Гиленгири (Соломоно́скири) Гилы́ 2 - Библия - Пэ Балтитко Романи чиб (Романэс) 2019

¹ Мэ сом Шароноскиро нарцысо, мэ сом лилия машки́р долы.

Соломоно́скири Зан

² Сыр лилия исын машки́р пхусады́тка хру́сты, адя́кэ-паць исын мири́ пирамни машки́р патывалэ́ тэрнэ́ джувлендэ.

Ранякирэ-Джувлякири Зан

³ Сыр пхабэлын, сави́ исын машки́р вэшытка кашта́ (дрэвы), адя́кэ-паць исын миро пирамно́ машки́р тэрнэндэ. Ма́нгэ исын пир ило́ тэ бэшав дрэ ла́кири зэр (тень), и ла́кирэ барьякирдэ́ (пло́ды) исын гудлэ́ ваш миро муй.

⁴ Ёв яндя́ ман дро кхэр, саво́ сыс пхэрдо́ моля́са (виноса), ёв сы́рбы чхудя́ сцяго, со лэ́скэ дро́го сом мэ.

⁵ Подрикэ́р ман тэ на пэрав моля́са (вино́са), нэвякирэ́н ман пхабэ́нца, пал-дова́ со мэ на́бут со на мэра́ва пирамнипна́стыр (камлыпнастыр).

⁶ Лэ́скиро зэ́рво (ле́во) васт исын тэл миро шэро́, и лэ́скиро чачо́ (право) васт облэла ман.

⁷ Мэ засовлахава тумэн, Ерусалимо́скирэ чхая́лэ, газэленца ци фэлдакирэ миргэ́нца (сернэнца), соб (кай) тумэ́ тэ на джангавэн, тэ на ґаздэ́н рат анги́л дова́, сыр явэ́ла лачхо́ лэ́скэ.

Яви́р Гилы́ Ранякирэ-Джувлякири Зан

⁸ Акэ, мирэ́ пирамнэ́скири зан. Ѓа́да, ёв джа́ла? Ёв пириухтэла пир бэ́рги? Ёв ухтэла пир бэ́ргицы.

⁹ Миро дру́го (мал) исын сыр газэль, ци сыр тэрно́ шынгуно (оленё). Акэ, ёв исын тэрдо́ пал ва́нта, Ёв дыкхэ́ла пирда́л фэштры, Ёв продыкхэла пирда́л саструнэ́ ратни́цы (ставни).

¹⁰ Миро пирамно́ лыя́ тэ ракирэ́л и пхэндя́ ма́нгэ: “Ушты́, мири́ пирамни́е, мири́ шукарни, и яв яври́.

Соломоно́скири Зан

¹¹ Дыкх жа! Ивант (зима) прогия́ (накхтия), брышы́нд пирияця́ и нанэ буты́р:

¹² лулудя́ сыкадёна пэ пхув, и чирикля́ лынэ́ тэ бага́н, ла́киро багипэн шунэ́ла амари́ пхув.

¹³ Инжыритконэ-каштэнгирэ зэлэна пхаба́ лолёна, и винаграды́тко кашторо лулудёла и дэ́ла лачхэ́-сунгакиро кхандыпэн. Ушты́, мири́ пирамни́е, мири́ шукарни, и яв кэ мэ.

¹⁴ Мири́ голумбица исын дрэ скалэнгирэ нишы, дрэ гарадэ́ штэ́ты пир са́мо крутыма, ма́нгэ тэ дыкха́в тыро́ муй, ма́нгэ тэ шунав тыри́ занори, пал-дова́ со тыри́ зан (глос) исын гудлы, тыро́ муёро исын шука́р.”

¹⁵ Ухтылэ́н локхнен (лисицэн), тыкнэ́ локхнорьен, савэ́ хасякирэна винаграды́тко бар; пал-дова́ со амарэ́ винаграды́тка барья лулудёна.

Ранякирэ-Джувлякири Зан

¹⁶ Миро пирамно́ исын миро, и мэ сом лэ́скири. Ёв чаравэла (лэ́скирэ-бакрэнгири стада) машки́р лилии,

¹⁷ Анги́л, сыр дывесёла, и зэрья́ (тени) нашэ́на, рисёв, миро пира́мне: яв сыр газэль, ци сыр тэрно́ шынгуно машки́р бэ́рги.