Гиленгири (Соломоно́скири) Гилы́ 4 - Библия - Пэ Балтитко Романи чиб (Романэс) 2019

Соломоно́скири Зан

¹ О, сави́ шукарни ту сан, мири́ пирамни́е, о сави́ шукарни ту сан; сыр голумбицатэ тырэ́ якха́ дыкхэ́на тэл крэнцо чхур (коса); тырэ́ бала́ исын сы́рбы бузнэнгири стада, сави́ джа́ла тэлэ́ бэрга́тыр Галаадоскирьятыр.

² Тырэ́ данда́ исын дасавэ́ парнэ́ сыр обчхиндлэ́ бакря́, савэ́ зяинэна, и савэ́ явнэ́ морибнастыр, кажно лэ́ндыр янэ́ла пир дуй близнятки (дуёрэ), и ние́кх нанэ ялово (накхабны́) машки́р лэ́ндэ.

³ Тырэ́ ушта́ исын сыр ярко лоло́ тхаворо, и тыро́ муй исын дасаво шука́р. А тырэ́ чхама́ (шчоки), со исын тэл крэнцо чхур, исын сыр кускицы гранатытконэ пхабэндыр.

⁴ Тыри́ мэн исын сыр Давидо́скиро сты́лбо, со кэрдо́ тэ чхувэ́н састыра́ марибны́тка: одо́й убладэ бар саструнэ́ шчы́ты, сыр исын зоралыпнаскирэ-муршэскирэ шчы́ты.

⁵ Тырэ́ колына исын сы́рбы дуй тыкнорэ-близнятки датэ-газэлятэ, сави́ чаравэла лэн машки́р лилии.

⁶ Анги́л дова́, сыр явэ́ла дывэсэскиро ра́нко, и сыр зэрья (тени) нашэ́на криг, мэ джа́ва пэ́скэ пэ мирроскири бэ́рга, и пэ гудлэ́-смола́кири (фимиамоскири) бэ́ргица.

⁷ Сави́ шукарни ту сан, мири́ пирамни́е, и нисави́ дош нанэ дрэ ту́тэ.

⁸ Яв ма́нца Ливаностыр, мири́ тэрны́, яв ма́нца Ливаностыр; яв сыгэды́р тэлэ́ Аманоскирэ вучипна́стыр, Сенироскирэ и Ермоноскирэ вучэ́ штэтэ́ндыр, яв хашчэ́ндыр/вэнтэ́ндыр (логовэ́ндыр), кай шчэра́ (левы) дживэ́на, бэргэндыр, кай исын леопарды.

⁹ Ту задивакирдян миро ило́, мири́ пхэн, мири́ тэрны́; ту задивакирдян миро ило́ дыкхибнаса тырэ́ якхэ́ндыр, екхэ зандирорьяса тырэ́ мириклендыр.

¹⁰ Сыр шука́р тыри́ ла́ска исын, мири́ пхэн, мири́ тэрны́! И пэ кицы́ фэды́р лачхэ́-сунгакиро кхандыпэн сарэ́ ароматытконэ макхибнэндыр.

¹¹ Тырэ́ уштэндыр, мири́ тэрны́, тхадэ́ла жужо́ авги́н, авги́н и тхуд исын тэл тыри́ чиб; и лачхи́ сунг тырэ́ идендыр исын сы́рбы лачхи́ сунг Ливаностыр.

¹² Мири́ пхэн, мири́ тэрны́, исын сы́рбы запхандлы у́нта (садо), сы́рбы питомнико, со исын пэ клыдын, сы́рбы ґаны́нг, со исын пэ чэргэнори́ (печать).

¹³ Ёнэ барьёна сыр лулудя́ дрэ раитко у́нта, кай исын гранатытка пхабэлыня выкэдынэ́ пхабэнца и лачхэ́-сунгакирэ хнаса и нардоскирэ рандёрьяса.

¹⁴ Одо́й исын нардо и шафрано, аеро и карица, и сарэ́ хру́сты гудлэ́ смоласа, мирро и алоэ, сарэ́ рангирэ ароматытконэ макхибнэнца.

¹⁵ Фонтано (фолаха́р), дрэ у́нта джидэ́-панескири ґаны́нг, и сыгна рэкицы Ливаностыр.”

Ранякирэ-Джувлякири Зан

¹⁶ “Джангадёв, паш-ратякири балва́л, и яв, паш-дывэсы́тко балва́л! Пху́рдэ пэ мири́ у́нта, соб (кай) тэ розджанпэ ла́кирэ ароматы́тка сунга́. Мэк тэ явэ́л миро пирамно́ дрэ лэ́скири у́нта (садо) и мэк ёв тэ хал гудлэ́ пхаба́ лэ́скирэ.”