья́ пир до́ло, тэ дыкха́в, ци розмэкцяпэ винаградо (дракх), ци гранатытка пхабэлыня лулудинэ.

¹² Анги́л дава́, сыр мэ ґалыём, миро ди чхудя́ ман дрэ барэ́-рангирэ марибны́тка вурдэна́ мирэ́ народо́стыр.

Ерусалимо́скирэ Чхая́

¹³ Рисёв, рисёв, Сулами́те, рисё́в, рисё́в, соб (кай) амэ могинасас тэ дыкхас пэ ту́тэ.

Ранякирэ – Джувлякири Зан

¹⁴ [7.1-р.с.] Со́скэ тумэ́нгэ исын пир ило́ тэ дыкхэ́н пэ ма́ндэ, сыр пэ дуя́-рядэ́нгиро (Манаимоскирэ/халадытко) кхэлыбэн.