Сэндарьенгири Лылвари́ 5 - Библия - Пэ Балтитко Романи чиб (Романэс) 2019

Деворакири Гилы́

¹ Дро дова́ дывэ́с забагандлэ Девора и Варако, Авиноамоскирэ чхавэ́са, дасавэ́ лавэ́нца:

² “Израилё отхая палэ (отомстиндя), мануша́ сыкадэ, со ёнэ отдэна пэс; славинэ́н Рас-Дэвлэ́с!

³ Шунэ́н, кра́ли, зарипирэн, тхагарьялэ: мэ Ра́скэ-Дэвлэ́скэ багава, брэнчынава Ра́скэ-Дэвлэ́скэ, Дэвлэ́скэ Израилёскирэ.

⁴ Ке́ли выджасас Ту, Раё Дэ́вла, Сеиростыр, ке́ли Ту ги́ян Эдомоскирэ фэлдатыр, тэды трискирдяпэ пхув, и тхадыя болыбэ́н, и о́блоки чхувэ́нас пани́;

⁵ а бэ́рги таиндлэ (биладёнас) Ра́скирэ-Дэвлэ́скирэ мо́стыр, адя́кэ-паць дава́, сыс Синаё, Ра́скирэ-Дэвлэ́скирэ, Израилёскирэ Дэвлэ́скирэ мо́стыр.

⁶ Дро Самегароскирэ дывэса́, Анафовоскирэ чхавэ́скирэ, дрэ Иаилякирэ дывэса́, сыс чхудэ́ дрома́, и мануша́, савэ́ псирдэ́ англэды́р мамуе (вортонэ) дромэ́нца, тэды псирдэ́ пашатунэ́ дромэ́нца.

⁷ Хасинэ́ гавитка мануша́ кэ Израилё, на яця́ лэн, пака мэ, Девора, ґаздыёмпэ, пака ґаздыёмпэ мэ, э дай дро Израилё.

⁸ Выкэдынэ́ нэвэн дэвлорэн, далэ́стыр пашы́л вудара́ джа́ла марибэ́н. Ци бицяло́ сыс шчы́то и чхурдыбнытко буст (коп΄ё) машки́р штардэшэ тысёнцы пир Израилё?

⁹ Ило́ миро исын кэ тумэ́, Израилёскирэ барыдыра́, кэ ревнители (зэвлыныбнарья), савэ́ отдэна пэс манушэ́нгэ; славинэ́н Рас-Дэвлэ́с!

¹⁰ Мануша́, савэ́ традэ́на пэ парнэ́ ослицэндэ, савэ́ сыс бэштэ́ пэ паринга (ковры) и псирэ́на пир дром, бага́н гилы́!

¹¹ Машкир манушэ́нгири зан (глос), савэ́ скэдэ́на ста́ды пашэ́ ґанынга́, одо́й мэк тэ забаган сла́ва Ра́скэ-Дэвлэ́скэ, сла́ва Израилёскирэ тхагарьенгэ! Тэды выгинэ́ кэ по́рта (вра́ты) Ра́скирэ-Дэвлэ́скирэ мануша́.

¹² “Ѓаздэпэ, ґаздэпэ, Девора, ґаздэпэ, ґаздэпэ! Забага гилы́! Ушты́, Варако! И лы́джа тырэ́ пленонэн, Авиноамоскиро чхаво́!

¹³ Тэды Ёв пиридыя манушэ́н набутэнгэ зоралэндыр; Рай Дэвэ́л дыя́ ма́нгэ муршканэн (смялонэн).

¹⁴ Ефремостыр явнэ́ мануша́, савэ́ дживдэ́ саро́ пэ́скиро джиибэ́н пэ Амаликоскири пхув; пал ту́тэ, Вениамино, машки́р тырэ́ манушэ́ндэ, Махиростыр гинэ́ барыдыра́, и Завулоностыр мануша́, савэ́ндэ сыс кхия (дэсто́) ваш чхиныбнарискэ (писцоскэ).

¹⁵ И Исахароскирэ тхага́рья сыс Девораса, и адя́кэ-паць Исахаро, сыр Варако, чхурдыяпэ пэ до́ло пэзал. Дро Рувимоскиро кхэри́тко ро́до (племё) сыс бари чинга́рд.

¹⁶ Со бэшто́ ту сан машки́р бакрэ́нгирэ, шуны стадэнгиро мекиныпэн (блеяныпэн)? Дро Рувимо́скирэ кхэри́тка ро́ды джа́ла бари чинга́рд.

¹⁷ Галаа́до дживэ́ла штылэ́с пал Иорда́но, и Даноскэ, со́стыр тэ дарэл пармэнца (корабленца)? Асиро исын бэшто́ пэ морёскиро (дэрьявэ́скиро) брэ́го и пашы́л пэ́скирэ причхудя (пристани) ёв дживэ́ла штылэ́с.

¹⁸ Дро Завулоно исын мануша́, савэ́ отдынэ́ пэ́скиро ди пэ мэрибэ́н, и дро Нефалимо – пэ фэлдакирэ вучипэна́.

¹⁹ Явнэ́ кра́лья, мардэ́пэ, тэды мардэ́пэ Ханааноскирэ кра́лья дрэ Фанаахо пашы́л Мегидоно́скиро пани́, нэ ёнэ на дорэснэ́ ни на́бут руп.

²⁰ Болыбна́стыр мардэ́пэ, чэргэня́ пэ́скирэ дромэндыр мардэ́пэ Сисараса.

²¹ Кисоноскири сы́гно рэ́кица (лэнори́) улыджия лэн, сы́гно рэ́кица (лэнори́) улыджия лэн, сы́гно рэ́кица (лэнори́) Кедумимо, сы́гно рэ́кица (лэнори́) Кисоно. Кхарпэ (двигинпэ), ди миро, зорья́са!

²² Тэды пхадинэ грэнгирэ ная (копыты) прастаибнастыр, зоралэ́ лэ́скирэ прастыбнастыр!

²³ Прокошэн (кэрэ́н арманя) Мерозос, ракирэ́ла Дэвлэ́скиро Янго́ло, прокошэн, прокошэн лэ́скирэ манушэ́н пал дова́, со на явнэ́ Ра́скэ-Дэвлэ́скэ тэ подэн васт Ра́скэ-Дэвлэ́скэ муршканэнца.

²⁴ Мэк тэ явэ́л бахтякирды машки́р ромнендэ э Иаиль, Хевроскирэ-Кенеяниноскири ромны́, машки́р джувлендэ дрэ ша́тры, мэк тэ явэ́л бахтякирды!

²⁵ Пани мангдя́ ёв: тхуд подыя ёй лэ́скэ, дро тхагаритко (вельможэскэ) тахта́й яндя́ ёй фэдыршо тхуд.

²⁶ А ле́во (зэ́рво) пэ́скиро васт протырдыя́ кэ кило, а право (чачо́) пэ́скиро кэ дынарьенгиро млотко; пэкадя́ Сисарас, промардя лэ́скиро шэро́, розмардя́ и пропхусадя лэ́скиро виско (цэль).

²⁷ Кэ ла́кирэ ґэра́ збандия ёв, пыя́, и пасия́, кэ ла́кирэ ґэра́ збандия ёв, пыя́, кай збандия, одо́й и пыя́ домардо.

²⁸ Дрэ фэнштра выдыкхэла и дэ́ла го́дла Сисараскири дай пирда́л решотка: со длу́гэс (ґара́) на джа́ла лэ́скиро марибны́тка вурдэ́н, со на сыгнякирэна лэ́скирэ-вурдэнэскирэ ро́ты?

²⁹ Годьварэдыр ла́тыр джувля́ отпхэнэна ла́кэ, и кокори ёй отпхэнэ́ла пэ пэ́скирэ лава́:

³⁰ ‘Чачэс, ёнэ латхнэ́, делинэна (роскэрэна) дорэсыбэ́н, пир патывалэ́ раклятэ, пэ дуе раклендэ пэ кажнонэ́ (сваконэ) халадэстэ; дро дорэсыбэ́н ёнэ дорэснэ́ (долынэ) кажнонэ́ лулуденца (цвятэнца) и́дя Сисараскэ, сави́ дорэснэ́ ёнэ дро дорэсыбэ́н кажнонэ́-лулуденца и́дя, высуды дуе ригэ́ндыр, злыны псикэндыр пленонэстыр.’

³¹ Адя́кэ мэк тэ хасён сарэ́ Тырэ́ вэ́рги, Раё Дэ́вла! А савэ́ рикирэ́на сыр Дро́гима Тут дро пэ́скиро ило́, мэк тэ явэ́н сыр кхам, саво́ джа́ла упрэ́ дрэ сари́ пэ́скири зор!” И откиныя пхув штардэша́ бэрш.